1 Sam. 27 - Ebaibul

Kitiyanak Daudi Akis erwosit ŋolo a Gas

¹ Abu Daudi totamatama alotau keŋ tema, “Epedori Saul akiar ayoŋ apeikoloŋit ŋirwa lupei lu. Ŋuna emaikina ayoŋ etiya iŋes akisii nakwap a Ŋipilistin; oeka aneni a Saul, ikotere nai eupi Saul akiwarit ayoŋ tooma akwap a Isirael.”

² Aŋun, abu Daudi torotok a nen kilamar nakwap a Ŋipilistin, erukito ka ŋikajiok ŋulu arukito ka iŋes ŋamiae ŋakanikapei. Tolot iŋes neni ka Akis alokoku a Maok a ŋolo alo Gas.

³ Kiboiyoto Daudi ka ŋikajiok ŋulu arukito ka iŋes aneni ka Akis anakwap a ŋina a Gas. Arukito ŋinituŋanan kec ka ekal keŋ; Daudi daŋ arukito ka ŋaberu keŋ ŋaarei. Ainoam ŋina alo Yesireel ka Abigail ŋina alo Karimel, apuserut a Nabal.

⁴ Ani elimokinio Saul atemar alot Daudi Gas, tojoŋo iŋes akiwarit Daudi.

⁵ Tema nai Daudi neni ka Akis, “Ani kajok ayoŋ aneni kon, inakinae ayoŋ akibois adio alotaunio a akwap kon, ikotere ayoŋ eboi a nen, anerae nyejok ayoŋ eketiyan kon akiboi kaapei ka iyoŋ alotaun a ŋolo ipukator iyoŋ.”

⁶ Aŋun, abu Akis akoloŋit ŋin inak Daudi etaun ŋolo enyaritae Sikilag. Aŋun, arubaki Sikilag erae etaun a ŋirwosi a Yudaya tari tokona.

⁷ Kiboi Daudi anakwap a Ŋipilistin epeikaru ka ŋilapyo ŋiomwon.

⁸ Aloseneneete Daudi ka ŋikajiok ŋulu arukito ka iŋes akirem Ŋigesuri, Ŋigirisi ka Ŋiamaleki; kiboiyete ŋituŋa ŋul ŋinapei koloŋ anakwap a ŋina eyai ameun alo Sur tari Ijipit.

⁹ Torem Daudi akwap ŋin neni aronon, nyimyek ekile, kori aberu eyari, tomyaa ŋamesekin, ŋaatuk, ŋisigirya, ŋikaala ka kiwok ŋilowi, toboŋorya neni ka Akis.

¹⁰ Ani iŋisi Akis iŋes etemari, “Ai iŋaarit iyoŋ ajore nakoloŋit na?” Toboŋokini Daudi tema, “Alosit ayoŋ akirem aonite ŋina a Yudaya, kori aonite ŋina a Yeramel, kori aonite ŋina a Ŋikeni.”

¹¹ Mam ekile, kori aberu abu Daudi kimyek a nen eyari aŋuna ka akiya ŋakiro Gas. Etiyae Daudi ŋun aŋuna atamya ebe, “Epedorete ikes alimokin ŋituŋa a Gas atemar eyakae isua ne, etiyae Daudi ŋakiro ŋun ikotere edaun ituŋanan ŋini elimori ŋuna abu iŋes kitiya a nen.” Etiyae Daudi ŋakiro ŋun ŋirwa daadaŋ ŋulu eboiyo iŋes anakwap a Ŋipilistin.

¹² Ekinyomit Akis Daudi nooi aŋuna atamya ebe, “Nyeriŋa ŋituŋa a Daudi, Ŋisirael eminasi Daudi; aŋun, erubakini iŋes erae eketiyan kaŋ.”