1 Sam. 16 - Ebaibul

Kituruworoe Daudi erwosit

¹ Tema Ekapolon neni a Samuel, “Tari ori igworo iyoŋ aŋuna a Saul? Adau ayoŋ akiŋer iŋes anaraakau erwosit a Isirael, kilelebik akimyet namomwara ŋina itiŋit iyoŋ, ido tonyou tolot; ekeyakiyari ayoŋ iyoŋ neni a Yese a ŋolo eyai Betelem. Adau ayoŋ aseun aŋuna kaŋ epei a ŋidwe keŋ a ŋulusapa aruwor erwosit.”

² Kiŋit Samuel Ekapolon tema, “Alipite emaikina ayoŋ olosyo? Acepaki iirari Saul ŋakiro ŋun, okoar ayoŋ.” Toboŋok Ekapolon iŋes tema, “Tomyaa ataok, ido tolimok ŋituŋa ebe, ‘Abunit ayoŋ ne ainakin amuronot neni ke Ekapolon.’

³ Tonyarau Yese bu namuronot ŋin, ido eketoodikini ayoŋ iyoŋ ŋuna emaikina iyoŋ kitiya. Emaikina iyoŋ kiosak akimyet aŋuna kaŋ neni a ituŋanan a ŋini akalimokini ayoŋ iyoŋ.”

⁴ Abu nai Samuel kitiya ŋuna ecikit Ekapolon, bu tari Betelem. Potu ŋikasikou a Betelem akisiryam Samuel emaranete, kiŋita Samuel temasi, “Ibunit iyoŋ isilit a?”

⁵ Toboŋok iŋes tema, “Esilit; abunit ayoŋ ne ainakin amuronot neni ke Ekapolon; kitaleutu ŋawat kus, ido ipotu oloto ka ayoŋ namuronot.” Kitaleu iŋes Yese ka ŋidwe keŋ ŋulusapa, ido tonyarau ikes potu namuronot.

⁶ Ani edolunete ŋituŋa neni a Samuel, kitek Samuel Eliab totamak ebe, “Kire jik, ŋolo ewoi alokiŋaren Ekapolon ŋol erae eseuna a Ekapolon.”

⁷ Nai tema Ekapolon neni a Samuel, “Nyemaikina iyoŋ kiŋolik etakane, kori aoyau keŋ, adau ayoŋ akiŋer iŋes; anerae nyite Ekapolon lopite ŋolo iteoto ŋituŋa. Iteete ŋituŋa etakane ka akuwan, nai ite Ekapolon etau a ituŋanan.”

⁸ Tonyarau nai Yese Abinadab, tolimok iŋes kitor kiŋaren Samuel. Tema Samuel, “Meere tari lo aseu Ekapolon.”

⁹ Tolimok nai Yese Sama kitor diyete Samuel. Tema Samuel, “Meere tari lo aseu Ekapolon.”

¹⁰ Tolimok nai Yese ŋidwe keŋ ŋulusapa ŋikanikaarei kitoro kiŋaren Samuel, nai abu Samuel tema neni a Yese, “Mam ipei daŋ aneni a lu ŋini aseu Ekapolon.”

¹¹ Kiŋit Samuel Yese tema, “Eyakasi ŋidwe kon ŋulusapa daadaŋ ne a?” Toboŋok Yese tema, “Ŋolo cici bon emam a ne, etwarit iŋes ŋamesekin,” Tema nai Samuel neni a Yese, “Kiyakiya ituŋanan yau iŋes, anerae nyikiboikin iwon akitodol ŋina ebunio iŋes ne.”

¹² Kiyakiya Yese ituŋanan, yaunae edya ŋol tooma neni ayakasi ikes. Arae edya ŋol ŋolo acope ŋakonyen, ido arae iŋes ŋolo ebus anakonyen, tarae ŋolodirya ka akuwan. Tema Ekapolon neni a Samuel, “Tonyou, kiosak iŋes akimyet, anerae iŋes lo.”

¹³ Tolemu nai Samuel amomwara ŋina ayai akimyet, kiosak akimyet lodya alokiŋaren ŋikaitotoi keŋ. Ameun akoloŋit ŋin, abu etau ŋolo ke Ekapolon min neni a Daudi nooi. Torotok nai Samuel a nen toboŋo Rama.

Toram Daudi Agita aŋuna a Saul

¹⁴ Apaki ŋin, keris etau ke Ekapolon kelot aneni a Saul, ido abu Ekapolon kiwuak ekipye neni a Saul, kisican iŋes.

¹⁵ Temasi ŋiketiyak a Saul neni keŋ, “Kiŋolik iyoŋ tokona, ikisicanit iyoŋ ekipye ŋolo ewuak Akuj neni kon.

¹⁶ Ekapolon kosi, tolimok ŋiketiyak kon, toloto kiwarut ituŋanan ŋini eyeni akiram agita; ikotere nai apaki daadaŋ ŋina ikikamunia iyoŋ ekipye ŋolo iyakuunit Akuj neni kon, toramak ituŋanan ŋin agita, toŋaleu iyoŋ.”

¹⁷ Aŋun, abu Saul tema neni a ŋiketiyak keŋ, “Kiwarakinae ayoŋ ituŋanan idio ŋini epedori akiram agita ejok, yaut iŋes neni kaŋ.”

¹⁸ Tema esorokit epei, “Ayeni ayoŋ lokoku a Yese a ŋolo alo Betelem atemar erami agita ejok nooi, erae iŋes ekile ŋolo etitiny, ekajion, irworo ejok nooi, erae iŋes ŋolodirya ka akuwan, ido eyai Ekapolon kaapei ka iŋes.”

¹⁹ Aŋun, abu Saul kiyakiya ŋituŋa neni a Yese tema, “Kiyaku Daudi lokoku kon ŋolo iyoki ŋamesekin neni kaŋ.”

²⁰ Tolemu Yese esigirya toenik, kiwuak ŋamugati, ecwee ŋolo ke epiini ka ikale ŋini ka ameot, kiyakiya lokoku keŋ Daudi ya neni a Saul.

²¹ Todolu nai Daudi neni a Saul, towo alokiŋaren keŋ. Tominak Saul Daudi nooi kituruwo ŋolo eryoŋit ŋiboro keŋ ŋulu ke ejie.

²² Kiyakiya Saul akirot neni a Yese tema, “Kimyek Daudi kiboi a ne kitiya etic aŋuna kaŋ, anerae ejok iŋes nooi aneni kaŋ.”

²³ Ameun nai apaki ŋin, akikamun ekipye ŋolo eyakuunit Akuj Saul bon, tolemu Daudi agita keŋ toramak, kiwuara nai Saul, tojokyar, toŋaleu aŋuna arotokinio ekipye aneni keŋ.