1 Sam. 1 - Ebaibul

Akidouno a Samuel ka ainakinio keŋ neni ke Ekapolon

¹ Ayai nakwap ŋina a ŋikamukumukui ŋina a Epuraim ekile ece ŋolo abunit alo Romasaim. Anyaritae ekiro keŋ Elkana, arae iŋes Esupait lokoku a Yeroam a ŋolo arae lokoku a Eliu, a ŋolo arae lokoku a Tou, a ŋolo arae lokoku a Sup a ŋolo arae Epuramait.

² Ayakar iŋes ŋaberu ŋaarei; anyaritae apei Ana ka anyaritae ŋinace Penina. Ayakar penina ŋidwe, nai amam Ana ŋidwe.

³ Amina ekile ŋol akitipeiyonor Silo alotaun keŋ a ŋolokaru akilip ka ainakin amuronot neni ke Ekapolon a ŋolo a ŋajoresyo; etiyae iŋes ŋun alo Silo aneni ayakasi Opini ka Pineas ŋidwe a Eli ŋulusapa ŋulu arae ŋisacaradotin ŋulu a Ekapolon.

⁴ Apaki daadaŋ ŋina edolio akoloŋit ŋina einakinia Elkana amuronot keŋ, ainanakini Elkana aberu keŋ Penina akiriŋ adio ka ainanakini daŋ ŋidwe keŋ daadaŋ ŋulusapa ka ŋulupesur etya ŋinapei a toto kec.

⁵ Nai ani eruwor Ana, ainanakini akiriŋ ŋina alalan adepar ŋina a Penina, anerae amina Elkana Ana, tari daŋ ŋina pa edoo Ana.

⁶ Aŋuna pa edoo Ana, abu nakain keŋ tolomak akitoŋoyenen iŋes, ikotere isiyaloloŋiyori.

⁷ Apotu ŋun torubakis itiyasi a ŋolokaru. Apaki daadaŋ ŋina elosyo Ana Kai a Ekapolon, amina nakain keŋ akitoŋoyenen iŋes, akitodol tari ŋina igworyo toŋer akimuj.

⁸ Amina Elkana ekile ka Ana akiŋisenen Ana ebe, “Ana, kaanukiro igworor iyoŋ? Kaanukiro nyimuja iyoŋ? Kaanukiro esiliyoritor etau kon? Nyeketemokino mono ayoŋ iyoŋ akilo iyoŋ ayakau ka ŋidwe ŋulusapa ŋitomon a?”

⁹ Ani kedaut ikes akimuj ka akimat alo Silo, tonyou Ana tolot kitoodiyar neni ke Ekapolon. Apaki ŋin, eboi esacaradoti Eli alokicoloŋ a ŋolo a Kai ŋinakilipet.

¹⁰ Anakiyaloloŋ a ŋina apipilan nooi, abu Ana kilip neni ke Ekapolon ka kigwor nooi.

¹¹ Tolimu akikoŋet na ebe, “Okoe Ekapolon ŋolo Etiron, kerae ca kiŋolikini akitiditeuna kaŋ a aketiyan kon, ido itotamu iyoŋ ayoŋ, nyikimuryak ayoŋ aketiyan kon, nai ikiinak ayoŋ ŋina arae aketiyan kon ikoku ŋinisapat, ayauni ayoŋ iŋes kiŋaren kon erae ŋini italeunitoe, ŋini nyebanyio akitodol natwanare keŋ. Nyemasi iŋes epiini, kori ibore daadaŋ ŋini ikitemerakini, mam ituŋanan emaikina totapak ebanyet nakou keŋ.”

¹² Ani eriŋa iŋes erubakinit ilipi alokiŋaren Ekapolon, torubak Eli ite akituk keŋ.

¹³ Apaki ŋin, elipi Ana ekililiŋat; arae ŋipon bon asubanakinosi, pa apupo etoil keŋ; aŋun, abu Eli totamak atemar emera iŋes.

¹⁴ Aŋun, abu Eli kiŋit iŋes tema, “Apaki ŋina etya ai iyai iyoŋ imera, ililiŋi pa irworo? Kimyek emeret kon.”

¹⁵ Nai abu Ana toboŋok iŋes tema, “Nyamera ayoŋ, ekapolon kaŋ; arae ayoŋ aberu ŋina aryamunit ŋican ŋulu apipilak nooi; nyemata ayoŋ epiini, kori ŋagwe ŋadi ŋuna adwarak, nai igworonokini etau kaŋ Ekapolon.

¹⁶ Nyikite ayoŋ aketiyan kon esibit arae aberu ŋinakoŋinait, elipi ayoŋ ŋinapeita a ne erworo ŋuna ka akiyaloloŋ kaŋ, eyaloloŋi ayai locan ŋulu apolok.”

¹⁷ Toboŋok nai Eli iŋes tema, “Ape ke ekisil; elipi ayoŋ ikiinak iyoŋ Akuj a Isirael ŋuna iŋita iyoŋ aneni keŋ.”

¹⁸ Tema Ana, “Kimyekinae ayoŋ aketiyan kon ojokyar aneni kon.” Torotok nai Ana a nen, tolot nakibois keŋ, kisyak akimuj ka akimat kaapei ka lokile keŋ, todaun asiliyorit ŋina ka akiyaloloŋ aneni keŋ.

Akidouno a Samuel

¹⁹ Tonyout ikes taparacu sek kilipa neni ke Ekapolon; toboŋosi nai lore kec Rama. Kiryamakinos Elkana ka aberu keŋ Ana, ido abu Ekapolon toboŋok akilip ka Ana.

²⁰ Aŋun nai, abu Ana topoti, kidou ikoku ŋinisapat. Tolimok Ana ekiro a ikoku Samuel, anerae abu iŋes tema, “Abu ayoŋ eŋit Ekapolon ainakin ayoŋ ikoku.”

²¹ Apaki ŋina edounere Samuel, apotu Elkana ka ŋituŋa a ekal keŋ kitipeiyosi Silo akiya neni ke Ekapolon ŋamuronisya kec ŋuna a ekaru a ŋol ka akisiyookin ŋuna kebu iŋes kikoŋ neni ke Ekapolon.

²² Nai abu Ana nyelot, anerae abu iŋes tolimok lokile keŋ ebe, “Ani ejoŋoe ikoku akinak, ayai ayoŋ iŋes oinak neni ke Ekapolon, emyek kiboi alo Kai ke Ekapolon ŋirwa daadaŋ ŋulu ka akiyar keŋ. Ayai ayoŋ iŋes nen erae ŋini iwuanitae ŋirwa daadaŋ ŋulu ka akiyar keŋ.”

²³ Tema Elkana neni ka Ana a aberu keŋ, “Kitiya ŋuna ikitalakarito iyoŋ, kidareu akitodol ŋina ejoŋoo ikoku akinak, ŋuna ca bon elipa ayoŋ ikes nu ebe, ‘Kisiyook Ekapolon akirot keŋ.’” Aŋun, abu Ana kidoŋ lore, kitanak ikoku keŋ akitodol ŋina ajoŋoo akinak.

²⁴ Ani ejoŋoe ikoku akinak, abu Ana ya ikoku keŋ Kai a Ekapolon ŋina ayai Silo, tomyaa emoŋ ŋolo arae apolou ŋikaru ŋiuni, ya ŋakirya ŋakiloi ŋatomoniarei ka ŋaarei ka ebur ŋolo etiyaunitae alolou a ibarasit ŋolo eturitae epiini.

²⁵ Ani kedaun akiŋol emoŋ, abu Ana ya ikoku neni ke Eli.

²⁶ Tema Ana, “Okoe ekapolon kaŋ! Ikwapei iyarya iyoŋ ekapolon kaŋ, ayoŋ aberu ŋina paaran awoi a ne alokiŋaren ŋina elipa neni a Ekapolon.

²⁷ Abu ayoŋ elip aŋuna a ikoku a en, ido akainaki ayoŋ Ekapolon ikoku.

²⁸ Aŋun, ainakini tokona ayoŋ iŋes neni ke Ekapolon, ŋirwa daadaŋ ŋulu eyarya iŋes, erae iŋes ŋini einakinitae neni ke Ekapolon.” Aŋun, abu Ana toesik Samuel a nen aŋuna ke Ekapolon.