1 Pet. 5 - Ebaibul

Atukot ŋina a ŋituŋa a ŋulu ka Akuj

¹ Ŋikatukok, ayoŋ ŋolopei arae ekatukon, ŋolo arae esuuda a ŋican a Kristo, ŋolo alosi aryamun atyaket anapolou a ŋina itoodiunio: ekelipit iyes!

² Kiyoko ejok ŋamesekin ŋuna erae ŋituŋa ŋulu ikiinakinit Akuj iyes. Nyitiyata ŋun anakitiŋakina, nai anainakina ikwaŋina ecamitor Akuj, meere aŋuna ke eropit ca, nai aŋuna ka acamit akitiya.

³ Nyipukato ka agogoŋu ŋituŋa ŋulu ikiinakinitae iyes, nai toruworos akitaanyikinet neni a ŋamesekin a daadaŋ.

⁴ Ani nai etakanuni Ekeyokon ŋolo Apolon, iryamunete iyes ebokot ŋolo ka apolou a ŋina nyedaun akibuses keŋ.

⁵ Ikwaŋinapei ikoŋin, iyes daŋ ŋisorok, tokerito ŋikasikou. Itemokino iyes daadaŋ itiditeuna aneni a ŋuluce, ikotere kiŋaranakinos make, anerae igiritae Nakigireta ebe, “Itepegi Akuj ŋulu iturosi, nai erimaana aneni a ŋulu itiditeuna.”

⁶ Aŋun, kitiditeunos iyes anakan a ŋina ka apedor a ŋina ka Akuj, ikotere nai ikitopoloori iŋes iyes apaki ŋina ecamitor iŋes.

⁷ Yaasi ŋatyokisyo kus daadaŋ neni keŋ, anerae ikiyoki iŋes iyes.

⁸ Totenito, tokienyete! Anerae irimit Satan, ŋolo erae emoit kus ikwa eŋatuny ŋolo irurumae iwarit idio ŋini nyamat.

⁹ Kitepega iŋes; togogoŋ ananupit kus, anerae iyenete iyes atemar, eryamunito ŋikaitotoi kus alotooma Kristo anakwapin a daadaŋ ŋican ŋulu ikwaan ka ŋulu kus.

¹⁰ Ani kidaut iyes aryamun ŋican ŋul, ŋulu nyeayete apaki ŋina aoyan, epedori Akuj ŋina ka ajokis a daadaŋ, ŋina ikinyarit iyes akimor apolou keŋ ŋina nyedaun alotooma Kristo, akituruwor iyes ŋulu emam aronis; ikiinakini iŋes iyes atitinyu, agogoŋu ka ikitowuoi jik.

¹¹ Toyai apolou neni keŋ ŋikaru ka ŋikaru! Amen.

Ŋimalasyo ŋulu esidyok

¹² Silipano iŋes ekeŋarak ayoŋ akigir abaruwa ŋinauriyen na neni kus, ayeni ayoŋ atemar erae iŋes lokaato ŋolo ikinyoma. Acamit ayoŋ akisimukekin iyes ka akiteyenikin atemar erae ŋakiro ŋun ŋuna a kire ŋuna ka ajokis ka Akuj. Torubakisi jik anakirot a na!

¹³ Ikimalaete iyes Ŋikristo ka ŋulu seuna ŋulu eyakasi Babilon. Ikimalae iyes tari lokoku kaŋ Mariko.

¹⁴ Kimalas itunasi make anamina a ŋina a Ŋikristo. Toyai ekisil neni kus a daadaŋ a ŋulu a Kristo.