1 Pet. 2 - Ebaibul

Amoru ŋina eyari ka Apukan ka Akuj

¹ Toesikisi aronis daadaŋ; tojoŋoto alyokonu, ŋisoswae, ka arakao ta ŋakiro a ŋiyany daadaŋ.

² Ikwapei iitanitotor ŋiŋwea ŋulu idounio ŋakile, kiitana iyes daŋ ŋakile ŋuna erae akirot ŋina ka Akuj, ikotere nai topolout ka toiunos.

³ Igiritae Nakigireta ebe, “Idaut iyes akiir arimaanut ŋina ke Ekapolon.”

⁴ Potu neni ke Ekapolon, a ŋolo erae amoru ŋina eyari, ŋina aŋerete ŋituŋa ebasi erono, nai aseunit Akuj iŋes erae ŋina epol egyelit.

⁵ Kimyekisi Akuj ikidukyo iyes ikwa ŋamoru ŋuna eyarete Akai keŋ ŋina ke etau, neni itiyaata iyes iraakasi ŋisacaradotin keŋ, ŋulu iinanakinete ŋamuronisya ŋuna eyaunit Etau, ŋuna ecamit Akuj alotooma Yesu Kristo.

⁶ Anerae ebasi Ŋakigireta ebala Akuj, “Topupokisi! Ewuak ayoŋ amoru tooma Sion, amoru ŋina itogogoŋit akai alokoona, ŋina eseunitae, ŋina epol egyelit. Iŋes ŋini enupi iŋes, nyisurumyo ŋileec.”

⁷ Epol egyelit ŋolo ka amoru a ŋin nooi aneni kus a ŋulu inupito Yesu, nai aneni a ŋulu nyenupito, ebasi Ŋakigireta, “Amoru ŋina aŋerete ŋikadukok, iŋes tokona itogogoŋit akai alokoona;”

⁸ ka daŋ “Amoru ŋin iŋes eguwanakini ŋituŋa, ataaba ŋina ibusonokini ikes.” Abu kiguki ikes, anerae awounete akinup akirot ŋina ka Akuj; arae ŋun ŋuna acamit Akuj kitiyakin neni kec.

⁹ Nai irae iyes ebuku ŋoloseuna, ŋisacaradotin ŋulurwosi, ŋituŋa ŋulu etyakaritae neni ka Akuj, ŋituŋa keŋ ka alope. Ikiseu iŋes iyes akisera ŋiticisyo ŋulu apolok nooi, ŋulu a ŋolo ikinyarau iyes anakiryonut tooma nakica keŋ, ŋina ka aumokin.

¹⁰ Koloŋ sek, pa irae iyes ŋituŋa ŋulu ka Akuj, nai tokona iruworosi ŋituŋa keŋ; koloŋ sek pa iyenete iyes akisyon ŋina ka Akuj, nai tokona iryamut akisyon keŋ.

Ŋipitesyo ŋulu ka akiyar a Ŋikristo

¹¹ Ŋikaitotoi kaŋ ŋuluminan, ekemaimai ayoŋ iyes, ŋulu irae ŋigelae ka ŋikawuotok: toŋero ekibure ŋolo a ŋawat kus ŋolo itojiye etau a ŋinapaki.

¹² Itemokino ŋipitesyo kus toruworos ŋulu ajokak alotuŋa a ŋulu nyenupito Akuj; apaki ŋina ikisitakiniata ikes iyes ebasi ŋikasecak, eyenunete ikes ŋiticisyo kus ŋulu ajokak, ido kipuro Akuj Akoloŋit ŋina ka abunore keŋ.

Tokerito ŋikepukak

¹³ Aŋuna ke Ekapolon, tokerito ŋikepukak daadaŋ: ekepukan ŋolo epolokinit ŋuluce daadaŋ,

¹⁴ ŋikapolok ŋulu eseunit ekepukan ŋol akisican ŋulu itiyaete ŋuna aronok ka akitojok ŋulu itiyaete ŋuna ajokak.

¹⁵ Anerae ecamit Akuj iyes kitiyata ŋakiro ŋuna ajokak, ikotere kisililiŋa ŋibaŋaanotin ŋulu irworosi ŋuna nyeyenete.

¹⁶ Kiboiyoto ikwa ŋituŋa ŋulu ilacakina, nai nyisitiyata alacakina kus akiwaitor aronis. Kiboiyoto ikwa ŋiketiyak ŋulu ka Akuj.

¹⁷ Tokerito ŋituŋa daadaŋ, tominas ŋikaitotoi ŋuluce, kitopoloosi Akuj ka tokerito ekepukan ŋolo epolokinit ŋuluce daadaŋ.

Akitaanyikinet ŋina a Kristo

¹⁸ Iyes ŋiketiyak, tokerito ŋikapolok kus ka kitoodikisi akerit kus daadaŋ neni kec, meere neni eya ŋulu arimaanak ka apatanak bon, nai tari neni a ŋulu adedeŋak.

¹⁹ Ikiterereŋi Akuj iyes a ŋun, erae kititinyikis aryebo ŋina nyiyookino, aŋuna iyeniata iyes acamit ŋina ka Akuj.

²⁰ Anerae anikipuro itamete iyes iryamunete, erae kikibuŋae iyes isecito? Nai kititinyikis iyes ŋican apaki ŋina itiyaata ŋuna iyookino, ikiterereŋi iyes Akuj a ŋun.

²¹ Ŋakiro nu ikes ikinyaraa iyes Akuj, anerae abu Kristo elope toryamu ŋican aŋuna kus ka itoesikinia iyes akitaanyikinet, ikotere totupyata iyes ŋikukus keŋ.

²² Nyeseca iŋes ka emam ituŋanan ipei daŋ ŋini abu kiira elimuni iŋes alyokonu.

²³ Apaki ŋina eyanyere iŋes, nyemoro iŋes idiotuŋanan, apaki ŋina esicanere iŋes, pa abu kitukuryan idiotuŋanan, nai abu inakin neni ka Akuj a ŋina etubi ŋakiro iyookino.

²⁴ Abu Kristo elope kiwok anakuwan keŋ ŋasecisya yok lomusalaba; ikotere ikipedori atwakare alokiŋaren asecit, ido oyara aŋuna ka akiyookino. Ikitaŋaleun iyes aŋuna a ŋajemei keŋ.

²⁵ Ikote koloŋ iyes ŋamesekin ŋuna apotu tooliyosi alorot, nai tokona ikinyakun iyes akiwuap Ekeyokon ka Ekedaran kus.