1 Sam. 11 - Ebaibul

Kilou Saul Ŋiamoni

¹ Kelunyar apaki ŋina aapiyarit elap epei, abu Naas erwosit ŋolo a Ŋiamoni tolot akirikaun Yabes-Gilead. Kimaimaa ŋikilyok ŋulu aya Yabes-Gilead Naas temasi, “Ocamunos kare ca ka isua, ido eruworoe isua ŋiketiyak kon.”

² Nai toboŋok Naas erwosit a Ŋiamoni ikes tema, “Ikicamun iwon erae kicamut iyes nu, ogorono ayoŋ akoŋu a ŋinituŋanan kus ŋina aloteten, olema ajokis aneni a Ŋisirael a daadaŋ.”

³ Toboŋokis ŋikasikou ŋulu a Yabes iŋes temasi, “Inakinae isua ŋirwa ŋikanikaarei bon, ikotere iakiyaryo isua ŋituŋa nakwap a Isirael daadaŋ, ani kemam ituŋanan ebuni aiun isua, ecamunio isua ŋuna ibala iyoŋ.”

⁴ Ani edolunete ŋituŋa ŋulu eyakitae Gibea neni eboiyo Saul, tolimosi epupete ŋituŋa daadaŋ ŋakiro ŋuna eyakitere ikes, kikalout ŋituŋa daadaŋ iworoete.

⁵ Apaki ŋin, abunit Saul alomanikor ameunit ŋimoŋin; kiŋit Saul ŋituŋa tema, “Anukiro atakanut lotuŋa, ŋuna isigworete ikes?” Aŋun, apotu ŋituŋa tolimokis Saul ŋakiro a ŋituŋa a Yabes.

⁶ Min etau ŋolo ka Akuj neni a Saul inak, apedor apaki ŋina eirarya ŋakiro ŋun, tonepu aŋoit aneni keŋ nooi.

⁷ Tolemu iŋes ŋimoŋin ŋiarei toar totubutubu, ido kiyakiya ŋatubeta inak ŋituŋa ŋulu abu iŋes kiyakiya nakwap a Isirael daadaŋ akisera ebe, “Etubutubuyo lopite lo ŋimoŋin a ituŋanan a daadaŋ a ŋini ewouni akiwuapakin Saul ka Samuel.” Min nai akuryanu aŋuna ke Ekapolon neni a ŋituŋa a daadaŋ, tocamut ŋituŋa ŋakiro a Saul ke epeitau.

⁸ Ani imari Saul ikes alo Besek, toryamu ŋikilyok ŋulu alo Isirael erae ŋalipyo ŋamiae ŋauni ka ŋulu alo Yudaya erae ŋalipyo ŋatomoniuni.

⁹ Temasi ikes neni a ŋituŋa a ŋulu eyakuunitae alo Yabes, “Apesi tolimokisi ŋituŋa ŋulu alo Yabes-Gilead ebe, ‘Ikiunio iyes moi taparacu apaki ŋina emwanunia akoloŋ.’” Ani epote ŋikiyakia ŋul, elimokinete ŋituŋa a Yabes ŋakiro ŋun, tolelyana nooi ŋituŋa a Yabes.

¹⁰ Aŋun, apotu ŋituŋa a Yabes temasi neni a Naas, “Ikicamuni isua ŋakiro kon moi taparacu, ikotere kitiya iyoŋ neni kosi ŋuna daadaŋ ikitalakarito iyoŋ.”

¹¹ Akoloŋit ŋina atupakini ŋin, abu Saul totyakatyaka ŋituŋa toruwor ŋajorei ŋauni. Ani taparacu eriŋa nyedolo esaa epei ŋolo ka apaaran, kicodokis ikes neni eboiyoto Ŋiamoni, toara Ŋiamoni akitodol ŋina amwanunia akoloŋ; kielaros Ŋiamoni ŋulu ariŋa eyarete a ŋipeipei, mam ŋulu apotu toema kaapei erae ŋiarei.

¹² Temasi ŋituŋa neni a Samuel, “Ataŋae mono ŋoon eŋitasi ebe, ‘Epedori mono Saul akipuka iwon a?’ Yautu ŋituŋa ŋul neni kosi ikotere toarae isua ikes.”

¹³ Nai tema Saul, “Mam ituŋanan emaikina toarae nakoloŋit na, anerae aiu Ekapolon Ŋisirael nakoloŋit na.”

¹⁴ Tema Samuel neni a ŋituŋa, “Potu apena oloto Giligal, etogogoŋo arwosiyo a nen.”

¹⁵ Aŋun, apotu ŋituŋa daadaŋ toloto Giligal, kituruwosi Saul erwosit a nen alokiŋaren Ekapolon. Toara ŋamuronisya ŋuna ke ekisil a nen alokiŋaren Ekapolon. Tolelyana nooi Saul ka Ŋisirael daadaŋ a nen.