1 Sam. 21 - Ebaibul

Daudi ka ŋamugati ŋuna etaleoritae

¹ Todolu Daudi lotaun ŋolo anyaritae Nob, neni a esacaradoti a ŋolo anyaritae Aimelek. Tolot Aimelek akisiryam Daudi emarani. Kiŋit Aimelek Daudi tema, “Kaanukiro emamukar ituŋanan irukitotor iyoŋ?”

² Toboŋok Daudi esacaradoti Aimelek tema, “Ekecikit erwosit ayoŋ ŋakiro ebala, ‘Mam ituŋanan emaikina toyenu ŋakiro ŋuna tokona ekeyakitor ayoŋ iyoŋ, ŋakiro ŋuna ekecik ayoŋ iyoŋ.’ Adau ayoŋ akirworiun ka ŋisorok kaŋ akiryamun ka ikes nakibois ŋina eyenio isua make.

³ Aŋun nai, nyo itiŋit iyoŋ? Inakinae ayoŋ ŋamugati ŋakan, kori ibore ca daadaŋ ŋini eyai ne.”

⁴ Toboŋok Aimelek Daudi tema, “Mam ŋamugati ayakar ayoŋ ŋuna nyitaleoritae, ŋuna italeoritae bon eyakasi. Ani robo ca pa kiryamakina ŋisorok ŋul ka ŋaberu, mam ŋace.”

⁵ Toboŋok Daudi Aimelek tema, “Ee, nyiryamakina isua ka ŋaberu, iyokitoe isua ŋawat kosi erae ŋuna italeuno, apaki daadaŋ ŋina elosere isua lojie, ikitaleunun isua tari apaki ŋina elosere isua akitiya etic ŋolo edit. Ikitaleuno isua nooi apaki na ŋina ikiyakar lotic lo, ŋolo ikiyakitere.

⁶ Aŋun, abu esacaradoti inak Daudi ŋamugati ŋun ŋuna etaleoritae; anerae amam ŋamugati ŋace ayakasi nen alemar ŋun bon ŋuna etaleoritoe, ŋuna alemununiyo aneni iwuanakinio ŋamugati ŋuna italeoritae, ido emaikina kilunyokinae ŋace ŋuna amwanak nen akoloŋit ŋinapei.”

⁷ Akoloŋit ŋin, ayai nen eketiyan a Saul epei, ŋolo esidoŋitoe nen akitiya etic a Ekapolon. Anyaritae ekiro keŋ Doeg, ido abunit iŋes alo Edom ka arae iŋes ekapolon a ŋikeyokok ŋibaren a Saul.

⁸ Tema Daudi neni ka Aimelek, “Mam akwara, kori ekileŋ eyai ne itiŋit iyoŋ a? Nyayaunit ayoŋ ekileŋ kaŋ, kori ŋiboro kaŋ ŋulu ke ejie, anerae abu ayoŋ ewonyu ne atipei aŋuna ke erwosit.”

⁹ Tema esacaradoti neni a Daudi, “Ekileŋ a Golias, a Epilistait a ŋolo ibu iyoŋ toar anakadipaalat a ŋina ka Ela iŋes eyai ne. Eyai yaaye arapet, itukakinitae elou. Ani kicamit iyoŋ alemar, tolema, anerae mam ekileŋ ece eyai mati ŋol bon.” Tema Daudi neni keŋ, “Yau, mam ekileŋ ece ejok akilo ŋol.”

Tosi Daudi Gas

¹⁰ Torotok Daudi akoloŋit ŋin, tosi aneni a Saul, tolot neni ka Akis a erwosit a Gas.

¹¹ Kiŋita Akis ŋiketiyak keŋ temasi, “Meere mono lo Daudi ŋolo erae erwosit ka akwap keŋ a? Pa mono apotu ŋituŋa toeo ka kidoŋata aŋuna keŋ ebasi, ‘Aar Saul ŋulu keŋ ŋalipyo, ido aar Daudi ŋulu keŋ ŋalipyo ŋatomotomoe a?’ ”

¹² Totamatama Daudi ŋakiro a ŋituŋa a ŋul, ido abu akuryanu min neni keŋ nooi aŋuna ka Akis a erwosit a Gas.

¹³ Aŋun, abu Daudi kilocok ŋipitesyo keŋ alotuŋa a ŋul, abu iŋes kiredak akitusubun ituŋanan ŋini a ŋikerep alotuŋa a ŋul. Abu iŋes kigirigir ŋikekya a epuke, ido kimyek ŋakimul eleleete alopenek keŋ.

¹⁴ Kiŋit Akis ŋiketiyak keŋ tema, “Kiŋolikisi iyes, erae ekile lo ŋolo a ŋikerep, kaanukiro iyauniata iyes iŋes neni kaŋ?

¹⁵ Ikimamukar mono ayoŋ ŋikakerep, iyauniata iyes ekaŋikerep lo akitiya ŋuna a ŋikerep alokiŋaren kaŋ a? Emaikina mono etuŋanan lo tolomu kai kaŋ a?”