1 Pet. 3 - Ebaibul

Ŋikilyok ka ŋaberu

¹ Ikwaŋinapei, iyes daŋ ŋaberu, itemokino topupete ŋikilyok kus, ikotere ani keyai ŋolo nyenupit ŋakiro ŋuna ka Akuj, kitunupa ŋipitesyo kus, tari pa kilimut iyes akirot apei daŋ,

² anerae iŋolikinete ikes ŋipitesyo kus ŋulu ajokak ka ŋulu ka akerit ikes.

³ Nyitemokino iyes kisibusa ŋawat alonapitene kus ikwapei epite ŋolo iwoiyoto iyes ŋitim kori anapit ŋasuwa ŋuna amilimilak ka ŋilowi ŋulu ebusak.

⁴ Nai akilo, itemokino akibuses kus erae ŋina ebunit alotau, akibuses ŋina nyinyasun, ŋina erae etau ŋolo iyapara ka ŋolo isilit. Akibuses ŋin iŋes epol alokiŋaren Akuj.

⁵ Tari ŋaberu ŋuna koloŋ sek ŋuna arae ŋituŋa ka Akuj ka kigenosi neni keŋ, esibusete ŋawat kec anakerit ŋikilyok kec.

⁶ Ekoni Sara nen; akerit Aburaam ka tonyarite iŋes ekapolon keŋ. Irae tokona iyes daŋ ŋidwe a Sara ŋulupesur, erae kitiyata ŋuna ajokak pa ikuryanito.

⁷ Ikwaŋinapei, iyes daŋ ŋikilyok, itemokino kiboiyete ka ŋaberu kus ejok, toyenete atemar epalag ikes. Tokerito ikes, anerae einakini Akuj ikes daŋ ikwa iyes akiyar ŋina nyedaun. Kitiyata ŋun, ikotere tomam ibore isigukini akilip kus.

Akiyar kaapei

⁸ Aŋetakini, itemokino iyes daadaŋ iraakasi ŋipei alotai kus; toyakatar akisyoniyenen, tominanaros make ikwa ŋikaitotoi, torimaaka ka toruworos ŋulu itiditeuna aneni a ŋuluce.

⁹ Nyitacakis aronis naronis, kori ŋilam ka ŋilam; nai itemokino totacakis arereŋu, anerae erae ŋakiro ŋun aponere ikinyarae iyes, ikotere iryamunete arereŋu.

¹⁰ Ikwaŋinapei igiritere Nakigireta atemar, “Ituŋanan ŋini ecamit ayakau nakiyar ŋina ajokan, ka kiitanite aanyun ŋarwa ŋuna ka alakara, itemokino iŋes toesik akirworo ŋakiro ŋuna aronok ka akisud ŋakiro.

¹¹ Itemokino iŋes toesik akitiya ŋuna aronok, ido kitiya ŋuna ajokak; itemokino iŋes kiwar ekisil a etau keŋ a daadaŋ.

¹² Anerae iteete ŋakonyen ke Ekapolon ŋulu iyookino ka epupete ŋaki keŋ ŋakilipeta kec; nai enyorididi ereet ke Ekapolon ite ŋulu itiyaete ŋuna aronok.”

Aryamun ŋican aŋuna ka akitiya ŋuna iyookino

¹³ Ŋae mono epedori akiwan iyes erae kilelakinito akitiya ŋuna ajokak?

¹⁴ Nai ani tari kiryamut iyes ŋican aŋuna itiyaata ŋuna iyookino, ikiterereŋitoe iyes nooi! Nyikera idiotuŋanan ka nyiyaloloŋo.

¹⁵ Nai kipuro Kristo alotai kus ka kitopoloosi iŋes erae Ekapolon. Totenito ŋisaae daadaŋ aboŋokin ŋinituŋanan ikiŋisi iyes alimor akigeno ŋina eyai tooma kus;

¹⁶ nai kitiyata ŋun ka apatanu ka akerit. Tocayete ŋatameta kus, ikotere ani ikiyanyo kisirumae ŋileec ŋituŋa ŋulu irworosi ŋakiro ŋuna aronok aŋuna a ŋipitesyo kus a ŋulu ajokak, ikwapei ŋikewuapak ŋulu a Kristo.

¹⁷ Anerae ejok aryamun ŋican aŋuna ka akitiya ŋuna iyookino, erae kerae na acamit ŋina ka Akuj; akilo aryamun ŋican aŋuna ka akitiya ŋuna aronok.

¹⁸ Tari Kristo daŋ abu totwan apeitwanet bon aŋuna a ŋasecisya, totwan iŋes ŋolo amam asecit aŋuna a ŋikasecak; ikotere ikirikorya iyes neni ka Akuj. Apotu ŋituŋa toara Kristo alokuwane, nai abu Akuj kiteyaru iŋes erae ituŋanan ŋini erae etau.

¹⁹ Alopite a ŋolo araakar iŋes etau, abu tolot akitatam ŋitai ŋulu eenitae.

²⁰ Erae ŋul ŋitai a ŋulu awounete akiwuap Akuj, apaki ŋina atitinyikinitor iŋes idarit Noa kirikak akiduk ataker. Ŋituŋa ŋidikudyo--ŋulu arae ŋikanikauni bon--aponi toiunae a ŋakipi a ŋuna ekearete ataker.

²¹ Erae ŋakipi ŋun akitaanyikinet, ŋina ka akibatisao a ŋina tokona ikiununui iyes. Nyerae iŋes alemaret elos ŋolo eyai nakuwan, nai erae adyekit Akuj akitesegun ŋatameta yok, alotooma ayarun ŋina a Yesu Kristo,

²² Abu iŋes tolot nakuj ka eyai lowae ŋolo aloteten Akuj, ipukat ŋimalaikan daadaŋ ka ŋikapolok ŋulu eyakatar ŋapedorosyo anakuj.