1 Ŋites. 5 - Ebaibul

Totenito aŋuna ka aboŋun a ŋina ke Ekapolon

¹ Ŋikaitotoi kaŋ, nyitemokino ayoŋ ekegirak iyes ŋakiro ŋuna a ŋirwa kori a ŋapakio a ŋuna itiyakinotor ŋakiro ŋun.

² Anerae iyenete iyes ŋilopeyek ejok nooi atemar ebuni Akoloŋit ŋina ke Ekapolon ikoni neni ebunio ekokolan nakwaare.

³ Erae apaki ŋina etemaryata ŋituŋa ebe, “Eyai ekisil ka emam awasya,” iŋes atipei eŋesunor akinyasuno neni kec! Eŋesun iŋes lopite ŋolo eŋesunor aryebo neni ka aberu a ŋina eapi akidoun, ka emam ŋituŋa ebucarosi.

⁴ Nai ŋikaitotoi, nyiyakasi iyes nakiryonut, aŋun nyikiŋesari iyes Akoloŋit ŋin ikwa ekokolan.

⁵ Anerae irae iyes daadaŋ ŋituŋa ŋulu ka akica ka ŋulu ka apaaran; meere iwon ŋituŋa ŋulu ka akuwar kori ŋulu ka akiryonut.

⁶ Aŋun nai, nyitemokino iwon ikijotoe ikwa ŋuluce, nai itemokino iwon ikikienyi ka ikiyeni ŋuna kitiyakina ikwa ŋituŋa ŋulu nyemerasi.

⁷ Ŋulu ejotoete, ejotoete nakwaare ka erae nakwaare emeranakinotor ŋikamerak.

⁸ Nai ikirae iwon ŋulu ka apaaran, ido itemokino iwon ikikwaan ka ŋituŋa ŋulu nyemerasi, ŋulu eyenete ŋuna itiyaete. Onapa anupit ka amina ikwa arapet ka akigeno ŋina ka aiuno yok ikwa akopiya ŋina iuryarit akou nyewana.

⁹ Pa ikiseuni iwon Akuj aryamun ŋican ŋulu ka anyunyura keŋ, nai aryamun aiuno alotooma Ekapolon yok Yesu Kristo.

¹⁰ Abu iŋes totwan aŋuna yok, ikotere nai kikiyari kori kikitwakit apaki ŋina eboŋunio iŋes, eboiyoto ka iŋes.

¹¹ Aŋun, kisimukekinos ka kiŋaranakinos make, ikwaŋina tokona itiyaata iyes.

Ŋakiro ŋuna esidyok ka ŋimalasyo

¹² Ŋikaitotoi, ikimaimai isua iyes tokerito alokidiŋ kus ŋituŋa ŋulu itiyaete nooi alokidiŋ kus, ŋulu ikipukato iyes alotooma Ekapolon, ŋulu ikitatamete iyes ŋipitesyo ŋulu ka akiyar a Ŋikristo.

¹³ Tokerito ikes nooi anamina aŋuna ke etic a ŋolo itiyaete ikes. Kisilito iyes make.

¹⁴ Ikimaimai isua iyes ŋikaitotoi, kisirworiut ŋituŋa ŋulu ekalanyaka, kisimukekisi ŋulu ekuryaka, kiŋarakisi ŋulu epalag, todaŋa ŋituŋa daadaŋ.

¹⁵ Nyitemokino iyes itacakinete aronis kan aronis, nai ŋarwa daadaŋ kikatakisi akitiya ŋuna ajokak alokidiŋ kus make ka alotuŋa a daadaŋ.

¹⁶ Tolelyanete jwi jwi;

¹⁷ kilipeneneete jwi jwi,

¹⁸ tolakanaros neni ka Akuj anakiro a daadaŋ; anerae erae ŋun ŋuna ecamit Akuj aneni kus alotooma Yesu Kristo.

¹⁹ Nyiretakis Etau ŋolo Asegan;

²⁰ nyijamuwanarete ŋakiro ŋuna edwaritae.

²¹ Torota ŋinibore daadaŋ: kiwuapa ŋuna ajokak,

²² toŋero ŋuna aronok daadaŋ.

²³ Ikimaimai Akuj ŋina erae alope ekisil ikituruwo iyes ŋulu ikwaan ka iŋes alopitesyo a daadaŋ ka ikiyokite iyes daadaŋ alotai, anakiyar ka anawat tomam ŋakiro ŋuna aronok jik akitodol Akoloŋit ŋina eboŋunio Ekapolon yok Yesu Kristo.

²⁴ Iŋes ŋolo ikinyarit iyes, erae ŋolo ikinyoma; itiyakini iŋes ŋuna adau akiikin.

²⁵ Ŋikaitotoi, kilipakinitetei isua daŋ.

²⁶ Kimalata ŋikaitotoi daadaŋ itunasi make itoodiunito atemar iminin.

²⁷ Ekeŋitakinit ayoŋ iyes alokiro ke Ekapolon asyomakin abaruwa na neni a ŋikaitotoi daadaŋ.

²⁸ Toyai neni kus ajokis ŋina ke Ekapolon yok Yesu Kristo.