1 Sam. 23 - Ebaibul

Toiu Daudi etaun ŋolo anyaritae Keila

¹ Apaki ŋin, apotu ŋituŋa tolimokis Daudi ebe, “Aremo Ŋipilistin etaun ŋolo a Keila, ido eŋasete ŋikinyom analosin.”

² Kiŋit Daudi Ekapolon tema, “Alosi ba etijik Ŋipilistin ŋul?” Toboŋok Ekapolon tema, “Ee, ape kitijik Ŋipilistin, toiu Keila.”

³ Nai temasi ŋikajiok ŋulu arukito ka Daudi neni a Daudi, “Ikikuryaka sek iwon a ne alo Yudaya. Etyauni nai akuryanu yok ai, erae kikilot iwon Keila akitijiore ajore a Ŋipilistin?”

⁴ Kiŋit nai nabo Daudi Ekapolon ŋuna emaikina iŋes kitiya. Toboŋok Ekapolon iŋes tema, “Ee, ape totiyaar Keila; anerae epotokini ayoŋ Ŋipislitin napedor kon.”

⁵ Aŋun, apotu Daudi ka ŋikajiok ŋulu arukioto ka iŋes toloto Keila, tojioto ka Ŋipilistin, toremut ŋaatuk a Ŋipilistin. Toara ata Daudi Ŋipilistin ŋulu alalak nooi, toiut ŋituŋa a Keila.

⁶ Apaki ŋina alosyo Abiasar lokoku ka Aimelek Keila neni ayai Daudi, kebu iŋes ya nen arapet.

⁷ Ani elimokinio Saul atemar alot Daudi Keila, abu Saul tema, “Ewuak Akuj ŋol napedor kaŋ, anerae acakari bon aloma tooma etaun ŋolo eya ŋipukei ŋulu egolio a ŋasuwa.”

⁸ Tonyarau Saul nai ŋajorei keŋ daadaŋ alosit lojie, atiyaar Keila akirikaun Daudi ka ŋikajiok ŋulu arukito ka iŋes.

⁹ Ani eyenuni Daudi atemar itemonokin Saul akitiya aronis neni keŋ, tema neni ka Abiasar a esacaradoti, “Yau arapet laalo.”

¹⁰ Kilip Daudi tema, “Okoe Ekapolon, Akuj a Ŋisirael, adau ayoŋ eketiyan kon akiirar atemar ecamit Saul abunore ne Keila; amunyar etaun lo aŋuna ekemanitor iŋes ayoŋ.

¹¹ Etiyaun mono kire Saul ne ikwapei eirarya ayoŋ eketiyan kon a? Okoe Ekapolon Akuj a Ŋisirael, akadyekit ayoŋ iyoŋ, toboŋokinoe ayoŋ eketiyan kon.” Toboŋok Ekapolon tema, “Ee, etiyaun, ebuni ne.”

¹² Kiŋit nai Daudi Ekapolon tema, “Akajalakinete ayoŋ ka ŋikajiok ŋulu ikirukitor ayoŋ ŋituŋa a Keila neni a Saul a?” Toboŋok Ekapolon tema, “Ikijalakinete ikes iyes.”

¹³ Aŋun, apotu Daudi ka ŋikajiok ŋulu arukito ka iŋes ŋulu aapiyarit ekimar ŋamiae ŋakanikapei, torotokis alo Keila, ido apotu torubakis elosete anakibois ka apei tari ŋinace. Ani iirari Saul atemar arotoki Daudi alo Keila, abu nyelot nen.

¹⁴ Torubak Daudi iboi anaguriguryo anaturukanin a ŋuna aya naloŋisat ŋina ka akwap a ŋina anyaritae Sip, a ŋina alalak ŋikamukumukui. Abu Saul tolomak akiwarit Daudi a ŋinakoloŋit, nai abu Akuj nyimyek Saul toryamu Daudi.

Tobucar Daudi aneni a Saul analoŋisat

¹⁵ Ani eriŋa Daudi eyai lotaun ŋolo anyaritae Ores, naloŋisat ŋina alo Sip, kiira atemar abu Saul akiwarun iŋes akiar.

¹⁶ Abu Yonasan lokoku a Saul tolot lotaun ŋolo anyaritae Ores neni a Daudi akisimukekin Daudi toryamu atitinyu aneni ka Akuj.

¹⁷ Tema Yonasan neni a Daudi, “Nyikuryaniar; nyepedori papa kaŋ Saul akiar iyoŋ. Iruwor iyoŋ erwosit alo Isirael, ido ayoŋ akatupakini iyoŋ anapolou. Eyeni papa kaŋ Saul ŋun daadaŋ.”

¹⁸ Tocamunos ikes ŋuluarei ŋul alokiŋaren Ekapolon. Torubak nai Daudi iboi alotaun a ŋolo anyaritae Ores, ido toboŋo Yonasan lore kec.

¹⁹ Kepotu nai ŋituŋa a Sip ŋice toloto Gibea neni a Saul temasi, “Eŋopit Daudi anakwap kosi anaturukanin a ŋuna alotaun a ŋolo enyaritae Ores, alokidiama emukura ŋolo enyaritae Akila a ŋolo eyai lowae ŋolo alo Kwap Yesimon.

²⁰ Tokona nai erwosit, apaki daadaŋ ŋina icamitor iyoŋ atiyaun nakwap kosi, ipedori abunore, ikitenit isua ainakin Daudi neni kon erwosit.”

²¹ Tema Saul neni kec, “Ikiterereŋ Ekapolon iyes aŋuna ka amina kus neni kaŋ.

²² Apesi toanyut ejok. Toŋicitu neni emina Daudi eŋopenenea ka ŋae kire eŋolikinit iŋes a nen. Adaut ŋituŋa alimokin ayoŋ atemar eratana iŋes nooi.

²³ Toripa ŋakiboisyo daadaŋ toyenut neni eŋopenenea iŋes, ido toboŋut neni kaŋ iyakatar ŋakiro ŋuna a kire. Apedori nai ayoŋ arukor ka iyes; ani keriŋa iŋes eyai nen, ewari ayoŋ iŋes natekerin a Yudaya daadaŋ.”

²⁴ Aŋun, apotu ŋituŋa ŋul toboŋosi Sip, kiŋareniyosi eriŋa nyeloto Saul. Apaki ŋin, ayakasi Daudi ka ŋikilyok ŋulu arukito ka iŋes naloŋisat ŋina a Maon, lotaun ŋolo anyaritae Araba ŋolo eyai lowae ŋolo alo Kwap Yesimon.

²⁵ Tonyout nai Saul ka ŋikajiok ŋulu arukitotor iŋes toloto akiwarit Daudi. Ani elimokino Daudi atemar ikiwaritae iyoŋ, abu Daudi totiyaar naturukan ŋina ayai nataaba analoŋisat a ŋina a Maon; kiboi a nen. Ani iirari Saul atemar alot Daudi nen, abu tolot naloŋisat ŋina a Maon akiwarit Daudi.

²⁶ Ani eyai Saul emukura epeiwae, toyai Daudi ka ŋikajiok ŋulu arukito ka iŋes lowae ŋoloce, ikomaete atipei aekar aneni a Saul; anerae aapi ŋajorei a Saul akirimokin emukura kidiŋ, ikotere ikamunete Daudi ka ŋikajiok ŋulu arukito ka iŋes.

²⁷ Tomotun nai ituŋanan ice ŋini kiyakitae neni a Saul tema, “Bua, kiwonyu atipei, anerae aremo Ŋipilistin akwap yok.”

²⁸ Aŋun, abu Saul kimyek akiwarit Daudi, abu toboŋo akitijiore Ŋipilistin. Aponi nai tonyarae ekiro ka akibois a ŋina aboŋorya Saul ebe, “Ataaba ŋina ka abucaro.”

²⁹ Kitipeiyo nai Daudi a nen tolot akiboi naturukanin ŋuna eya En-Gedi.