1 Sam. 22 - Ebaibul

Daudi ka ŋikajiok ŋulu arukitotor iŋes alo Adulam

¹ Torotok Daudi alo Gas, tosi naturukan ŋina ayai Adulam. Ani iirarete ŋikaitotoi keŋ ka ŋituŋa a ekal a papa keŋ atemar eyai Daudi nen, totiyaaros nen neni ayai iŋes.

² Apotu ŋituŋa daadaŋ ŋulu aryamunito ŋican ka ŋulu ayakatar ŋamicae ta ŋulu akadakinit ekiboiye, kimorikinos ka Daudi; toruwor Daudi ekarikon kec. Arae ikes ŋituŋa ŋulu aapiyarit ekimar kec ŋamiae ŋaomwon.

³ Torotok Daudi a nen tolot Misipe nakwap a Moab. Tema iŋes neni a erwosit a Moab, “Ekapolon, kimyek kare ca papa kaŋ ka toto kaŋ potu akiboi ka iyoŋ, akitodol ŋina ayenunia ayoŋ ŋuna itiyakini Akuj aŋuna kaŋ.”

⁴ Kimyek Daudi ŋikauruunak keŋ erukito a erwosit a Moab, kiboiyoto ikes ka iŋes ŋirwa daadaŋ ŋulu eboiyo Daudi anaturukan.

⁵ Tema nai ekadwaran ŋolo anyaritae Gad neni a Daudi, “Nyirubak iboi anaturukan a emoru; torotok, ape nakwap a Yudaya.” Aŋun, abu Daudi torotok a nen, tolot namoni ŋina anyaritae Eres.

Tomunya Saul ŋisacaradotin alo Nob

⁶ Akoloŋit apei, aponi tolimokinae Saul atemar aripun neni eyai Daudi ka ŋikajiok ŋulu arukito ka iŋes. Apaki ŋin, eboi Saul alo Gibea alokwap ekitoe ŋolo esibit ekwaakwaa, ŋolo ayai kidiama emukura. Atiŋit iŋes akwara keŋ, ido awuasi ŋiketiyak keŋ a nen erimokinito iŋes kidiŋ.

⁷ Kiŋit Saul ŋiketiyak keŋ ŋulu erimokinito iŋes kidiŋ ŋul tema “Kiirasi tokona ŋakiro nu iyes ŋituŋa a Benjamin; epedori mono lokoku a Yese ainakin iyes ŋimanikorin ŋulu a ŋikinyom ka ŋulu ke epiini daŋ a? Epedori mono iŋes akituruwor iyes daadaŋ ŋikarikok a ŋajorei a ŋuna eyakasi ŋikilyok ŋalipyo ka ŋuna eyakasi ŋikilyok ŋamiae a?

⁸ Ŋakiro ŋun mono iŋes itukotor iyes aŋuna kaŋ a? Mam ipei daŋ kus ŋini akalimoki ayoŋ atemar acamunosi lokoku kaŋ ka lokoku a Yese, mam ipei daŋ kus ŋini akamina ayoŋ, kori ŋini akalimoki ayoŋ atemar ecoco lokoku kaŋ eketiyan kaŋ Daudi akiman ayoŋ, ido iwarit epite ŋolo akaarya ayoŋ, itiyae iŋes ŋun tari nakoloŋit na.”

⁹ Nai ayai neni erworor Saul nen Edomait ŋolo anyaritae Doeg, ŋolo apolokinit ŋiketiyak a Saul, tema iŋes neni a Saul, “Eŋolikinit ayoŋ lokoku a Yese ebunit Nob neni ka Aimelek a lokoku ka Aitub.

¹⁰ Abu Aimelek kiŋit Ekapolon ŋakiro ŋuna emaikina Daudi kitiya; abu daŋ iŋes inak Daudi akimuj ka ekileŋ a Golias a Epilistait.”

¹¹ Kiyakiya nai erwosit ituŋanan anyaraun Aimelek lokoku ka Aitub ka ŋituŋa a ekal a papa keŋ daadaŋ ta ŋisacaradotin ŋulu alo Nob. Potu ŋituŋa ŋul daadaŋ neni a erwosit.

¹² Tema Saul, “Kiira ŋakiro nu iyoŋ lokoku ka Aitub.” Toboŋok Aimelek tema, “Apupi ayoŋ ekapolon kaŋ.”

¹³ Kiŋit Saul iŋes tema, “Kaanukiro itukitor iyoŋ akiar ayoŋ, iyoŋ kaapei ka lokoku a Yese? Kaanukiro iinakinia iyoŋ iŋes ŋamugati ka ekileŋ, ido ibu iyoŋ kiŋit Ekapolon ŋakiro ŋuna emaikina Daudi kitiya? Aŋun, akaremokin iŋes ayoŋ, ido iwarit epite ŋolo akaarya ayoŋ, itiyae iŋes ŋun tari nakoloŋit na.”

¹⁴ Toboŋok Aimelek erwosit iŋita tema, “Ŋae aloketiyak kon a daadaŋ ikinyoma ikwa Daudi? Erae iŋes ekamuran kon erwosit, epolokinit daŋ iŋes ŋasigarya kon ka itopoloorito iŋes ŋituŋa a ekal kon.

¹⁵ Akoloŋit mono ŋin esyakinia ayoŋ akiŋit Ekapolon ŋakiro ŋuna emaikina Daudi kitiya a? Meere ikwaŋina! Erwosit, nyisitak eketiyan kon, kori ituŋanan idio alokal a papa kaŋ, anerae mam ŋakiro ŋadi daŋ eyeni eketiyan kon anakiro a ŋun a daadaŋ.”

¹⁶ Toboŋok erwosit tema, “Aimelek, kire jik, emaikina iyoŋ totwana, iyoŋ ke ekal a papa kon daadaŋ.”

¹⁷ Tema erwosit neni a ŋasigarya keŋ a ŋuna erimokinito iŋes kidiŋ, “Apesi toara ŋisacaradotin a Ekapolon, anerae ariwo ikes daŋ ka Daudi; ayenete ikes atemar asii Daudi, nai nyelimokina ikes ayoŋ ŋun.” Nai apotu ŋiketiyak a erwosit ŋul nyear ŋisacaradotin a Ekapolon.

¹⁸ Tosodi nai erwosit tema neni a Doeg, “Doeg, ape toar ŋisacaradotin.” Abu nai Doeg ŋolo arae Edomait tolot toar ŋisacaradotin. Toar Doeg akoloŋit ŋin ŋisacaradotin ŋatomonikanikauni ka ŋikan ŋulu anapito ŋarapeta ŋuna amilimilak.

¹⁹ Toar daŋ Doeg ibore daadaŋ ŋini ayai Nob, lotaun ŋolo a ŋisacaradotin: Ŋikilyok, ŋaberu, ŋidwe, ŋiŋwea, ŋaatuk ka ŋisigirya ta ŋamesekin.

²⁰ Nai kebu lokoku ka Aimelek a ŋolo arae lokoku ka Aitub, ŋolo anyaritae Abiasar tobucar toem neni ayai Daudi.

²¹ Tolimok Abiasar Daudi atemar aar Saul ŋisacaradotin a Ekapolon.

²² Tema nai Daudi neni ka Abiasar, “Akoloŋit ro ŋin ani eŋolikini ayoŋ Doeg Edomait a nen, abu ayoŋ oyenu atemar kire jik, elimokini Doeg Saul ŋakiro ŋuna abu papa kon kitiya neni kaŋ. Ayoŋ arikoki atwanare neni a ŋituŋa a ekal a papa kon a daadaŋ.

²³ Bua oruko ka ayoŋ, ido nyikuryaniar; ituŋanan ŋini ecamit akiar iyoŋ, ecamit akiar ayoŋ daŋ, nai mam ibore ikitapi iyoŋ ikirukit ka ayoŋ”