1 Sam. 10 - Ebaibul

¹ Abu nai Samuel tolemu ecupa ŋolo ayai akimyet, tobukok akimyet nakou a Saul, tonu iŋes tema, “Ikiosak iyoŋ Ekapolon akimyet aruwor ekepukan a ŋituŋa keŋ a Ŋisirael. Ipukae iyoŋ ŋituŋa a Ekapolon, toiu ikes anakan a ŋimoe kec a ŋulu irikaunito ikes alowaetin a daadaŋ. Nai tokona, eruwor nu akitoodikinet neni kon atemar ikiseu iyoŋ Ekapolon aruwor ekepukan a ŋituŋa keŋ.

² Ani tokona irotokini iyoŋ aneni kaŋ akoloŋit na, iryamasi iyoŋ ka ŋikilyok ŋiarei diyete alyal a Rakel anakwap a Benjamin aneni enyaritae Selisa. Ikilimokinete ikes iyoŋ temasi, ‘Aryamun ŋisigirya ŋulu ilosit iyoŋ akiwarar. Nyeriŋa tokona papa kon etamatamae aŋuna a ŋisigirya, alomaki atamatam aŋuna kon ebala: Anukiro emaikina ayoŋ etiya aŋuna a lokoku kaŋ?’

³ Ilunyar nai iyoŋ a nen kiŋaren, todol lokuyon ŋolo eyai Tabor; ido iryamun iyoŋ nen ka ŋikilyok ŋiuni ŋulu elosete Besel neni ka Akuj. Edakit epei ŋikaalei ŋiuni, edakit ŋolo a ŋiarei ŋamugati ŋauni, ido ŋolo a ŋiuni edakit ecwee ŋolo ke epiini.

⁴ Ikimalaete ikes iyoŋ, ido ikiinakinete ŋamugati ŋaarei ŋuna emaikina iyoŋ tocamu akijaun aneni kec.

⁵ Kilunyar a nen, idoli iyoŋ Gibeas-Eloim, nakibois ŋina elomito ŋasigarya a Ŋipilistin. Ani idoli iyoŋ nen ilomari lotaun, iryamasi ka atukot a ŋikadwarak etiyaun anakibois a ŋinamukur etiŋito: Aduŋgu, ebur ka apilu ta agita, idoŋaete. Iryamuni iyoŋ ŋikadwarak edwarete.

⁶ Elomari nai etau ke Ekapolon neni kon, ido kisyak iyoŋ akidwar kaapei ka ikes, igelaniar iyoŋ alopite a ŋolo sek iyakar.

⁷ Ani nai etakanunete ŋakiro ŋun neni kon, kitiya ŋuna ikilimokini iyoŋ Akuj akitiya, anerae eyai Akuj kaapei ka iyoŋ.

⁸ Ekaku a ŋun, itemokino iyoŋ totiyaar Giligal eriŋa ayoŋ nyeloto inaa; ido abuni ayoŋ neni kon ainakin Akuj ŋainakineta ŋuna epeyo ka ŋamuronisya ŋuna a ekisil. Kidarae ayoŋ a nen ŋirwa ŋikanikaarei, akitodol ŋina abunio ayoŋ neni kon, eketoodik iyoŋ ŋuna itemokino kitiya.”

Todwar Saul

⁹ Ani erotokini Saul aneni a Samuel, kitegelaan Akuj iŋes; kiyookin akoloŋit ŋin ŋakiro daadaŋ ŋuna a erwosit Samuel.

¹⁰ Ani erotokinete Saul ke eketiyan keŋ a nen elosete lomukura Gibea, kiryamunos iŋes ka atukot a ŋikadwarak, toloma etau ka Akuj neni a Saul, kisyak akidwar kaapei ka ŋikadwarak ŋul.

¹¹ Ani iŋolikinete ŋituŋa ŋulu sek eyenete iŋes epite ŋolo adwarya iŋes kaapei ka ŋikadwarak, kiŋitiŋitas make ebasi, “Anukiro kitiyakin neni alokoku a Kis? Erae mono Saul daŋ epei a ŋikadwarak a?”

¹² Kiŋit ikes ekile ŋolo a akibois a ŋin tema, “Ata ŋae atapapa a ŋikadwarak a nul?” Aŋakiro a ŋun, apotu ŋakiro nu toruwor akitadapet ŋina ebala, “Erae mono Saul daŋ epei a ŋikadwarak a?”

¹³ Ani irikakini Saul akidwar, tolot nakibois ŋinamukur.

¹⁴ Kiŋit mamae keŋ Saul ke eketiyan a Saul tema, “Ai ilosito iyes?” Toboŋok Saul tema, “Ewararitae isua ŋisigirya; ani nai eyenunio isua atemar nyeriŋa etakanunete, aponi isua tolotoi neni a Samuel.”

¹⁵ Tema nai mamae a Saul, “Tolimokinae ayoŋ ŋakiro ŋuna abu Samuel itolimok iyes.”

¹⁶ Tema Saul neni a mamae keŋ, “Abu Samuel itolimok isua atemar adaun aryamun ŋisigirya.” Nai ŋakiro ŋuna ka aruwor erwosit ŋuna abu Samuel kirwor, abu Saul nyelimok mamae keŋ ŋadi daŋ.

Kituruworoe Saul erwosit

¹⁷ Tonyarau Samuel Ŋisirael neni ke Ekapolon, nakibois ŋina anyaritae Misipa.

¹⁸ Tema neni kec, “Ebala Ekapolon Akuj a Ŋisirael ebe, ‘Abu ayoŋ okoyau iyes anakwap a Ijipit ka abu ayoŋ okoiu iyes anapedor a Ŋijipitian ka anapedor a ŋituŋa a ŋakwapin a daadaŋ a ŋuna ikitiŋito iyes erono.’

¹⁹ Nai iŋero iyes tokona Akuj kus, ŋina abu itoiu iyes anakiro a ŋuna aronok a daadaŋ ka alocan kus; nai tokona itemasi iyes, ‘Mam! Tosekinae isua erwosit ŋolo ikipukae.’ Aŋun nai, toloto kiŋaren Ekapolon a ŋikabilae ka a ŋatekerin kus.”

²⁰ Tonyarau nai Samuel ŋikabilae a Ŋisirael daadaŋ neni keŋ. Toseunae anakilamilam ekabila a Benjamin.

²¹ Tonyarau Samuel ekabila a Benjamin neni keŋ a ŋikalya, ido aponi toseunae anakilamilam ekal a Matrites. Ekaku, tonyarau Samuel ŋikilyok a ekal a Matrites neni keŋ, ido aponi toseunae anakilamilam Saul lokoku a Kis. Nai ani iwarunete ŋituŋa iŋes, apotu nyeryamut.

²² Aŋun, apotu ŋituŋa kiŋita Ekapolon nabo temasi, “Adolu mono ekile ŋol ne a?” Toboŋok Ekapolon tema, “Ee, eŋopit iŋes alogogoso.”

²³ Toema nai ikes, torikut Saul a nen, ani ewoi Saul alokidiŋ ŋituŋa, kileŋor iŋes a lotuŋa a daadaŋ ameun aloseketa tari nakou aŋuna aoyaa.

²⁴ Kiŋit Samuel ŋituŋa daadaŋ tema, “Iŋolikis iyes ekile ŋolo aseu Ekapolon a? Mam ituŋanan ikwaanatar iŋes alotuŋa a daadaŋ.” Tocelut ŋituŋa daadaŋ temasi, “Ikigasi torubak erwosit eyari!”

²⁵ Tolimok nai Samuel ŋituŋa ŋakiro ka arwosiyo ŋuna itemokino kiwuapae ka kitiyae. Kigirak Samuel ŋakiro ŋun lokitaabo, ido ya ekitaabo kiwuak neni etaletoi. Tolimok nai ŋituŋa daadaŋ toboŋosi lorerya kec.

²⁶ Tolot Saul daŋ Gibea lore keŋ, torukosi iŋes ka ŋikilyok ŋulu ajiok ŋulu keris Akuj ketap ŋitai kec.

²⁷ Nai apotu ŋasyanisya ŋace temasi, “Epedori mono etuŋanan lo aiun iwon a?” Tojamuwasi ikes Saul, ido nyeaut ŋainakineta ŋadi neni a Saul. Nai abu Saul nyemitak ŋakiro kec. Apaki ŋin, atiŋit neni aronon nooi Naas erwosit ŋolo a Ŋiamoni erwosit ŋolo a Ŋigadi ka ŋolo a Ŋirubeni. Amina Naas agoronor ŋakonyen ŋuna aloteten ŋuna a ŋimoe keŋ a ŋul, ido pa acamit ainakin Ŋisirael ekaiunan. Mam Ŋisirael ŋulu eboiyete alokekwaye Yorodan ŋulu abu Naas erwosit a Ŋiamoni toesik nyegororo ŋakonyen ŋuna aloteten. Nai ayakasi Ŋisirael ŋalipyo ŋakanikaarei ŋulu kepotu tosiwa aneni a Ŋiamoni toloto Yabes-Gilead.