1 Sam. 28 - Ebaibul

¹ Ŋirwa ŋul, apotu Ŋipilistin tocunakis ŋajorei kec aŋaar ajore, akirem Isirael. Tema Akis neni a Daudi, “Iyeni roboca iyoŋ atemar irukorete iyoŋ ka ŋikajiok ŋulu irukito ka iyoŋ, oloto ka ayoŋ najore.”

² Toboŋok Daudi tema, “Ejok nooi, iŋolikini iyoŋ a nen ŋuna etiyakini ayoŋ ŋolo arae eketiyan kon.” Tema Akis neni keŋ, “Ejok nooi, eketuruwori ayoŋ iyoŋ esigarit ŋolo ekeyokit ayoŋ ŋirwa daadaŋ.”

Tolot Saul neni ka amuron

³ Ani nai etwani Samuel, apotu Ŋisirael daadaŋ kigworo aŋuna keŋ, ido tonuka iŋes Rama, lotaun keŋ ke elope. Apaki ŋin, aris Saul kirita ŋimurok ka ŋulu a ŋililae anakwap a Isirael.

⁴ Tocunakin ŋajiorei a Ŋipilistin, potu kiboiyosi Sunem. Tocunak Saul Ŋisirael daadaŋ, toloto kiboiyosi Gilboa.

⁵ Ani iŋolikini Saul ajore a Ŋipilistin, tokuryaniar, tomaranik etau keŋ nooi.

⁶ Ani iŋisi Saul Ekapolon ŋuna emaikina iŋes kitiya, abu Ekapolon nyeboŋok iŋes, kerae anakirujaeta, kori anakilamilam ka adio, kori alokadwaran ke edio.

⁷ Tema nai Saul neni a ŋiketiyak keŋ, “Kiwarakinae ayoŋ amuron adio, ikotere ayoŋ olot neni keŋ eŋit iŋes ŋuna emaikina ayoŋ etiya.” Temasi ŋiketiyak keŋ neni a Saul, “Eyai amuron En-Dor.”

⁸ Aŋun, abu Saul kitusubun meere erwosit, ido tonap ŋilowi ŋice, tolot En-Dor. Torukosi ka ŋikilyok ŋiarei. Todolut ikes nakwaare neni ayai amuron ŋin. Tema Saul neni ka amuron, “Kiŋit ŋililae itolimokis iyoŋ ŋadikiro aŋuna kaŋ, ido bu neni kaŋ ituŋanan ŋini akalimokini ayoŋ iyoŋ.”

⁹ Tema aberu ŋin neni keŋ, “Kire jik, iyeni iyoŋ ŋuna abu Saul kitiya, epite ŋolo abunio iŋes kiritarya ŋimurok ka ŋulu a ŋililae anakwap a Isirael. Kaanukiro ikilokunitor iyoŋ ayoŋ icamitor ayaun atwanare neni kaŋ?”

¹⁰ Kikoŋ Saul neni ka aberu a ŋin alokiro a Ekapolon tema, “Ekoŋi ayoŋ alokiro a Ekapolon a ŋolo eyari atemar, mam akisicanet ebuni neni kon aŋuna a ŋakiro a nu.”

¹¹ Kiŋit nai aberu ŋin iŋes tema, “Ŋae icamit iyoŋ okonyarak ayoŋ iyoŋ?” Toboŋok iŋes tema, “Tonyarakinae ayoŋ Samuel.”

¹² Ani iŋolikini aberu ŋin Samuel, kikalou, kiworou nooi; kiŋit Saul tema, “Kaanukiro ikimodikinia iyoŋ ayoŋ? Irae iyoŋ Saul!”

¹³ Tema erwosit neni ka aberu, “Nyikuryaniar; nyo iŋolik iyoŋ?” Tema aberu ŋin neni a Saul, “Eŋolik ayoŋ elilat elomuni analup.”

¹⁴ Kiŋit Saul iŋes tema, “Ikwaan iŋes ka inyoni?” Toboŋok iŋes tema, “Alomu ekasikout alokwap, enapit iŋes ekaaso.” Aŋun, abu Saul toyenu atemar erae Samuel, aŋun abu toryedik, kijuuru todol ereet kwap, itoodiunit akitopoloorit keŋ Samuel.

¹⁵ Kiŋit nai Samuel Saul tema, “Kaanukiro ikicania iyoŋ ayoŋ, ikinyakunia ayoŋ analup?” Toboŋok Saul tema, “Ayai ayoŋ nakiyaloloŋ ŋina apolon nooi, anerae akaŋaanakinete ayoŋ Ŋipilistin ŋajorei, ido akaŋer Akuj ayoŋ. Mam ŋakiro eriŋa eboŋonokini aŋuna kaŋ alokadwarak, kori anakirujaeta, aŋun, akanyar ayoŋ iyoŋ, ikotere itolimok ayoŋ ŋuna emaikina etiya.”

¹⁶ Kiŋit Samuel iŋes tema, “Kaanukiro nai ikiŋisitor iyoŋ ayoŋ ŋun, torae bo kedau Ekapolon akiŋer iyoŋ ka iruwor emoit keŋ?

¹⁷ Etiya Ekapolon neni kon ŋakiro ŋuna akalimokinit ayoŋ iyoŋ. Alema Ekapolon apukan aneni kon, ainaki neni a Daudi, a ekidunyet kon,

¹⁸ anerae ibu iyoŋ nyiwuap ŋuna abala Ekapolon, nyisicana iyoŋ Ŋiamaleki anadedeŋu ka anaryenyeo a ŋina ikilimokinit iyoŋ Ekapolon. Aŋun, etiya tokona Ekapolon ŋakiro ŋun neni kon.

¹⁹ Ipotokini Ekapolon Isirael kaapei ka iyoŋ neni a Ŋipilistin, nai iyoŋ ka ŋidwe kon ŋulusapa, ikiruki ka ayoŋ moi taparacu. Ipotokini Ekapolon tari ŋasigarya a Isirael neni a Ŋipilistin.”

²⁰ Apaki ŋinapei ŋin, kimasar Saul toramakin kwap, tobul iŋes nooi aŋuna a ŋakiro a Samuel a ŋun, todaun agogoŋu aneni keŋ, anerae mam ibore emujit iŋes akoloŋit ŋin apaaran daadaŋ ka akuwar daadaŋ.

²¹ Ani ebuni amuron ŋin neni a Saul, kiŋolik Saul ebulit nooi, tema neni keŋ, “Kiira, adau ayoŋ aketiyan kon akiwuap ŋuna ibala iyoŋ. Abu ayoŋ alope ojal akiyar kaŋ, etiya ŋuna ibu iyoŋ tolimok ayoŋ.

²² Ekemaimai tokona ayoŋ iyoŋ, kiira ŋakiro kaŋ a aketiyan kon, ido itocamak ayoŋ okoinak iyoŋ akimuj adio ikimuj, toryamunia agogoŋu ŋina ilosyo neni icamit.”

²³ Toŋer Saul ŋun tema, “Nyemuji ayoŋ.” Nai apotu ŋiketiyak keŋ kaapei ka aberu ŋin kimaimaa iŋes, ido abu tocamu ŋakiro kec. Tonyou nai Saul alokwap kiboikin lokitaada.

²⁴ Apaki ŋin, ayakar aberu ŋin itaok ŋini atuman lore keŋ. Toem iŋes atipei toŋol itaok ŋin, tooku ŋakirya, tomunak, ido kipou ŋamugati ŋuna amam ŋakinyalet.

²⁵ Tosipok akimuj ŋin kiŋaren a Saul ka ŋiketiyak keŋ, kimuja ikes. Tonyout nai a nen akoloŋit ŋin nakwaare toloto.