1 Sam. 30 - Ebaibul

Kinyaŋa Daudi ŋinyas ŋulu etiyatae Sikilag

¹ Ani elunyari ŋirwa ŋiarei, todolut Daudi ka ŋikajiok ŋulu arukito ka iŋes Sikilag. Toryamut Ŋiamaleki keŋaasi ajore kwap Yudaya ka keremo Sikilag. Kepotu Ŋiamaleki toremo ka kicunyasi Sikilag

² ka torikosi ŋaberu ka ŋituŋa ŋulu keya nen, ŋulu caryo ka ŋulu arwok. Mam ipei daŋ apotu ikes toara, nai apotu torikosi ikes torotokinioto.

³ Ani edolunete Daudi ka ŋikajiok ŋulu arukito ka iŋes lotaun, toryamut kicunyar keper alokwap. Toryamut kerikor ŋaberu kec ka ŋidwe ŋulusapa ka ŋulupesur.

⁴ Aŋun, apotu Daudi ka ŋikajiok ŋulu arukito ka iŋes, kigworo iworoete nooi, akitodol ŋina adaunor agogoŋu aneni kec ŋinakigworyet.

⁵ Keponi torikoroe ŋaberu a Daudi daŋ ŋunaarei, Ainoam ŋina alo Yesireel ka Abigail ŋina alo Karimel apuserut a Nabal.

⁶ Toyakaun Daudi locan ŋulu apolok nooi, anerae apotu ŋikajiok ŋulu arukito ka iŋes tolimut atemar ikicaki iŋes a ŋamoru. Arae ŋun aŋuna aŋoitotor ŋituŋa ŋul nooi aŋuna a ŋidwe kec a ŋulusapa ka ŋulupesur. Nai abu Akuj Ekapolon a Daudi inak iŋes atitinyu.

⁷ Tema Daudi neni ka Abiasar a esacaradoti a ŋolo arae lokoku ka Aimelek, “Inunae ayoŋ arapet.” Yau nai Abiasar arapet neni a Daudi.

⁸ Kiŋit nai Daudi Ekapolon ŋuna emaikina iŋes kitiya tema, “Atupakini ba ŋimoe ŋulu keremete ne? Apedori ayoŋ arukaun ikes a?” Toboŋok Ekapolon iŋes tema, “Totupak; anerae kire jik, irukauni iyoŋ ikes ka kire jik, inyakuni iyoŋ ŋituŋa ŋulu erikitoe.”

⁹ Aŋun, abu Daudi torotokis ka ŋikajiok ŋulu arukito ka iŋes ŋamiae ŋakanikapei. Todolut ikes nayonae ŋina enyaritae Besor, neni apotu ŋice kec kidoŋo.

¹⁰ Abu todou ŋikilyok ŋamiae ŋaarei a nen nyepedosi akidok ayonae. Nai torubakis Daudi ka ŋikilyok ŋamiae ŋaomwon iwuapito erot a ŋimoe.

¹¹ Ani edolete ikes neni alapat anakwap a ŋin, toryamut Ejipitanoit, yaut ŋikajiok ŋulu arukito ka Daudi iŋes neni a Daudi. Inakis iŋes ŋakipi ka akimuj;

¹² inakis ikes iŋes tari ŋaboboryo ŋuna arukitoe esibit ŋamugati ka ŋaraito a epiini ŋaarei ŋuna arukitoe esibit ŋamugati. Ani kedau Ejipitanoit ŋol akimuj, kikwaru; anerae kebu iŋes kiriya ŋapaarasya ŋauni ka ŋakuwarisya ŋauni nyimuja, kori nyemata ŋakipi.

¹³ Kiŋit nai Daudi iŋes tema, “Ŋolo a ŋae iyoŋ? Ai ibunitor iyoŋ?” Toboŋok iŋes tema, “Arae ayoŋ esorokit ŋolo abunit alo Ijipit, eketiyan a Emalekait a ece. Abu ekapolon kaŋ ekemyek ayoŋ a ne, anerae abu ayoŋ odyakakin, ŋirwa ŋiuni alunyar tokona.

¹⁴ Aŋaaritae isua ajore Kwap Yudaya nakwap a Ŋikeresi a ŋulu eyakasi Kwap Yudaya ka toremoi daŋ akwap ŋin, aponi isua toremoi etaun Sikilag, kicunyae.”

¹⁵ Kiŋit Daudi iŋes tema, “Ipedori iyoŋ arikor ayoŋ lokaremok ŋul a?” Toboŋok iŋes tema, “Kikoŋ mono iyoŋ alokiro ka Akuj atemar nyikiari iyoŋ ayoŋ ka nyikipotokini iyoŋ ayoŋ neni a ekapolon kaŋ, ido nai akayai ayoŋ iyoŋ kwap ama neni eya ikes.”

¹⁶ Toriko esorokit ŋol Daudi totiyaaror kwap, toryamut ikes ŋikaremok kec kielakin nakwap kec, imujete ka emasete kidoŋaete, anerae aŋatunito ikes ibore daadaŋ elal nooi anakwap a Ŋipilistin ka anakwap a Yudaya.

¹⁷ Kisiiryak Daudi ikes ŋinapei ipiripiriuni akoloŋ akitodol eboŋ akoloŋit ŋina atupakini ŋin. Mam ŋimoe ŋul ŋini abu tobucar, alemar ŋisorok ŋamiae ŋaomwon bon, ŋulu apotu todokakis ŋikaala toema.

¹⁸ kinyaku Daudi ibore daadaŋ ŋini ayaito Ŋiamaleki, kinyaku Daudi tari ŋaberu keŋ ŋunaarei.

¹⁹ Mam ibore abu Daudi nyinyaku, kedit, kori kepol, ŋidwe ŋulusapa kori ŋulupesur, eborosit, kori idiobore ca daadaŋ ŋini elemaritae; abu Daudi kinyaku ibore daadaŋ.

²⁰ Toremu daŋ Daudi ŋamesekin ka ŋaatuk, kiteme ŋikajiok ŋulu arukito ka iŋes, kisiŋareno alobaren a ŋulu abuunite ikes. Abasi ŋikajiok ŋulu arukito ka Daudi emeto ŋibaren ŋul alokiŋaren ŋuluce ebe, “Erae lu ŋulu aremuni Daudi.”

²¹ Todolu nai Daudi neni aya ŋikilyok ŋamiae ŋaarei ŋulu aupi akiwuapit kaapei ka Daudi erot a ŋimoe, ŋulu abu Daudi kimyek anayonae Besor. Tonyout ikes aneni eboiyoto toloto kisiryama Daudi ka ŋituŋa ŋulu arukitotor. Ani edolete Daudi ka ŋikajiok ŋulu arukito ka iŋes neni kec, kimala Daudi ikes.

²² Nai apotu ŋikilyok ŋulu aronok ka ŋasyanisya ŋulu arukito ka Daudi temasi, “Aŋuna pa aponiata ikes orukosi ka isua, mam ibore einakinio isua ikes anibore a ŋini enyakun isua. Nai elamari ŋinituŋanan kec akeeberu ka ŋidwe keŋ, torotokinio.”

²³ Nai tema Daudi neni kec, “Mam, ŋikaitotoi kaŋ, nyitemokino iyes kitiyata ŋun aŋuna a ŋiboro a ŋulu ikiinak Ekapolon iwon. Abu Ekapolon ikiurya iwon, ido kipotok ŋikaremok yok neni yok.

²⁴ Ŋae epedori apupokin ŋakiro ŋuna irworosi iyes? Anerae emaikina eriyan ibore ŋini eŋatari ituŋanan ŋini alosit najore ka ŋini a ituŋanan a ŋini edoŋit akitere ŋiboro. Emaikina ikes daadaŋ tomora ŋiboro eriyan.”

²⁵ Akisyakin anakoloŋit a ŋin, abu Daudi totub ŋun erae ekisil ŋolo amaikina kiwuapae anakwap a Isirael; eriŋa ŋun iwuapitae tari nakoloŋit na.

²⁶ Ani edoluni Daudi Sikilag, kiyakiya ŋiboro ŋulu aŋatuni iŋes ŋice neni a ŋikasikou a Yudaya a ŋulu arae ŋikonei keŋ, tema, “Erae lu ainakinet neni kus aloboro a ŋulu aŋatuni ayoŋ alomoe a Ekapolon.”

²⁷ Abu Daudi kiyakiya ŋiboro ŋul Besel, Ramos ŋina alo Negeb, Yatir;

²⁸ Aroer, Sipimos, Esitemoa,

²⁹ Rakal, lotaunio ŋulu a Yerameeli, lotaunio ŋulu a Ŋikeni,

³⁰ Orima, Borasan, Asak

³¹ ka Eburon ta nakiboisyo daadaŋ ŋuna sek ekiŋaren erimitotor Daudi ka ŋikajiok ŋulu arukito ka iŋes.