1 Sam. 12 - Ebaibul

Erwor a Samuel ŋolo esidyon

¹ Tema Samuel neni a Ŋisirael a daadaŋ, “Adau ayoŋ acamun ŋakiro kus daadaŋ ŋuna ikilimokis iyes ayoŋ, ido akainak ayoŋ iyes erwosit ŋolo ikipukae.

² Kiirasi, iyakatar tokona iyes erwosit ŋolo erae ekepukan kus, ani eruwor ayoŋ, amojoŋ akwaŋut ŋitim, nai irukito iyes ka ŋidwe kaŋ ŋulusapa. Akarik ayoŋ iyes ŋinapei anasorokanu kaŋ tari nakoloŋit na.

³ Ayoŋ lo! Tolimutu alokiŋaren Ekapolon ka alokiŋaren eseuna keŋ ŋakiro ŋuna etiyat ayoŋ ŋuna aronok. Ŋae abu ayoŋ odema emoŋ? Ŋae abu ayoŋ odema esigirya? Ŋae idio abu ayoŋ omodiya ibore idio? Ŋae abu ayoŋ otiŋ ka aronis? Ŋae idio abu ayoŋ ocamu akainakini ayoŋ akaluŋuluŋut, ikotere emyek iŋes? Ani ketiyat ayoŋ ŋun ŋadi, tolimokinae ayoŋ, ikotere okotacak ayoŋ iyes.”

⁴ Toboŋokis ŋituŋa temasi, “Mam nyemodiyara iyoŋ ibore aneni kosi, kori nyetiŋa iyoŋ isua a aronis, nyijaara aneni a ituŋanan a idio akaluŋuluŋut.”

⁵ Tema Samuel neni a ŋituŋa, “Ekapolon iŋes erae esuuda a ŋakiro kus ka ŋolo aseu Ekapolon iŋes erae esuuda nakoloŋit na, atemar mam ŋakiro ŋuna aronok ŋuna iryamut iyes etiyat ayoŋ.” Temasi nai ŋituŋa, “Ekapolon iŋes erae esuuda.”

⁶ Tolimok Samuel ŋituŋa tema, “Ekapolon iŋes erae esuuda, iŋes abu toseu Moses ka Aaron, ido iŋes abu yau atapapaa kus anakwap a Ijipit.

⁷ Aŋun, nai tokona, totena, anerae alosi ayoŋ akisileerekin iyes ŋakiro alokiŋaren Ekapolon, ido akalimokini ayoŋ iyes ŋaiununuet daadaŋ, ŋuna abu Ekapolon itoiunia iyes ka toiunia atapapaa kus.

⁸ Ani kedaut Yakob ka ŋidwe keŋ ŋulusapa akiboikin nakwap a Ijipit, apotu Ŋijipitian kiteryamut ikes ŋican, aŋun, apotu atapapaa kus kikalout neni ke Ekapolon, ido abu Ekapolon kiyakiya neni kec Moses ka Aron, ŋulu apotu yaut ikes alo Ijipit; kisiboikis ikes nakwap na.

⁹ Nai apotu atapapaa kus toŋero Ekapolon Akuj kec; aŋun, abu Ekapolon kipotok ikes neni a ekile a ŋolo anyaritae Sisera, a ŋolo apolokinit ŋasigarya a erwosit a ŋolo anyaritae Yabin a ŋolo ka Asor. Abu daŋ Ekapolon kipotok ikes neni a Ŋipilistin ka neni a erwosit a Moab; a ŋulu apotu kitijioto ikes.

¹⁰ Apotu nai ikes kikalout neni ke Ekapolon temasi, ‘Ikisec isua, anerae aŋeri Ekapolon, ido alomakin akitiyanakin ata Baal ka ata Asitarite; nai toiunae isua tokona anapedor a ŋimoe kosi, ido ikitiyanakini isua iyoŋ.’

¹¹ Abu nai Ekapolon kiyakiu Yerubaal, Barak, Yepesa ka Samuson, ido apotu ikes itoiut iyes anapedor a ŋimoe kus alowaetin a akwap kus a daadaŋ, ido kiboiyoto emam ŋace.

¹² Nai ani iŋolikinete iyes erwosit Naas ŋolo a Ŋiamoni ebuni akirem iyes, ipotu iyes toŋero Ekapolon aruwor erwosit kus, ido itemasi neni keŋ, ‘Itemokino ikipuka isua erwosit.’

¹³ Kiŋolikisi, erwosit ŋolo iseut iyes lo, ipotu iyes temasi ikicamit erwosit; kiŋolikisi ikiinak iyes Ekapolon erwosit ŋolo ikipukae.

¹⁴ Ani kitopoloosi iyes Ekapolon, kitiyanakis iŋes, topupo ŋuna ebala iŋes, ido nyiŋero ŋakiciketa keŋ ka ani kiwuapa iyes ke erwosit ŋolo ikipukat iyes Ekapolon Akuj kus, ejokyata ŋakiro aneni kus.

¹⁵ Nai ani pa kipupo iyes Ekapolon ka ani kiŋero iyes ŋakiciketa keŋ, ikiremokin iyes Ekapolon, iyes kaapei ke erwosit kus.

¹⁶ Aŋun nai, totena, toyenut ŋakiro nu ŋuna apolok nooi ŋuna itiyakini Ekapolon iteete iyes.

¹⁷ Meere apaki ŋina elemere ŋaganoi na, ŋina emamukar akiru a? Anyarae ayoŋ Ekapolon yau agiro ka akiru; ikotere iyes iyenunete ka iŋolikinete atemar eroko nooi ŋuna itiyata iyes alokiŋaren Ekapolon, anerae ipotu iyes kiitana aryamun erwosit ŋolo ikipukae iyes.”

¹⁸ Aŋun, abu Samuel tonyara Ekapolon, ido abu Ekapolon yau agiro ka akiru akoloŋit ŋin; kitopoloosi nooi ŋituŋa daadaŋ Ekapolon ka Samuel.

¹⁹ Temasi ŋituŋa daadaŋ neni a Samuel, “Kilip neni ke Ekapolon Akuj kon aŋuna kosi a ŋiketiyak kon, ikotere nyikitwaka, anerae eyatakin isua nasecisya kosi daadaŋ asecit ŋina ikicamitor erwosit ŋolo ikipukae isua.”

²⁰ Tema Samuel neni a ŋituŋa, “Nyikuryaketa; idaut iyes akitiya aronis ŋin daadaŋ, tari kitiyato ŋun, nyimyekis akiwuapit Ekapolon, nai kitiyanakisi Ekapolon a ŋitai kus a daadaŋ.

²¹ Nyiminakis ŋiboro ŋulu erae ŋikoŋinae ŋulu emam epoida, kori ŋulu nyikiunete, anerae erae ŋikoŋinae.

²² Aŋuna a ekiro keŋ a ŋolo epol nooi, nyeŋeri Ekapolon ŋituŋa keŋ, anerae abu iŋes tolakar ikituruwo iyes ŋituŋa keŋ.

²³ Ani eruwor ayoŋ, nyikiryama ca ka akisec neni ke Ekapolon anajoŋore akilip aŋuna kus, ido eketatami ayoŋ iyes ŋipitesyo ŋulu ejokak ka ŋulu iyookino.

²⁴ Kitopoloosi kire iyes Ekapolon, kitiyanakisi iŋes anakikinyomit a ŋitai kus a daadaŋ; totamutu ŋakiro ŋuna apolok nooi ŋuna etiya Ekapolon aŋuna kus.

²⁵ Nai ani kirubakis iyes itiyaete aronis, ikimunyaryo iyes kaapei ka erwosit kus.”