1 Sam. 29 - Ebaibul

Toŋero Ŋipilistin Daudi

¹ Tocunakis Ŋipilistin ŋajorei kec apaki ŋin neni enyaritae Apek, ido acunakina Ŋisirael lolelya ŋolo eyai nakadipaalat ŋina a Yesireel.

² Ani elosete ŋikarikok a ŋajorei a Ŋipilistin ka ŋasigarya kec ŋamiae ka a ŋalipyo, totupito Daudi ka ŋikajiok ŋulu arukito ka iŋes ta Akis Ŋipilistin alokaku.

³ Temasi ŋikarikok ŋajorei a Ŋipilistin iŋitasi ebe, “Nyo itiyaete Ŋiburaniyae lu a ne?” Toboŋok Akis ŋikarikok a ŋajorei a Ŋipilistin tema, “Meere mono Daudi lo a, eketiyan a Saul a erwosit a Isirael, ŋolo adau akiruk ka ayoŋ ŋirwa ka ŋikaru a? Ŋinapei adoiunio iŋes neni kaŋ, mam aronis aripu ayoŋ aneni keŋ tari tokona.”

⁴ Nai apotu ŋikarikok ŋajorei a Ŋipilistin toŋoikis Akis temasi neni keŋ, “Kitoboŋo ekile ŋol, ikotere iŋes elosi nakibois ŋina iinak iyoŋ iŋes. Nyemaikina iŋes orukosi ka iwon lojie, acepaki epedori iŋes alukin iwon alojie. Alipite nai ece epedorya iŋes amaikin ka ekapolon keŋ? Meere mono anakiyar a ŋikilyok a lu a?

⁵ Meere mono Daudi lo ŋolo eeotor ŋituŋa idoŋaete ebasi, ‘Aar Saul ŋulu keŋ ŋalipyo, ido aar Daudi ŋulu keŋ ŋalipyo ŋatomotomoe a?’ ”

⁶ Tonyarau nai Akis Daudi tema neni keŋ, “Ekoŋi ayoŋ alokiro a Ekapolon a ŋolo eyari atemar, irae iyoŋ ituŋanan ŋini ekinyomit ayoŋ, ido ajok ayoŋ akiwuakin iyoŋ etiyata ka ayoŋ najore. Ameun akoloŋit ŋina ibunio iyoŋ neni kaŋ akitodol tokona, mam aronis aryamu ayoŋ aneni kon, nai nyikikinyomito iyoŋ ŋikarikok a ŋajorei a Ŋipilistin.

⁷ Toboŋo, tolot ke ekisil, nyitiya ŋadi akitoŋoya ŋikarikok a ŋajorei a Ŋipilistin.”

⁸ Kiŋit Daudi Akis tema, “Nyo nai etiyat ayoŋ? Anironis iryamu iyoŋ aneni kaŋ a eketiyan kon ŋinapei alomunia ayoŋ lotic kon akitodol tokona; ŋina ibaakar iyoŋ ayoŋ nyilosi akitijiore ŋimoe a ekapolon kaŋ a erwosit?”

⁹ Toboŋok Akis Daudi tema, “Ayeni ayoŋ atemar emam ŋakiro ikitoroniaritere iyoŋ apei daŋ, ikoni iyoŋ alokiŋaren kaŋ emalaika ŋolo ka Akuj. Kikote neni daŋ, adaut ŋikarikok a ŋajorei a Ŋipilistin alimun ebe, ‘Nyikirukori iŋes ka isua lojie.’

¹⁰ Aŋun nai, tonyou moi taparacu eriŋa ekaikai, tonyoutu kaapei ka ŋiketiyak a ekapolon kon ŋulu irukunioto iyoŋ. Toloto nakibois ŋina akainak ayoŋ iyoŋ. Nai nyinup ŋakiro ŋuna aronok ŋuna ikilimokinete ŋituŋa, anerae itiya iyoŋ ŋakiro ŋuna ajokak neni kaŋ. Kisyakisi arotokin taparacu sek ŋisaae ŋulu ipiripiriunia akoloŋ.”

¹¹ Apotu nai Daudi ka ŋikajiok ŋulu arukito ka iŋes torotokis taparacu sek, toboŋosi nakwap a Ŋipilistin, kitipeiyosi Ŋipilistin make Yesireel.