1 Ŋites. 3 - Ebaibul

¹ Ekaku jik, pa ikipedorit isua akidaŋidaŋakin. Aŋun, aponi isua totyakunae akiboi make alo Asen,

² aponi isua kiyakuunae Timoteo lokaato yok ŋolo ikitiyae ka isua aŋuna ka Akuj alotooma alimonokin Ŋakiro ŋuna Ajokak ŋuna a Kristo. Aponi isua kiyakuunae iŋes akitogogoŋ ka akisimukekin iyes ananupit kus,

³ ikotere nai nyejamak idio alokidiŋ kus anupit keŋ aŋuna a ŋakisicaneta a ŋun. Iyenete iyes ŋilopeyek atemar erae ŋican ŋul ŋulu acamaki Akuj atemar kitiyakinos neni yok.

⁴ Anerae, ani eriŋa isua ikirukit ka iyes, aponi isua itolimokin iyes eriŋa apaki atemar ikilosi iwon aryamun ŋican; erae kire ŋunapei ŋun apotu totakanut ikwaŋinapei iyeniata iyes.

⁵ Aŋakiro a ŋun, pa apedorit ayoŋ akidaŋidaŋakin jik; ido abu eyaku Timoteo, ikotere oyenunia epite ŋolo eyakar anupit kus, anerae akuryanit ayoŋ atemar acepaki kedau Satan eketemon akitem iyes ka aruwor etic kosi ekoŋinait!

⁶ Nai tokona, aboŋu Timoteo aneni kus, ikilimok iŋes isua ŋakiro ŋuna ka alakara ŋuna ka anupit ka ŋuna ka amina kus. Ikilimok iŋes isua atemar ikitamunito iyes isua jwi jwi ka alakara; nabo ikiburakinit iyes aanyun ka isua lopite ŋolopei ikiburakinitor isua daŋ aanyun ka iyes.

⁷ Aŋakiro a ŋun ŋikaitotoi, abu epite ŋolo inupitotor iyes ikisimukek isua anatyokisyo ka alocan kosi.

⁸ Ikiyari kire tokona isua, anerae igogoŋ iyes anakimorikina kus ke Ekapolon.

⁹ Epol nooi alakara kosi neni ka Akuj yok aŋuna ka alelyan a ŋina ikiyakar isua alokiŋaren keŋ aŋuna kus.

¹⁰ Apaaran ka akuwar, ikiŋisit isua Akuj ka agogoŋu itocamak isua oanyunos ka iyes ka ikiyataki iyes ŋuna daadaŋ iitanito ananupit kus.

¹¹ Ikilipi Akuj Papa elope ka Ekapolon yok Yesu, kitemonok erot aŋuna kosi, ikotere todolunoe isua neni kus!

¹² Nai aŋuna kus, ikilipit isua Ekapolon atemar kiyatak amina kus ŋina imininia iyes make ka ŋina iminatar iyes ŋituŋa daadaŋ, tolalaar iŋes kikok ŋina ikiyakar isua aŋuna kus.

¹³ Alopite a ŋol, ikitogogoŋi iŋes iyes ka iruworosi iyes ŋulu iyookino ka ŋulu asegak alokiŋaren Akuj Papa yok, apaki ŋina etakanuniata Ekapolon Yesu kaapei ka ŋulu erae ŋulu keŋ.