1 Sam. 15 - Ebaibul

Kilou Saul Ŋiamaleki, nai abu nyear erwosit kec

¹ Tema Samuel neni a Saul, “Ekeyakuu ayoŋ Ekapolon akiosakin iyoŋ akimyet toruwor erwosit a Ŋisirael; aŋun, topupok tokona ŋakiro a Ekapolon.

² Ebala Ekapolon ŋolo Etiron ebe, ‘Esicani ayoŋ Ŋiamaleki aŋuna aponiata ikes toriwokis Ŋisirael apaki ŋina aponiata Ŋisirael alo Ijipit.

³ Ape tokona kisiiryak Ŋiamaleki, tomunya jik ibore daadaŋ ŋini eyakatar ikes, nyimyek ikes, toar ŋikilyok, ŋaberu, ŋidwe, ŋaatuk, ŋakinei, ŋikaala ka ŋisigirya.’ ”

⁴ Aŋun, abu Saul tonyarau ŋisigarya, kimar ikes alo Telaim. Kimaru ŋisigarya ŋulu amam ibore adokito ŋalipyo ŋamiae ŋaarei ka ŋulu aponito alo Yudaya ŋalipyo ŋatomon.

⁵ Potu Saul ka ŋasigarya keŋ lotaun a Ŋiamaleki, tourumikis etaun anakadipaalat.

⁶ Tolimok Saul Ŋikeni tema, “Toloto! Toema nariet! Topakaros aneni a Ŋiamaleki, ani kemam, akamunyari ayoŋ iyes kaapei ka ikes; kitiyata ŋun, anerae ipotu iyes kitoodiut arimao neni a Ŋisirael a daadaŋ apaki ŋina aponiata ikes alo Ijipit.” Aŋun, apotu Ŋikeni topakaros aneni a Ŋiamaleki.

⁷ Kilou Saul Ŋiamaleki ameun alo Apila todol tari Sur, Kide Ijipit.

⁸ Toriko Saul Agag erwosit a Ŋiamaleki eyari, nai tomunya ke ekileŋ ŋituŋa ŋuluce daadaŋ.

⁹ Kimyekis Saul ka ŋituŋa Agag ka ŋamesekin ta ŋaatuk ŋuna ajokak, ŋitak ŋulu atumak ka ŋikaalei ta ibore daadaŋ ŋini ajok, apotu ikes nyear ŋul, nai apotu ikes tomunyasi jik ibore daadaŋ ŋini ajamuwarito ikes ka acaryoono aneni kec.

Toŋeroi Saul aruwor erwosit

¹⁰ Apaki ŋin, abu Ekapolon kirwor neni a Samuel tema,

¹¹ “Akakadakis ayoŋ ŋakiro ŋuna abunio eturuworya Saul erwosit, anerae akaŋer iŋes ayoŋ ka nyiwuapa iŋes ŋuna ecikit ayoŋ iŋes.” Toŋo Samuel nooi, kigwor neni ke Ekapolon akuwar kia.

¹² Tonyou Samuel taparacu sek, tolot akiryamun ka Saul, nai aponi tolimokinae iŋes ebe, “Alot Saul Karimel, ido adau adukokin nen aduketait ŋina etamunitere iŋes, adau iŋes aboŋun a nen, atiyaar Giligal.”

¹³ Ani edoli Samuel neni a Saul, tema Saul, “Ikiterereŋ iyoŋ Ekapolon; adau ayoŋ akiwuap ŋuna ekecikit ayoŋ Ekapolon.”

¹⁴ Nai kiŋit Samuel Saul tema, “Anuutuk bo ka ŋamesekin ŋuna apupi ayoŋ erwosi ŋun?”

¹⁵ Toboŋok Saul tema, “Erae ŋibaren ŋul ŋulu ameunete ŋisigarya aneni a Ŋiamaleki; apotu ikes kimyekis ŋamesekin ka ŋaatuk ŋuna ajokak aŋuna ka ainakin erae amuronot neni ke Ekapolon Akuj kon. Nai aponi isua tomunyarae ŋibaren ŋuluce daadaŋ.”

¹⁶ Tema nai Samuel neni a Saul, “Tojoŋo erwosit! Acamit ayoŋ alimokin iyoŋ ŋakiro ŋuna abu Ekapolon okolimok ayoŋ bien nakwaare.” Toboŋok iŋes tema, “Tolimu!”

¹⁷ Tema Samuel, “Tari kimenen iyoŋ bon, meere mono iyoŋ irae ekarikon a ŋikabilae a Ŋisirael a? Abu Ekapolon ikiosak iyoŋ akimyet toruwor erwosit a Isirael.

¹⁸ Abu Ekapolon ikiyak iyoŋ akitiya ŋuna abu iŋes tema, ‘Ape, tomunya ŋikasecak daadaŋ, Ŋiamaleki, kitiji ikes akitodol ŋina imunyarya.’

¹⁹ Kaanukiro nai pa ibunio iyoŋ kiwuap ŋakiro ke Ekapolon? Kaanukiro ibunio iyoŋ tomatakin aŋatun ŋiboro, ido ibu kitiya ŋuna aronok alokiŋaren Ekapolon?”

²⁰ Tema Saul neni a Samuel, “Adau ayoŋ akiwuap ŋakiro ke Ekapolon, abu ayoŋ olot neni ekeyakit Ekapolon ayoŋ, ayau ayoŋ Agag erwosit a Ŋiamaleki, ido adau ayoŋ amunyar Ŋiamaleki.

²¹ Apotu ŋisigarya toseut alobaren ka aloboro a ŋulu aŋatunete ikes ŋamesekin ka ŋaatuk ta ŋiboro ŋulu ajokak erae amuronot neni ke Ekapolon Akuj kon alo Giligal.”

²² Nai toboŋok Samuel Saul tema, “Elakara mono Ekapolon aŋuna a ŋainakineta a ŋuna epeyo ka ŋamuronisya lopite ŋolo elelyania iwuapito ŋituŋa ŋakiro keŋ a? Kiira! Ejok akiwuap ŋakiro a Ekapolon akilo amuronot, ido ejok akipup ŋakiro a Ekapolon akilo ainanakin iŋes asepwae a ŋimeesekin,

²³ anerae ikwaan akiŋer Ekapolon ka asecit ŋina ka akikukuja. Ikwaan akituro ka aronis ŋina ilipere neni a ŋakujo. Aŋuna iŋerio iyoŋ akirot a Ekapolon, ikiŋer daŋ iŋes iyoŋ anaraakau erwosit.”

²⁴ Tema Saul neni a Samuel, “Asec ayoŋ aŋuna abunio oŋer akiwuap akiciket a Ekapolon ka ŋakiro kon. Arae ŋun aŋuna abunio ayoŋ oker ŋituŋa, ido ewuap ŋuna abasi ikes.

²⁵ Aŋun nai, akadyeki ayoŋ iyoŋ, ikisyon ayoŋ aŋuna ka asecit kaŋ, oboŋosi ka ayoŋ, ikotere ayoŋ elip neni ke Ekapolon.”

²⁶ Nai tema Samuel neni a Saul, “Nyikiboŋori ayoŋ ka iyoŋ, anerae iŋer iyoŋ akirot ke Ekapolon, ido ikiŋer Ekapolon iyoŋ anaraakau erwosit a Isirael.”

²⁷ Ani eboboŋi Samuel ecamit arotokin, kikamu Saul abilet a ekaaso a Samuel tocila.

²⁸ Tema Samuel neni keŋ, “Adau Ekapolon alemar apukan a Isirael aneni kon ameun nakoloŋit na, ido ainaki neni a ekidunyet kon ke epei a ŋolo ejok akilo iyoŋ.

²⁹ Nyemodiyana Akuj ŋina ailiilon ŋina a Isirael, kori nyiloconokini ŋuna atubu akitiya, nyerae iŋes ituŋanan, aŋun, nyiloconokini ŋatameta keŋ.”

³⁰ Toboŋok Saul tema, “Adau ayoŋ akisec, nai inakinae ayoŋ apolou tokona alokiŋaren ŋikasikou ŋulu a ŋituŋa kaŋ ka alokiŋaren Ŋisirael. Oboŋosi ka ayoŋ, ikotere ayoŋ elip neni ke Ekapolon Akuj kon.”

³¹ Aŋun, abu Samuel toboboŋ, toboŋosi ka Saul, ido abu Saul kilip neni ke Ekapolon.

³² Tema nai Samuel, “Yautu Agag erwosit ŋolo a Ŋiamaleki neni kaŋ.” Bu nai Agag neni a Samuel elakara etami ebe, “Kire jik, abucun ayoŋ anapipilu a ŋina ka atwanare.”

³³ Nai tema Samuel, “Ikwapei eturuworya ekileŋ kon ŋaberu ŋuna emam ŋidwe, toto kon daŋ emamukaunor ŋidwe.” Abu Samuel toar Agag alokiŋaren Ekapolon alo Giligal.

³⁴ Tonyou nai Samuel a nen tolot Rama; ido tonyou Saul a nen kitipeiyo lore keŋ Gibea nakibois ŋina a Saul.

³⁵ Ameun akoloŋit ŋin, nyiŋolikina nabo Samuel Saul, mati akoloŋit ŋina atwania Samuel, nai abu Samuel kigwor aŋuna a Saul. Abu Ekapolon toanyu atemar arae adyakaret keŋ akituruwor Saul erwosit a Isirael.