1 Sam. 26 - Ebaibul

Kiŋarak Daudi Saul akiŋarakinet ŋina a ŋaarei nyear.

¹ Toloto Ŋisipi Gibea neni a Saul temasi, “Eŋopit Daudi alomukura a ŋolo ka Akila, a ŋolo iteosi ka Yesimon.”

² Aŋun, abu Saul tonyou totiyaar naloŋisat ŋina a Sip, torukosi ka ŋikilyok ŋulu asetae alo Isirael ŋalipyo ŋauni. Toloto ikes akiwarit Daudi naloŋisat ŋina a Sip.

³ Kiboiyosi Saul ka ŋikajiok ŋulu arukito ka iŋes diyete erot, lomukura ŋolo anyaritae Akila, ŋolo iteosi ka Yesimon. Nai eboi Daudi a naloŋisat apaki ŋin. Ani iirari iŋes atemar ebunit Saul akiwarun iŋes naloŋisat,

⁴ Kiyakiya iŋes ŋikemimak, kimimaut ŋul kire atemar kedolu Saul nen.

⁵ Torotok nai Daudi a nen bu nakibois ŋina eboiyoto Saul ka ŋikajiok ŋulu arukito ka iŋes; toripu Daudi akibois ŋina aperete Saul ka Abiner lokoku a Ner, ŋolo arae iŋes apolokinit ŋasigarya a Saul. Aperi Saul neni awuatae, ido awuaunito iŋes ŋasigarya anawaetin.

⁶ Kiŋit nai Daudi Eitait ŋolo anyaritae Aimelek ka Abisai lokoku a Seruia lokaato a Yoab tema, “Ŋae iyes ikitiyaar ka ayoŋ ama, neni iboiyoto ŋasigarya a Saul, oloto ka ayoŋ neni a Saul?” Toboŋok Abisai tema, “Ikirukori ayoŋ ka iyoŋ.”

⁷ Aŋun, apotu Abisai ka Daudi toloto neni aya ŋasigarya a Saul nakwaare. Toryamut ikes Saul ejotoe a nen alokidiŋ ŋasigarya, edupakinit akwara keŋ kwap diyete nakou keŋ; toperete Abiner ka ŋasigarya nawaetin keŋ.

⁸ Tema Abisai neni a Daudi, “Ikipotok iyoŋ Akuj ekonimoit nakoloŋit na; aŋun nai, kimyekinae ayoŋ orem iŋes aremyet apei bon, oenik kwap a akwara, nyaremi ayoŋ iŋes ŋaremyet ŋaarei.”

⁹ Nai tema Daudi neni ka Abisai, “Nyiar iŋes; anerae ŋae epedori akiar iŋes ŋolo erae Ekapolon abu toseu, ido kimyekinae iŋes ŋin nyitoroniyar?”

¹⁰ Tema Daudi, “Ekoŋi ayoŋ alokiro a Ekapolon a ŋolo eyari atemar, eari Ekapolon iŋes, kori edoli akoloŋit ŋina etwania iŋes; kori elosi iŋes apeikoloŋit lojie toarae a nen.

¹¹ Elipit ayoŋ Ekapolon ekeretak ayoŋ nyaar iŋes ŋolo erae Ekapolon abu toseu. Nai tokona, tolemu akwara ŋin ŋina edupa kwap diyete nakou keŋ ka etwo ŋolo a ŋakipi, ido apena.”

¹² Aŋun, abu Daudi ya akwara ŋina adupa kwap diyete nakou a Saul ka etwo ŋolo a ŋakipi, torotokis a nen. Mam ituŋanan aanyunit ikes, kori ayeni ŋadi, mam tari ituŋanan abu tokyenyu. Ajotoete ŋituŋa ŋul daadaŋ, anerae kebu Ekapolon kijukak ikes ŋajo ŋuna apotyok nooi.

¹³ Tolunyar nai Daudi aneni aperyoto ŋituŋa ŋul, tolot yaye akadipaalat neni alwana aneni kec iwadio. Todoka kidiama emukura.

¹⁴ Tonyara a nen ŋasigarya a Saul ka Abiner lokoku a Ner kiŋit tema, “Abiner, mam ŋakiro iboŋokini iyoŋ a?” Toboŋok nai Abiner kiŋit iŋes tema, “Ŋae mono iyoŋ ŋolo inyarit erwosit?”

¹⁵ Toboŋok Daudi Abiner kiŋit tema, “Meere iyoŋ ekile a? Ŋae ikwaanatar iyoŋ alo Isirael? Kaanukiro nai pa ibunio iyoŋ topedorya akiyok ekapolon kon erwosit? Anerae abunit nen ituŋanan ice akiar ekapolon kon erwosit.

¹⁶ Nyejokak ŋakiro ŋun ŋuna itiya iyoŋ. Ekoŋi ayoŋ alokiro a Ekapolon a ŋolo eyari atemar emaikina iyoŋ totwan, anerae nyiyoko iyoŋ ekapolon kon, ŋolo erae Ekapolon abu toseu. Kiŋolik iyoŋ tokona, ai eyai akwara a erwosit, kori etwo a ŋakipi ŋulu aya diyete nakou keŋ?”

¹⁷ Toyen Saul etoil erae ŋolo a Daudi, ido kiŋit tema, “Erae mono kire etoil ŋol ŋolo kon Daudi ikaakoku a?” Toboŋok Daudi tema, “Ee, erae etoil kaŋ, ekapolon kaŋ erwosit.”

¹⁸ Torubak Daudi irworo, kiŋit iŋes tema, “Kaanukiro iwaritor iyoŋ ekapolon kaŋ eketiyan kon? Anukiro etiyat ayoŋ? Anironis etiyat ayoŋ ekemanitere?

¹⁹ Ekemaimai tokona ayoŋ iyoŋ ekapolon kaŋ kiira ŋakiro kaŋ a eketiyan kon. Ani kerae Ekapolon ikiinakinit iyoŋ aremokin ayoŋ, emaimai ayoŋ iŋes tocamu ainakinet. Nai ani kerae ŋituŋa, elipit ayoŋ toruwor ikes ŋulu icenen alokiŋaren Ekapolon, anerae ekeritasi ikes ayoŋ anibore a ŋini etemokino ayoŋ oryamu aneni Ekapolon. Adaut ikes alimun ebe, ‘Ape, kitiyanak ŋacekujo.’

²⁰ Aŋun nai, nyikimyek ayoŋ akaarakinio nalup nu ŋuna elwaka aneni eyai Ekapolon; anerae ebunit erwosit a Ŋisirael ne akiwarit ayoŋ ca bon, lopite ŋolo irikaa ituŋanan abilikeret alokamukumukui.”

²¹ Tema nai Saul, “Etiya ayoŋ ŋuna aronok; toboŋu ikaakoku Daudi, anerae ibu iyoŋ nakoloŋit na nyilema akiyar kaŋ, nyekatakini nabo ayoŋ akiar iyoŋ. Kire jik abu ayoŋ etiya lopite ŋolo itiyaa ebaŋaanot, ido etiya ayoŋ ŋuna aronok nooi.”

²² Toboŋok Daudi iŋes tema, “Okoe erwosit! Akwara kon na! kimyek esorokit epei bu laalo omu a ne.

²³ Einanakini Ekapolon ŋinituŋanan eropit keŋ aŋuna eraakar ituŋanan ŋin ŋini iyookino ka ŋini ikinyoma; anerae abu Ekapolon nakoloŋit na ikipotok iyoŋ neni kaŋ, nai abu ayoŋ nyekyaa akan kaŋ okoar iyoŋ ŋolo erae Ekapolon abu itoseu.

²⁴ Ikwapei abunio akiyar kon okonomo ayoŋ nakoloŋit na, agasi ayoŋ tonomo Ekapolon akiyar kaŋ ka agasi okoiu iŋes ayoŋ alocan a daadaŋ.”

²⁵ Tema nai Saul neni a Daudi, “Toyai arereŋu neni kon ikaakoku Daudi! Agasi ayoŋ kitiya iyoŋ ŋuna alalak adepar ka kiloununu alotooma ŋun daadaŋ.” Torotok nai Daudi a nen, Saul daŋ toboŋo lore keŋ.