1 Ŋirw. 7 - Ebaibul

Akai a apukan neni epukator Solomon ka ŋaduketa ŋunace

¹ Abu Solomon toduk akai keŋ a elope ŋikaru ŋitomon ka ŋiuni kiridak.

² Todukok Solomon akai a apukan a ŋakito a ŋuna a Cedar a ŋuna a Lebanon. Arae aoyau ka akai a ŋin alosepyon ŋimitae ŋatomoniomwon a ŋikanikapei, kiŋaren ka ewae ŋolo iteotor, arae ŋimitae ŋatomoniarei a ŋiuni, ido ameun alokwap tari kidiama arae ŋimitae ŋitomon a ŋiuni ka atutubet. Ayakasi kai ŋin ŋilaino ŋiomwon ŋulu a ŋipirin a Cedar. a ŋololain, ayakasi ŋipirin ŋitomon ka ŋikan, kikacitetei lopirin a Cedar.

³ Erapirapitae kidiama a ŋakito a Cedar a ŋuna edokonokinitoe nakito ŋatomoniomwon ka ŋakan ŋuna ekacakina lopirin ŋulu aya nawaetin a akai, ŋulu arae ŋitomon ka ŋikan a ŋololain.

⁴ Arekinitae ŋidirisae ŋilaino ŋiuni amiar kidiama, kiteos ŋolodirisa ka ŋoloce alosyep a ŋoloce ka a ŋololain.

⁵ Ayakasi lopukei ka lodirisae ŋakito ŋuna aya ŋiwaetin ŋiomwon ŋulu ariyan alowaetin a ŋulu eteosi ka eteosi ŋilaino a ŋidirisae a ŋulu aya narwatatain.

⁶ Todukok Solomon akai ŋina arae ŋipirin bon awuar, arae aoyau a akai a ŋin alosepyon ŋimitae ŋatomoniarei a ŋiarei ka kiŋaren ka neni iteotor, arae ŋimitae ŋitomon a ŋiuni ka atutubet. Ayai kiŋaren akai ŋin ebarasan ŋolo arae ŋipirin bon awuar alokiŋaren, ŋolo etolimikinit kiŋaren Akai.

⁷ Todukok Solomon kai ŋina arae ŋipirin bon awuar akibois ŋina atubeneneo iŋes ŋakiro, anyaritae nen Agule ŋina etubere ŋakiro. Apesitae ŋakito a Cedar kwap nen daadaŋ.

⁸ Todukok iŋes akai keŋ a elope ikwaan ka ŋaduketa ŋunace. Adukitoe akai ŋin kaku akibois ŋina atubere ŋakiro. Todukok daŋ iŋes aberu keŋ nakoku a Parao akai ŋina ekwaan ka ŋina keŋ.

⁹ Adukitoe ŋakais ŋun daadaŋ ka akibois ŋina atubere ŋakiro a ŋamoru a ŋuna agogoŋ nooi ameun anakisyakinet arwatata tari nakisalet arwatata alokidiama, atubutubutoe ŋamoru a erigi ipimitae ejok tooma ka kiŋa kec.

¹⁰ Adukunitoe ŋakais ŋun alokwap; anamoru a ŋuna aburok a ŋuna agogoŋ nooi. Arae aoyau a ŋamoru a ŋun a ŋace ŋimitae ŋiomwon ŋace arae ŋimitae ŋiuni.

¹¹ Kidiama ŋamoru ŋun adukokinitae ŋamoru ŋuna agogoŋ nooi ŋuna atubutubutoe ipimitae ejok ka adukokinitae kidiama ŋamoru ŋun ŋakito a Cedar.

¹² Awuaunit arwatata ŋina adukitoe a ŋamoru alapatu ŋina apolon ŋina alokidiŋ akai. Ameun alokwap tari kidiama arwatata a ŋin, ayakasi ŋamoru ŋauni, ido min akitoe ŋina a Cedar. Epite ŋol adukitere tari alapatu ŋina alokidiŋ Akai ke Ekapolon kaapei ka ebarasan keŋ.

Iram ŋolo etiyae ŋiboro a ŋasuwa a eburonis

¹³ Tonyarau Solomon Iram alo Tiro, ido kijau iŋes.

¹⁴ Arae Iram lokoku ka apuserut a ŋina alokabila a Naputali, arae sek papa keŋ ŋolo alo Tiro, arae iŋes eketiyan ŋiboro a ŋasuwa a ŋuna a eburonis. Ayeni Iram nooi epite ŋolokitiyaet ka aos, ayeni akitiya ŋiboro a ŋasuwa a ŋuna a eburonis. Abu Iram bu neni a Solomon kitiya etic ŋolo amaikina iŋes kitiya daadaŋ.

¹⁵ Todupak Iram ŋipirin ŋiarei ŋulu a eburonis, arae aoyau a ŋolopir ŋimitae ŋikanikauni, ido aburis a ŋolopir arae ŋimitae ŋikan,

¹⁶ abu daŋ iŋes kitiyau ŋakyes a ŋipirin ŋaarei a eburonis, arae aoyau a ŋinakou a epir ŋimitae ŋiarei.

¹⁷ Elogakinitae nakou a ŋolopir ŋiriko ŋikanikaarei ŋulu elogilogitae kaapei akisibusya ŋipirin.

¹⁸ Abu Iram kiwuak loriko ŋul ŋilaino ŋiarei ŋulu a ŋitorubei a ŋaraito a ekitoe a ŋolo esibit ekacikicikit, akisibusya ŋakyes a ŋipirin. Abu iŋes kitiya ŋun kidiama ŋolopir.

¹⁹ Ani eruwor ŋakyes a ŋipirin a ŋulu a ebarasan, abu Iram kitiyau esibit ŋatur a ecomocomo, arae aoyau a ŋakyes a ŋun ŋimitae ŋiarei.

²⁰ Ewuakinitae a ŋilaino ŋitorubei ŋamiae ŋaarei ŋulu a pomegranate nakyes a ŋipirin a ŋuluarei a ŋul kidiama neni etiyatae esibit ŋabakulei, kilogilogitetei ŋiriko kiryam cib.

²¹ Tosiponok Iram ŋipirin lobarasan a Akai ka Akuj. Tonyara iŋes ekiro a epir a ŋolo ayai lowae ŋolo alo kwap Akai ŋin Yakin, ido ŋolo ayai Kuju Akai ŋin tonyara Boas.

²² Ayetae ŋakyes a ŋipirin a ŋul esibito ŋatur ŋuna a ecomocomo. Aŋun, abu Iram kirikak etic ŋolo a ŋipirin.

²³ Kitiyau Iram etorube ka anam a ŋina luluŋ a ŋasuwa a eburonis arae alolomu ŋimitae ŋiomwon ka atutubet ameun alokipitot ke epei tari ŋoloce, ido arae acukul ŋimitae ŋiarei. Arae aoyau a lokipetot akirimokin ŋimitae ŋitomon ka ŋiuni ka atutubet.

²⁴ Kwap ŋikipetetyo ka anam a ŋin, ewuakinitae ŋitorubei a ŋitwol a ŋul kiryam cib, ŋitwol ŋitomon natutubet a emitae. Arekinitae ŋitorubei a ŋitwol a ŋul lolaino ŋiarei ŋulu aya lokipetot a anam.

²⁵ Etowoitae anam ŋin alotorubei a ŋitomon ka ŋiarei a ŋulu a ŋimoŋin, eŋoliyarito ŋimoŋin ŋul ŋiuni Kuju, ŋiuni To, ŋiuni Kwap ka ŋiuni Kide. Arapuwarit anam ŋawat a ŋimoŋin a ŋul ameun alogur tari namuroi.

²⁶ Atya abutur ka anam a ŋin akan nenidapal etiyaunitae ŋikelyo a ŋikipetetyo etya ŋulu a ekopo, ikwaan ka akuyon a ecomocomo. Elelebunun nanam ŋin ŋakipi ŋuna a ŋabesenio a ŋalipyo ŋaarei.

²⁷ Kitiyau daŋ Iram ŋigaari ŋitomon a eburonis, arae aoyau alosepyon a ŋinigaari ŋimitae ŋulu aapiyarito ŋiarei, kiŋaren ka neni iteotor arae ŋimitae ŋulu aapiyarito ŋiarei, ido aoyau alokwap tari kidiama arae emita epei.

²⁸ Epite lo iŋes etiyaunitere ŋigaari ŋul: Ayakar ŋinigaari ŋasuwa ŋuna ekamanakina anenilapat a igaari ka alosepyon,

²⁹ ewuanakinitae kidiŋ ŋasuwa a ŋigaari a ŋul ŋitorubei a ŋiŋatunyo a ŋimoŋin ka ŋulu a Ŋikerubim. Ewuanakinitae nasuwa ŋuna alokwap ka ŋuna alokidiama ŋitorubei a ŋiŋatunyo ka ŋulu a ŋimoŋin, aya daŋ nen ŋitorubei ŋulu a ŋakwii ŋulu ayeanakinitae ilugilugitoe ŋasuwa neni iwasi.

³⁰ Ayakar ŋinigaari ŋakejen ŋaomwon ŋuna etiyaunitae a eburonis ka ŋasuwa ŋaarei ŋuna erimyoto ŋakejen ŋuna etiyaunitae a eburonis. Aya lokoonae ŋuluomwon a ŋinigaari ŋawoeta ŋuna ka abesen. Ewuakinitae ŋitorubei a ŋakwii nawaetin a ŋawoeta aŋun.

³¹ Etiyakinitae tooma ŋinigaari awoet a abesen ŋina luluŋ, ŋina aapiyarit acukul emita. Aluluŋ ŋawoeta ŋun alokidiama, ido aapiyarit alolomu kec alotooma emita. Ecienakinitae ŋinawoet ŋitorubei, ayakatar ŋawoeta ŋiwaetin ŋulu eriyan.

³² Ayakasi ŋakejen kwap ŋikelyo ŋulu alokwap ŋinigaari erepakinitae ŋigaari ŋasuwa ŋuna irimyoto ŋakejen, ido aapiyarit alolomu a ŋinakeju a igaari emita.

³³ Etiyatae ŋakejen ŋun, esibit ŋuna ka agaari a ŋina iritae a ŋaŋolei; ayakasi ŋasuwa ŋuna irimyoto ŋakejen, ayai ŋasuwa ŋun neni luluŋ, aya ŋipagi ka aya ŋaabwa neni eenio ŋipagi alokidiŋ akeju etiyaunitae ŋiboro ŋul daadaŋ a ŋasuwa a ŋuna arae ŋasimito.

³⁴ Ewuakinitae ŋadaketa ŋaomwon lokoonae ŋuluomwon a ŋinigaari, emiidikinitae ŋadaketa nigaari imorikina erae asuwat apei.

³⁵ Ayai kidiama igaari neni aeniunit ŋiwaetin daadaŋ, toapiyarite adapalu atutubet a emita. Atapakina ŋawoeta ka ŋikelyo nigaari arae ibore ipei.

³⁶ Kicieanak Iram ŋitorubei a Ŋisubuna a ŋulu a ŋabebenuk, a ŋiŋatunyo ka ŋulu a ŋikito a ŋiŋolya nawoeta, lokelyo ka neni alapat daadaŋ a nigaari, ido kiwuanak ŋitorubei a ŋakwii kisiryam cib.

³⁷ Arae ŋol epite ŋolo etiyaunitere ŋigaari ŋulutomon ŋul. Etiyatae ikes daadaŋ a eburonis, ido ariyan alotyae ka ekwaan alopite a ŋolo etiyatere.

³⁸ Kitiyau Iram ŋabapwa ŋatomon a eburonis; apedoryo akilelebikin ŋinabapu ŋilitae ŋamiae ŋakanikauni a ŋatomonikanikauni, ido aapiyarit alolomu a ŋinabapu ŋimitae ŋiarei; ŋabapwa ŋun ŋunatomon, arae ŋuna a ŋigaari a ŋulutomon, a ŋinigaari abapu apei.

³⁹ Kiwuak Iram ŋigaari ŋul ŋikan lowae ŋolo alo Kwap Akai ka Akuj, kiwuak ŋikan lowae ŋolo alo Kuju. Kiwuak etorube ŋolo ka anam lokoona ŋolo ayai Kwap-Kide Akai ka Akuj.

⁴⁰ Abu daŋ Iram kitiyau ŋabapwa, ŋikitiyoi ka ŋabakulei. Aŋun, abu iŋes kirikak etic daadaŋ ŋolo etiyae alo Kai ke Ekapolon aŋuna a erwosit Solomon.

⁴¹ Abu Iram kitiyau ŋipirin ŋuluarei ŋul ka ŋabakulei ŋunaarei ŋun ŋuna ewuakinitae nakyes a ŋipirin a ŋul ta ŋiriko ŋuluarei ŋulu elogilogitae akisibusya ŋabakulei ŋuna ayeanakinitae nakyes a ŋipirin;

⁴² Kitiyau Iram ŋitorubei a ŋaraito a ekitoe ŋamiae ŋaomwon akisibusya ŋiriko ŋul ŋiarei, kiwuak ŋilaino ŋiarei ŋulu a ŋitorubei a ŋaraito neni a ŋolorikot akisibusya ŋabakulei ŋuna ayekinitae nakyes a ŋipirin.

⁴³ Kitiyau Iram ŋigaari ŋitomon ka ŋabapwa ŋatomon ŋuna ewuakinitae kidiama ŋigaari;

⁴⁴ kitiyau daŋ etorube ka anam epei ka ŋitorubei a ŋimoŋin ŋitomon ka ŋiarei, ewuakinitae ŋitorubei ŋul kwap etorube ka anam.

⁴⁵ Kitiyau Iram ŋamoti, ŋikitiyoi ka ŋabapwa. Ŋiboro ŋul daadaŋ ŋulu abu Iram kitiyau aŋuna a Solomon erae ŋulu a Akai a Ekapolon, arae ŋulu etiyaunitae a eburonis a ŋolo epwasitae.

⁴⁶ Aponi ŋiboro ŋul daadaŋ kitiyaunae anadipo a ŋina a aŋolol Yorodan alokidiŋ Sukos ka Saresan ikwapei alimunitor erwosit Solomon.

⁴⁷ Abu Solomon kitiyau ŋiboro ŋulu elalak nooi; aŋun, aponi nyeyenun apotis a eburonis, a ŋolo keponi kisitiyae.

⁴⁸ Aŋun, abu Solomon kitiyau ŋiboro lu daadaŋ ŋulu aya Kai ke Ekapolon: Namuroet ŋina etiyaunitae a egolid, emesa ŋolo etiyaunitae a egolid ŋolo arae ŋolo a ŋamugati a ŋuna ka ayakau a ŋina a Akuj,

⁴⁹ ŋawoeta a ŋitaae ŋuna etiyaunitae a egolid bon, aya ŋakan lowae ŋolo alo Kwap, ŋakan lowae ŋolo alo Kuju, toya kiŋaren akibois ŋina asegan. Kitiyau a egolid ŋatur, ŋitaae ka ŋasuwa ŋunaridet ŋatotol;

⁵⁰ kitiyau a egolid ŋiboro lu: ŋikopoi, ŋasuwa ŋuna kituduŋeet ŋitaae, ŋabapwa, ŋabakulei ŋuna ke ekinyate ka ŋikalaae ŋulu edakere ŋatotol ŋuna enokete. Kitiyau a egolid ŋipetae a ŋipukei a ŋulu a akibois a ŋina Asegan ka ŋulu a ŋipukei a akibois a ŋina Asegan nooi ta ŋulu a ŋipukei a Namuroet alo Kai ka Akuj.

⁵¹ Aŋun, abu erwosit Solomon kirikak etic keŋ ŋolo etiyaa Akai ke Ekapolon, ekaku, yau iŋes Kai ŋin ŋiboro lu ŋulu sek keris papa keŋ Daudi kitaleiyo: Esilipa, egolid ka ŋiboro ŋice, kiŋadak ikes lositowae ŋulu a Akai ka Akuj.