1 Sam. 24 - Ebaibul

Kiŋarak Daudi Saul nyear.

¹ Ani eboŋuni Saul aneni ewuapitor Ŋipilistin itiji, aponi tolimokinae ebe, “Eyai Daudi naloŋisat ŋina ka En-Gedi.”

² Toseu nai Saul ŋikilyok ŋalipyo ŋauni alo Isirael daadaŋ. Toloto ka iŋes akiwarit Daudi ka ŋikajiok ŋulu arukito ka iŋes lowae ŋolo a ŋatabab a ŋuna anyaritae ŋuna a ŋamee a ŋuna ka ariet.

³ Todolu Saul neni ayakasi ŋanokin a ŋamesekin ŋuna ayakasi epeiwae erot; tori Saul naturukan ŋina ayai nen akiŋarakin. Apaki ŋin, eboiyete Daudi ka ŋikajiok ŋulu arukitotor iŋes anaturukan a ŋin alotooma jik aneni alwanan.

⁴ Temasi ŋikajiok ŋulu arukito ka Daudi neni a Daudi, “Akoloŋit ŋina ikilimokinit iyoŋ Ekapolon iŋes na ebala, ‘Akainakini ayoŋ iyoŋ emoit kon, kitiya iyoŋ neni keŋ ŋuna ikitalakarito iyoŋ.’” Toniemar nai Daudi neni a Saul, totub ecileta a ekaaso a Saul pa eyeni Saul.

⁵ Ekaku aŋun, abu Daudi tomaran nooi alotau, anerae abu iŋes totub ecileta a ekaaso a Saul.

⁶ Tema iŋes neni a ŋikajiok a ŋulu arukito ka iŋes, “Elipi ekeretak ayoŋ Ekapolon nyetiya ŋuna aronok neni a ekapolon kaŋ, a ŋolo arae Ekapolon abu toseu iŋes aruwor erwosit. Elipi nyaar ayoŋ iŋes, anerae Ekapolon iŋes abu toseu iŋes aruwor erwosit.”

⁷ Aŋun, abu Daudi kimaima ŋikajiok ŋulu arukito ka iŋes, tolimok ikes nyitijikis Saul. Abu nai Saul tonyou a nen, toloma anaturukan torotok.

⁸ Ani keaka Saul iwadio, tonyou Daudi daŋ a nen, toloma anaturukan, tonyara Saul tema, “Ekapolon kaŋ erwosit!” Ani iŋoliyari Saul kaku, toryedik Daudi kijuuru, todol ereet kwap. Etiyae Daudi ŋun itoodiunit akitopoloorit keŋ Saul.

⁹ Tolimok Daudi Saul tema, “Kaanukiro inupya iyoŋ ŋakiro a ŋituŋa a ŋulu ebasi, ‘Ecamit Daudi akiar iyoŋ?’

¹⁰ Idau iyoŋ elope nakoloŋit na akiŋolikin epite ŋolo abunio Ekapolon ikipotok iyoŋ neni kaŋ anaturukan; apotu ŋituŋa ŋice temasi ayoŋ toar iyoŋ, nai abu ayoŋ ekeŋarak iyoŋ. Abu ayoŋ otema, ‘Mam nyaari ayoŋ ekapolon kaŋ; anerae Ekapolon iŋes abu kituruwo iŋes erwosit.’

¹¹ Kiŋolik iyoŋ papa, ecileta lo ŋolo a ekaaso kon, atiŋit ayoŋ. Abu ayoŋ otub ecileta a ekaaso kon, nai abu nyakaar iyoŋ. Totamatama mono iyoŋ, ido toyenu atemar nyatami ayoŋ akitiya ŋadi ŋuna aronok, kori aremokin iyoŋ. Mam aronis etiya ayoŋ neni kon, nai ikiwarit iyoŋ ayoŋ akiar.

¹² Ekapolon etyakuni ŋini esecit aneni yok kerae ayoŋ, kori iyoŋ. Ekapolon inyaŋari ŋuna aronok ŋuna itiya iyoŋ neni kaŋ, nai mam ŋuna eketiyakini ayoŋ iyoŋ.

¹³ Ikwapei ebaakar akitadapet ŋinaŋorot ebe, ‘Neni a ŋikasecak iŋes elomununuya asecenu’; aŋun, mam nyakaari ayoŋ iyoŋ.

¹⁴ Ŋae mono ebunit erwosit a Isirael akiar? Ŋae mono iwarit iyoŋ? Ituŋanan ŋini ikwaan ka eeŋok ŋolo atwan a? Ŋini ikwaan ka ikadesidesit a?

¹⁵ Ekapolon etyakuni ŋun, ido totubu ŋini esecit alokidiŋ yok. Ekapolon iŋes eanyuni ŋun, towo aŋuna kaŋ, okoiu ayoŋ nyikiar iyoŋ ayoŋ.”

¹⁶ Ani irikakini Daudi akirworo ŋakiro ŋun neni a Saul, kiŋit iŋes tema, “Erae mono kire etoil ŋol ŋolo kon Daudi ikaakoku a?” Kiworou Saul nooi kikalou.

¹⁷ Tema Saul neni a Daudi, “Irae iyoŋ ŋolo iyookino akilo ayoŋ; anerae itiya iyoŋ ŋuna ajokak neni kaŋ, ido etiya ayoŋ ŋuna aronok neni kon.

¹⁸ Ilimu iyoŋ nakoloŋit na epite ŋolo idaunia iyoŋ akitiya ŋuna ajokak neni kaŋ, anerae ibu iyoŋ nyikiar ayoŋ apaki ŋin ŋina ekepotokinitor ayoŋ Ekapolon neni kon.

¹⁹ Ŋae ŋinapei koloŋ ituŋanan ŋini ani keryamu emoit kimyek tolot emam ŋace? Aŋun, agasi ayoŋ ikiinak iyoŋ Ekapolon ŋuna ajokak aŋuna idau iyoŋ akitiya neni kaŋ nakoloŋit na.

²⁰ Ayenu nai tokona ayoŋ kire atemar ikituruworyo iyoŋ erwosit, ido edukun ejok apukan ŋina a Isirael aneni kon.

²¹ Kikoŋ nai tokona neni kaŋ alokiro a Ekapolon atemar nyimunyari iyoŋ ŋipapae kaŋ ekaku ka atwanare kaŋ ka daŋ atemar nyitoŋopiyari iyoŋ ekiro kaŋ alotuŋa a ekal a papa kaŋ.”

²² Abu nai Daudi kikoŋ ŋun alokiŋaren Saul. Torotok nai Saul toboŋo lore keŋ; nai toboŋosi Daudi ka ŋikajiok ŋulu arukito ka iŋes kitipeiyosi naturukanin ŋuna sek aŋopitotor alokamukumukui.