1 Sam. 18 - Ebaibul

Tocamunos Yonasan ka Daudi

¹ Ani edauni Daudi erwor ka Saul, kisupa Yonasan Daudi, tominak lopite ŋolo amininia iŋes bon.

² Ya Saul Daudi akoloŋit ŋin, nyecamak iŋes eboŋori lore a papa keŋ.

³ Tocamunos nai Yonasan ka Daudi, anerae abu Yonasan tominak Daudi lopite ŋolo amininia iŋes bon.

⁴ Tolacu Yonasan ekaaso ŋolo anapit, inak Daudi, inak tari ŋiboro keŋ ŋulu ke ejie, ekileŋ keŋ ka ŋikaleŋeleŋe ta arokoba keŋ.

⁵ Abu Daudi tolot neni daadaŋ abu Saul kiyakiya iŋes ka abu kitiya ejok, aŋun, abu Saul kituruwo Daudi ekapolon a ŋasigarya. Tocamut ŋituŋa daadaŋ Daudi, tocamut tari ŋikapolok ŋulu epukatotor Saul.

⁶ Ani epote ikes lore, apaki ŋina aboŋunio Daudi aneni aarya Epilistait, tolomut ŋaberu alotaunio a Isirael a daadaŋ eosi ka kidoŋaete elosete akisiryam erwosit Saul, toramete ŋiburin, toeos ŋieosyo ŋulu ka alelyan, toramete ŋiboro ŋulu eore.

⁷ Toeonokin ŋaberu make elakara temasi, “Aar Saul ŋulu keŋ ŋalipyo, ido aar Daudi ŋulu keŋ ŋalipyo ŋatomotomoe.”

⁸ Toŋo Saul nooi, anerae abu erwor ŋol nyitalaka iŋes. Tema iŋes, “Atemasi ba ŋituŋa Daudi earit ŋalipyo ŋatomotomoe, ido aarit ayoŋ ŋalipyo; nyo nai ibore ice idoŋit ŋituŋa ainakin iŋes alemar apukan?”

⁹ Ameun akoloŋit ŋin, abu Saul tocoik Daudi a arakao.

Kikatak Saul akiar Daudi

¹⁰ Akoloŋit ŋina atupakini ŋin, abu etau ŋolo aronon aneni ka Akuj bu neni a Saul egogoŋ nooi, kisyak iŋes akirworo bon ecela alokidiŋ akai keŋ. Apaki ŋin, abolya Daudi agita, lopite ŋolopei sek abolyaa a ŋinakoloŋit, ido atiŋit Saul apaki ŋin akwara keŋ;

¹¹ toremo Saul akwara keŋ, anerae abu iŋes totamak ebe, “Aremi ayoŋ Daudi toenik akwara narwatata.” Nai abu Daudi kiito anakwuara a Saul ŋakiitoret ŋaarei.

¹² Tokuryaniar Saul aŋuna a Daudi, anerae ayai Ekapolon kaapei ka Daudi, ido aris Ekapolon keŋer Saul.

¹³ Aŋun, abu Saul kirita Daudi tojoŋo ayakau ka Saul, kituruwo ekarikon ajore a ŋina aya ŋikilyok aliput. Kisyak Daudi arikonor ajore keŋ ŋin lojiesyo, ido kinyakununuye erikit emam ŋace.

¹⁴ Eloununui Daudi ŋimoe kec, anerae ayai Ekapolon kaapei ka iŋes.

¹⁵ Ani iŋolikini Saul atemar iloununui Daudi ŋimoe kec, abu tokuryaniar aŋuna a Daudi.

¹⁶ Nai apotu ŋituŋa a Isirael daadaŋ ka ŋituŋa a Yudaya tominakis Daudi, anerae arae Daudi abu torikono ikes lojiesyo, ido kinyaku ikes erikit emam ŋace.

Kiit Daudi Mikal

¹⁷ Tema nai Saul neni a Daudi, “Merab na nakoku kaŋ ŋina apolon, akainakini ayoŋ iyoŋ iŋes kiit; nai kitiyanakinae iyoŋ ayoŋ irae ŋolo ititiny, toji ŋijiesyo alokiro ke Ekapolon.” Atami Saul apaki ŋin ebe, “Mam ŋuna aronok ŋuna etiyakini ayoŋ neni a Daudi. Ŋipilistin earete iŋes.”

¹⁸ Tolimok Daudi Saul tema, “Ŋae mono ayoŋ, ŋae mono ekal a papa kaŋ, kori ateker a papa kaŋ alo Isirael, icamitor iyoŋ akituruwor ayoŋ ekamuran ke erwosit?”

¹⁹ Nai ani edoli apaki ŋina amaikina einere Daudi Merab kiit, aponi Merab inakinae neni ka Adiriel a ŋolo alo Mekola.

²⁰ Ayai apaki ŋin nakoku a Saul ŋina anyaritae Mikal, amina Mikal Daudi, aponi tolimokinae Saul ŋakiro a Mikal, ido abu Saul tolakar aŋun.

²¹ Totamak Saul ebe, “Itemokino ayoŋ oinak Mikal neni a Daudi, ikotere alokunia toara Ŋipilistin.” Aŋun, abu Saul tema neni a Daudi alimokinet ŋina a ŋaarei ebe, “Iruwor tokona iyoŋ lokamuran kaŋ.”

²² Kicik Saul ŋiketiyak keŋ tema, “Kisirworo Daudi aneni kus bon itemasi, ‘Kiira, elakara erwosit aŋuna kon, ido ikiminasi iyoŋ ŋiketiyak keŋ; aŋun nai, toruwor ekamuran a erwosit.’ ”

²³ Aŋun, apotu ŋiketiyak a Saul yaasi ŋakiro ŋun neni a Daudi, tolimokis ikes aneni kec bon. Nai abu Daudi kiŋit ikes tema, “Etakani mono aneni kus epatana aruwor ekamuran ke erwosit orae bo ayoŋ ekulyakit ka ituŋanan ŋini nyayenen alotuŋa a?”

²⁴ Tolimokis ŋiketiyak a Saul Saul ŋakiro ŋuna abu Daudi tolimok ikes.

²⁵ Tema Saul, “Tolimokisi Daudi ebe, ‘Mam ibore iitanit erwosit iyoŋ tolemu akiisya nakoku keŋ, alemar ecamit iŋes iyoŋ toar ŋipilistin amiat, kileŋer, yau ŋamunyin kec inak iŋes; kinyaŋa ŋuna apotu ŋimoe a erwosit ŋul kitiyata. ’” Arae ŋin aloketait a Saul ŋina kitolomaret Daudi neni a Ŋipilistin toarae.

²⁶ Ani elimokinete ŋiketiyak a Saul Daudi ŋakiro ŋun, tolakar Daudi tocamu aruwor ekamuran ke erwosit. Aŋun, ani eriŋa nyedolo akoloŋit ŋina ke ekiitanu,

²⁷ tonyou Daudi, torukosi ka ajore keŋ, toara Ŋipilistin ŋamiae ŋaarei, yau ŋamunyin kec, inak erwosit ekimar ŋolo abala iŋes yautu ikotere eruwor Daudi ekamuran keŋ. Aŋun, abu Saul inak nakoku keŋ Mikal neni a Daudi toruwor aberu keŋ.

²⁸ Nai ani eyenuni Saul atemar erukito Ekapolon ka Daudi ka emina nakoku keŋ Mikal Daudi,

²⁹ min nabo akuryanu ŋina apolon nooi neni a Saul aŋuna a Daudi. Aŋun, abu Saul toruwor emoit a Daudi ameun akoloŋit ŋin.

³⁰ Torubakis ŋikarikok a ŋajorei a Ŋipilistin eŋaanarete ŋajorei; ŋapakio daadaŋ ŋuna aŋaununuyata ikes ŋajorei, eloununui Daudi ikes akilo neni eloununuyata ŋikarikok ŋajorei a Saul, aŋun, apotu ŋituŋa kituruut ekiro a Daudi.