1 Ŋirw. 8 - Ebaibul

Yaunae Kai ka Akuj Asaduku ŋina ka Acamunet

¹ Ekaku nai a ŋun, tonyarau Solomon ŋikasikou ka ŋikarikok a ŋikabilae a Ŋisirael daadaŋ ta ŋatekerin a Ŋisirael, potu ŋul neni a erwosit Solomon a ŋolo ayai Yerusalem, ikotere yaut kiŋa alo Sion alotaun a Daudi, Asaduku ŋina ka Acamunet ke Ekapolon.

² Tocunun ŋikilyok daadaŋ alo Isirael neni a erwosit Solomon apaki ŋina a ŋasuban a ŋuna a elap a ŋolo a ŋikanikaarei, a ŋolo enyaritae Esanim.

³ Ani kedaut ŋikasikou a Ŋisirael daadaŋ acunun todakasi ŋisacaradotin Asaduku,

⁴ ido yaa Asaduku ŋin ŋina ka Acamunet ke Ekapolon; kitipeiyoryata edakito kaapei ke Eema ŋolo elipyata ikes, yaasi ikes ŋiboro daadaŋ ŋulu ke etal ŋulu aya tooma Eema ŋol. Arae ŋisacaradotin ka ŋilepi etipeiyoryata ŋiboro ŋul daadaŋ.

⁵ Apaki ŋin, abu erwosit Solomon ka atukot a Ŋisirael daadaŋ ŋina aris kecunakin neni keŋ towua alokiŋaren Asaduku, toara erae ŋamuronisya ŋamesekin ŋuna alalak ŋuna pa emarun ka ŋimoŋin ŋulu alalak ŋulu pa emarun.

⁶ Ani irikakin todakasi ŋisacaradotin Asaduku ŋina ka Acamunet ke Ekapolon nakibois ŋina amaikina kiwuakinae alo Kai ka Akuj, nakibois ŋina Asegan nooi; kiwuakis kwap neni arounito ŋabebenuk a Ŋikerubim.

⁷ Apetarito Ŋikerubim ŋabebenuk kec alokidiama akibois ŋina ewuakinitae Asaduku, aŋun, arapuwarito Ŋikerubim kidiama Asaduku ka ŋipirin ŋulu awuar Asaduku.

⁸ Aoyak ŋipirin ŋul nooi, atakanete ŋakyes kec anakibois a ŋina Asegan nooi iyai kiŋaren akibois ŋina ayai kidiŋ Akai ka Akuj, nai pa atakanete iyai kiŋa akibois ŋina Asegan nooi; eyakasi ŋipirin ŋul nen tari tokona.

⁹ Mam ibore ice ayai tooma Asaduku, ŋamoru ŋunaarei bon ŋunadapal ŋuna egiritae ŋakiciketa ŋuna kiwuakini Moses nen alomoru a ŋolo enyaritae Oreb (iŋes Sinai), neni kebunio Ekapolon tocamunotor ka Ŋisirael kedaut alomun anakwap a Ijipit.

¹⁰ Ani elomunete ŋisacaradotin anakibois a ŋina asegan nooi, toburusiya edou Akai ke Ekapolon,

¹¹ nyepedosi ŋisacaradotin akitiya ŋiticisyo kec a nen, anerae abu edou toburusiya nen, kilelebikin akica ŋina akwaŋan kya ŋina ke Ekapolon Kai ke Ekapolon.

¹² Tema nai Solomon, “Edaunit sek Ekapolon alimor atemar eboiyenene iŋes alodou a ŋolo nyecai.

¹³ Adau tokona ayoŋ adukokin iyoŋ Akai nooi ŋina ailiilon, akibois ŋina iboiyeneneo iyoŋ ŋikaru ka ŋikaru.”

Erwor a Solomon

¹⁴ Kiŋoliya nai erwosit lowae ŋolo aya ŋituŋa, kiterereŋ iŋes ŋituŋa a Isirael daadaŋ; apaki ŋin, awuasi ŋituŋa daadaŋ.

¹⁵ Tema erwosit, “Kipuroe Ekapolon, Akuj a Ŋisirael, ŋina esiyook anapedor keŋ ŋuna abu kiik neni a papa kaŋ a Daudi ebala,

¹⁶ ‘Ameun akoloŋit ŋina ayaunia ayoŋ ŋituŋa kaŋ Ŋisirael anakwap a Ijipit, mam etaun edio ŋolo aseu ayoŋ alokabila ke edio a ŋolo a Ŋisirael, ŋolo emaikina todukokinae Akai ikotere ekiro kaŋ eyakaun nen; nai abu ayoŋ oseu Daudi akipuka ŋituŋa kaŋ Ŋisirael.’

¹⁷ Ericit papa kaŋ Daudi alotau keŋ ŋakiro ŋuna ka adukokin Akai aŋuna a ekiro ke Ekapolon, Akuj ŋina a Ŋisirael.

¹⁸ Nai abu Ekapolon tema neni a papa kaŋ a Daudi, ‘Aŋuna eyakatar ŋakiro nu lotau kon, ŋakiro ŋuna ka adukokin Akai a ŋuna a ekiro kaŋ, ibu iyoŋ kitiya ejok anakiwuakin ŋakiro ŋun lotau kon.

¹⁹ Kikote neni daŋ, meere iyoŋ iduki Akai ka Akuj, nai lokoku kon, ŋolo erae iyoŋ iuruuni, iŋes eduki Akai aŋuna a ekiro kaŋ.’

²⁰ Esiyook tokona Ekapolon ŋakiro ŋuna abu kiik; anerae elunyokin tokona ayoŋ napukan a papa kaŋ a Daudi, eboikin lokicoloŋ ŋolokipukaet Ŋisirael, lopite ŋolo eikinitor Ekapolon, ido adau ayoŋ adukun Akai aŋuna a ekiro ke Ekapolon Akuj ŋina a Ŋisirael.

²¹ Ewuak ayoŋ Kai ŋin akibois aŋuna ka Asaduku a ŋina erae tooma keŋ eyai Acamunet ke Ekapolon ŋina acamunotor iŋes ka atapapaa kaŋ apaki ŋina ayaunia iŋes ikes anakwap a Ijipit.”

Akilip a Solomon ŋina etaleorya Akai ka Akuj

²² Towo nai Solomon alokiŋaren Namuroet ŋina ke Ekapolon iteete ŋituŋa a Isirael daadaŋ, kikyaa ŋakan keŋ topeta.

²³ Kilip tema, “Okoe Ekapolon, Akuj a Ŋisirael, mam Akuj ŋina ikwaan ka iyoŋ anakuj, kori anakwap, ŋina iricit Acamunet ka amina ŋina nyiryaŋiryaŋa aŋuna a ŋiketiyak kon a ŋulu erubakinito iwuapito erot kon a ŋitai kec a daadaŋ.

²⁴ Idau iyoŋ akisiyookin akiikinet kon neni a eketiyan kon a Daudi a papa kaŋ; ibu iyoŋ Akuj tolimu akiikinet ŋin ka isiyook iyoŋ ŋun anapedor kon, lopite ŋolo eyakatar nakoloŋit na.

²⁵ Aŋun nai, okoe Ekapolon Akuj a Ŋisirael, kisiyook aŋuna a eketiyan kon a Daudi a papa kaŋ ŋuna ibu iyoŋ kiik iŋes ibala, ‘Mam nyikipiyori iyoŋ aryamun ituŋanan aneni kaŋ ŋini ilunyokin lokicoloŋ kipuka ŋituŋa a Isirael; erae ca kerae ŋidwe kon ŋulusapa ŋulu ecoikinito daadaŋ ŋuna itiyaete, ŋulu iwuapito ŋakiro kaŋ lopite ŋolo ibunio iyoŋ kitiyaa.’

²⁶ Aŋun nai, okoe Akuj a Ŋisirael, kimyek akirot kon kiyookin, akirot kon ŋina ibu iyoŋ kiik eketiyan kon papa kaŋ Daudi.

²⁷ “Nai ipedori mono kire iyoŋ Akuj akiboi alokwap ka ŋituŋa a? Ŋina nyelolomya tari nakuj daadaŋ akiboiyo iyoŋ, ikokini nai Akai ka Akuj ŋina aduku ayoŋ epedori akitemokin iyoŋ akiboiyo ai?

²⁸ Kiira akilip a eketiyan kon ka adyekitoi keŋ, okoe Ekapolon Akuj kaŋ! Kiira akigworo ka akilip ŋina ilipar eketiyan kon alokiŋaren kon nakoloŋit na.

²⁹ Elipi kite iyoŋ Akai na nakwaare ka naparan, kite akibois na ŋina ibu iyoŋ tolimu a ŋuna keŋ ebe, ‘Neni eyakaun ekiro kaŋ ne,’ ikotere nai iirari iyoŋ eketiyan kon ilipi neni kon iŋoliunit nakibois na.

³⁰ Kiira adyekitoi a eketiyan kon ka ŋina a ŋituŋa kon a Ŋisirael apaki ŋina ilipyata iŋoliunito nakibois na. Okoe kiirarae isua anakuj aneni iboiyo iyoŋ topupok, ido ikisyon.

³¹ “Ani kesec ituŋanan idio neni a ekidunyet keŋ, ido inakinae akikoŋet adio kikoŋ, bu kikoŋ alokiŋaren Namuroet kon alo Kai a na,

³² ekelipit kiira iŋes anakuj, kitiya neni keŋ ŋuna iyookino aneni kon, totubok ŋiketiyak kon, kisileereu ŋini esecit, kisican iŋes aŋuna itiyat. Ekelipit kisileereu ŋulu iyookino erae ŋulu iyookino, torop ikes alotooma akiyookino kec.

³³ “Apaki daadaŋ ŋina ereuniata ŋimoe kec ŋituŋa kon Ŋisirael aŋuna aseciata neni kon, ido toboboŋut ŋituŋ kon neni kon, kiŋita akisyonio alokiro kon ilipete ka edyakanarosi neni kon alo Kai a na,

³⁴ ekelipit kiira anakuj, ido kisyoni asecit a ŋituŋa kon a Ŋisirael, kinyaku ikes nakwap ŋina ibu iyoŋ inak neni atapapaa kec.

³⁵ “Apaki daadaŋ ŋina egolokinor nakuj, ido nyilim akiru aŋuna aseciata ikes aneni kon, ido nai kilipa ikes iŋoliunito nakibois na, ikoŋete enyarito ekiro kon, tokiwa asecit aŋuna isicania iyoŋ ikes,

³⁶ ekelipit kiira anakuj, ido kisyoni asecit a ŋiketiyak kon, a ŋituŋa kon a Ŋisirael. Kitatam ikes ŋipitesyo ŋulu ajokak ŋulu emaikina ikes kiwuapa; kiyakik akiru nakwap kec ŋina idau iyoŋ ainakin neni a ŋituŋa kon ikwapei akwap ŋina eruwor ŋina kec.

³⁷ “Ani keyakaun eron nakwap, kori edeke, kori kerem ŋimanikorin, kori kelemun ŋituŋa, kori kebu emaase, kori ekutelek, kori ani kiritasi ŋimoe ikes alotaun kec idio, kori ŋulucan ca daadaŋ epote neni kec kerae edeke daŋ,

³⁸ kiira akilip kec. Ani kilip idio a ŋituŋa kon a ŋisirael, toyenete ca ikes alotai kec ŋican ŋulu eyakatar, kikyaa ŋakan keŋ iŋoliyarit lowae ŋolo eyai Akai na;

³⁹ ekelipit kiira anakuj aneni erae akibois ŋina iboiyo iyoŋ, ekelipit kisyoni, kiŋarak; kitiya neni a ŋinituŋanan lopite ŋolo itiyaa iŋes, ikwapei iyenia iyoŋ ŋuna eya lotau a ŋinituŋanan, (anerae iyoŋ bon iyeni ŋitai a ŋituŋa a daadaŋ).

⁴⁰ Aŋun nai, ikitopoloorete ikes iyoŋ ŋirwa daadaŋ ŋulu iboiyoto ikes anakwap a ŋina ibu iyoŋ inak atapapaa kosi.

⁴¹ “Ikwaŋinapei, ani keyai ituŋanan ŋinigelaanot daŋ ŋini nyerae ipei a ŋituŋa kon a Ŋisirael, a ŋini ebunit a ŋuna a ekiro kon anakwap ka ace a ŋina alwanan,

⁴² anerae iirarete ŋituŋa ekiro kon ŋolo epol nooi ka ŋiticisyo ŋulu itiya iyoŋ ŋulu ka aumokin ka ŋuna ka apedor kon a ŋina itenitor akiŋarakin, ani ebuni igelaanot ŋin akilip iŋoliunit Kai na,

⁴³ ekelipit kiira anakuj aneni erae akibois ŋina iboiyo iyoŋ, ido kitiya lopite daadaŋ ŋolo ikinyaritor iyoŋ igelaanot ŋin, ikotere ŋituŋa daadaŋ anakwap eyenunete ekiro kon ka ikikerete iyoŋ, lopite ŋolo ikikeritotor ŋituŋa kon Ŋisirael. Ŋakiro ŋun nai ikes iteyenikinete ŋituŋa atemar adaun akituruwor Akai na ŋina adau ayoŋ akiduk ŋinakilipet neni kon.

⁴⁴ “Ani kelomasi ŋituŋa kon kiŋa akitijiore ŋimoe kec, a lopite a daadaŋ a ŋolo iyakiyarya iyoŋ ikes, ido kilipa ikes neni ke Ekapolon iŋoliunito lotaun ŋolo idau iyoŋ aseun ka Kai na ŋina adau ayoŋ akiduk aŋuna ka akilipya neni kon,

⁴⁵ ekelipit kiira anakuj akilip kec ka adyekitoi kec, ido, kiŋarak ikes anatyonis a ŋin,

⁴⁶ “Ani keseca ikes neni kon, anerae mam ŋini nyesecenene, ido toŋoik iyoŋ ikes, kipotok lomoe kec ikotere erikorete ŋimoe ikes nakwap a ŋimoe a ŋul erae ŋikikamara alojie, yaarae ikes neni elwana, kori neni eapi;

⁴⁷ ani nai ketamut ikes anakwap a ŋina erikoryo ŋuna kepotu kitiyata, ido tokiwa, todyekanaros neni kon anakwap a ŋulu erikorete ikes, temasi ‘Ikisec isua ka ikitiya ŋuna nyiyookino; ikitiya isua ŋuna a ŋileec;’

⁴⁸ ani kekiwa ikes alotai kec a daadaŋ ka anakiyar kec a daadaŋ anakwap a ŋina a ŋimoe kec a ŋulu arikorete ikes erae ŋikikamara alojie, ido kilipa ikes neni kon iŋoliunito nakwap kec ŋina ibu iyoŋ inak atapapaa kec ka lotaun ŋolo idau iyoŋ aseun ta Akai ŋina adau ayoŋ akiduk aŋuna ka akilipya neni kon;

⁴⁹ ekelipit kiira anakuj aneni erae akibois ŋina iboiyo iyoŋ, akilip ka adyekitoi kec, ido kiŋarak ikes anatyonis a ŋin.

⁵⁰ Kisyoni ŋituŋa kon ŋulu adaut akisec aneni kon, kisyoni ŋadyakanareta kec ŋuna etiyata ikes neni kon, ido inak ikes akisyon alokiŋaren ŋulu ikamarito ikes, ikotere isyoniyete ŋul ikes,

⁵¹ (anerae erae ikes ŋituŋa kon a elope, ŋulu idau iyoŋ ayaun alo Ijipit, anakwap a ŋina atiŋitere ikes ka aryenyeo.)

⁵² Kiira adyekitoi a eketiyan kon ka adyekitoi a ŋituŋa kon a Ŋisirael, kiira ikes apaki daadaŋ ŋina ikinyaraata ikes iyoŋ,

⁵³ anerae iseta iyoŋ ikes a lotuŋa a daadaŋ a ŋulu a ŋakwapin, aruwor ŋituŋa kon a alope, ikwapei iikinitor iyoŋ ikes aneni a Moses a aketiyan kon, apaki ŋina iyaunia iyoŋ atapapaa kosi alo Ijipit.”

Kiterereŋ Solomon atukot

⁵⁴ Ani irikakini Solomon akilip keŋ daadaŋ ka adyekitoi keŋ neni ke Ekapolon, tonyou aneni eŋoliyaritor Namuroet ŋina ke Ekapolon, aneni sek aryedikio iŋes ikyaarit ŋakan kidiama nakuj.

⁵⁵ Towo iŋes kiterereŋ atukot a Ŋisirael daadaŋ ikeunit etoil keŋ ebala,

⁵⁶ “Kipuroe ŋolo ayau akieŋun neni a ŋituŋa a Isirael alopite a daadaŋ a ŋolo abunio iŋes kiikinia ikes, mam akirot apei daŋ ŋina a Moses a eketiyan keŋ.

⁵⁷ Toyai Ekapolon Akuj yok kaapei ka iwon, ikwapei arukitotor kaapei ka atapapaa yok; elipit nyikimyek iŋes iwon, kori nyikŋer iŋes iwon.

⁵⁸ Elipit kituruwo iŋes ŋitai yok ŋulu ecamito iŋes, kiwuapa ŋuna ebala iŋes daadaŋ ka kiwuapa ŋakiciketa keŋ, ŋikisila keŋ ka ŋuna etubunit iŋes ŋakiro ŋun daadaŋ ŋuna abu iŋes kicik atapapaa yok.

⁵⁹ Elipit ŋakiro kaŋ nu ŋuna adyekanaror ayoŋ alokiŋaren Ekapolon nu totamunite Ekapolon Akuj yok naparan ka nakwaare, elipit kiŋarak Ekapolon eketiyan keŋ ka ŋituŋa keŋ Ŋisirael anakiitanit kec a ŋina a ŋinakoloŋit;

⁶⁰ ikotere nai ŋituŋa ka akwap a daadaŋ eyenunete atemar erae Ekapolon Akuj; mam Akuj ace.

⁶¹ Aŋun, inakinos nooi neni ke Ekapolon Akuj yok, kiwuapa ŋikisila keŋ ka kirica ŋakiciketa keŋ, lopite ŋolo iwuapyata nakoloŋit na.”

Inak Solomon Akuj ŋamuronisya

⁶² Tosodo nai erwosit ka Ŋisirael daadaŋ tolemut ŋamuronisya inakis Ekapolon.

⁶³ Inak Solomon ŋamuronisya nu ŋuna ke ekisil neni a Ekapolon: Ŋimoŋin ŋalipyo ŋatomoniarei ka ŋiarei ka ŋamesekin ŋalipyo amiat ka ŋatomoniarei. Aŋun, apotu erwosit ka ŋituŋa a Isirael daadaŋ kitaleikis Akai neni ke Ekapolon.

⁶⁴ Akoloŋit ŋinapei, abu erwosit kitaleiyo kidiŋ a alapatu a ŋina ayai kiŋaren Akai ke Ekapolon, ido abu inak a nen Ekapolon ŋainakineta ŋuna apeyo, ŋainakineta ŋuna a ŋamuja ka ŋainakineta ŋuna ke ekisil ŋuna arae ŋasepwa etiyae iŋes ŋun a nen, anerae adidiŋ Namuroet ŋina etiyaunitae a eburonis ŋina ayai kiŋaren neni ayai Asaduku ŋina ka Acamunet, etiyae iŋes ŋun a nen, anerae adidiŋ Namuroet ŋina etiyaunitae a eburonis ŋina sek keris iŋes kitiyau, pa apedorito ŋainakineta nu apenare nen: ŋainakineta ŋuna epeyo, ŋainakineta ŋuna a ŋikinyom ka ŋainakineta ŋuna ke ekisil ŋuna arae ŋasepwa.

⁶⁵ Abu Solomon kitiya ŋasuban ŋun apaki ŋin ka abu atukot a Ŋisirael daadaŋ, ŋituŋa ameun aneni alomarere Amas tari nayonae ŋina alo Ijipit, kitiyata ŋasuban ŋun alokiŋaren Ekapolon Akuj yok. Yaasi ikes ŋirwa ŋikanikaarei, ido kiyatakis ŋirwa ŋice ŋikanikaarei, toruwor ŋirwa daadaŋ ŋitomon ka ŋiomwon.

⁶⁶ Ani epete ŋirwa ŋitomon ka ŋikan, tolimok Solomon ŋituŋa kielaros toloto. Kiterereŋo ŋituŋa erwosit, ido toloto lorerya elelyanete ka elakara alotai kec aŋuna ajokak a daadaŋ a ŋuna etiya Ekapolon neni a Daudi a eketiyan keŋ ka neni a Ŋisirael a ŋituŋa keŋ.