1 Ŋites. 2 - Ebaibul

Etic a Paulo alo Tesalonika

¹ Ŋikaitotoi, iyenete iyes ŋilopeyek atemar abu aponare kosi aanyun iyes nyeruwor akoŋinait.

² Iyenete iyes epite ŋolo aponere ikiteryamunere isua ŋican ka itobolyare alo Pilipi. Kikote neni daŋ, abu Akuj yok ikiinak isua atitinyu ŋina limonokinet iyes Ŋakiro ŋuna Ajokak ŋuna eponito aneni keŋ, tari ŋina atyonio nooi etic kosi.

³ Apaki ŋina ekatakinitere isua akitacamun iyes Ŋakiro ŋuna Ajokak, pa adyakaritae isua, kori pa erworoe ŋakiro ŋuna ka asiilyo ka daŋ pa arae ŋuna modikinet idiotuŋanan.

⁴ Nai akilo, erae ŋuna ikirworo isua jwi jwi ŋuna ecamit Akuj isua kirworoe, anerae adau iŋes aryamun isua ikirae ŋulu emaikina ikicikakin Ŋakiro ŋuna Ajokak. Aŋun, nyikirworo isua aŋuna ka akitalakar ŋituŋa, nai akitalakar Akuj ŋina eyeni ŋuna eya lotai kosi.

⁵ Anerae iyenete iyes kire atemar, nyirworo isua ŋakiro ŋuna ka akirapirap iyes ka nyelimonokina isua Ŋakiro ŋuna Ajokak aŋuna ka aryamunia idiobore aneni kus--Akuj iŋes erae esuuda kosi!

⁶ Pa ewaritae isua arwonu alotuŋa, kerae aneni kus kori anituŋanan a idio.

⁷ Ikwapei ikiraakar isua Ŋikiyakia a Kristo, kepedoritae akisiyaloloŋ iyes aŋuna ka aryamun akiŋarakinet adio aneni kus. Nai ikiyapara isua apaki ŋina ikirukitor iwon; ikikoni isua aberu iricit ŋidwe keŋ.

⁸ Aponi isua ikiminakin iyes nooi, ido aponi toryamunae alakara, meere ŋinamoret Ŋakiro ŋuna Ajokak bon ka iyes, nai tari akiyar kosi a ŋilopeyek; anerae ipotu iyes toruworos ŋuluminan kosi.

⁹ Anerae ŋikaitotoi, itamunito iyes epite ŋolo etiyaere isua ka agogoŋu nooi akuwar ka apaaran, ikotere nyikisiyaloloŋ isua iyes alotooma apaki ŋina ikilimonokinia isua iyes Ŋakiro ŋuna Ajokak ŋuna ka Akuj.

¹⁰ Iraakasi iyes ŋisuudae kosi, Akuj daŋ erae, iŋes atemar arae ŋipitesyo kosi ŋulu ajokak nooi, ŋulu eyookino ka ŋulu amam adyakaret adio aneni kus a ŋulu inupito.

¹¹ Iyenete iyes epite ŋolo eŋarakinitere isua ŋinituŋanan alokidiŋ kus ikwa iŋarakinitor papa ŋidwe keŋ.

¹² Aponi isua ikisimukekin iyes, ikimaimae ka aponi torubakinae ikitumunikinitoe iyes akiboi anakiyar a ŋina itopoloorit Akuj, ŋina ikinyarit iyes Napukan ka napolou keŋ.

¹³ Ikilakanar nabo isua jwi jwi neni ka Akuj, anerae ŋina iponiata iyes kiiraryata ŋakiro ŋuna ka Akuj aneni kosi, ipotu iyes tocamut pa erae ŋakiro ŋuna a ituŋanan, nai erae ŋuna ka Akuj ka erae kire ŋakiro keŋ ŋuna tokona itiyaete alotooma kus a ŋulu inupito.

¹⁴ Ŋikaitotoi, ikitakanikis iyes daŋ ŋunapei apotu totakanut neni a ŋatukon a Ŋikristo a ŋulu ka Akuj a ŋulu alo Yudaya, neni a ŋituŋa a ŋulu erae ŋulu a Yesu Kristo. Ipotu iyes daŋ toryamut ŋican alotuŋa a ŋulu erae ŋulu ka akwap kus, lopite ŋolopei aponiata ikes toryamuniata ŋican aneni a ŋituŋa kec a ŋulu erae Ŋiyudayan.

¹⁵ Ikes apotu toara Ekapolon Yesu ka ŋikadwarak daŋ; nabo apotu ikisican isua. Nyitalakarito ikes Akuj, itidiŋito ikes ŋituŋa daadaŋ nooi.

¹⁶ Apotu ikes kikatakis tari akiretakin isua alimonokin ŋituŋa ŋulu nyerae Ŋiyudayan ŋakiro ŋuna eryamuniata ikes aiuno. Alopite a ŋol, apotu ŋasecisya kec kilelebikinos. Nai tokona adolu anyunyura ŋina ka Akuj neni kec.

Kiitan Paulo alosit aanyun ka ikes nabo

¹⁷ Nai ŋikaitotoi, apaki ŋina ikiesikinere isua iyes adiouriyen--nai meere anatameta kosi--aponi isua ikiitun iyes nooi, kiwarae epite ŋolo ikianyunor ka iyes nabo!

¹⁸ Aŋuna acamitere isua aboŋun neni kus, abu ayoŋ Paulo elope ekatak abunore ŋapakio ŋuna alalak, nai abu Satan ikisipiyo isua.

¹⁹ Anerae iyes iraakasi akigeno kosi, alelyan ka ŋakiro ŋuna ikituror isua alotooma akiloun alokiŋaren Ekapolon yok Yesu, apaki ŋina eboŋunio iŋes.

²⁰ Kire, irae iyes akituro ka alelyan kosi!