1 Ŋirw. 5 - Ebaibul

Akitemonokin akiduk Akai ka Akuj

¹ Ani iirari Iram, erwosit ŋolo a Tiro atemar eturuwor Solomon erwosit, elunyokin lorot a papa keŋ Daudi, kiyakiya iŋes ŋiketiyak keŋ neni a Solomon, anerae kerae sek iŋes ekone a Daudi.

² Kiyakia nai Solomon ŋakiro neni a Iram tema,

³ “Iyeni iyoŋ atemar, aŋuna aŋijiesyo a ŋulu etijioto ŋituŋa papa kaŋ alowaetin a daadaŋ pa abu iŋes topedo adukokin Akai ka Akuj aŋuna a ekiro a Ekapolon a Akuj keŋ akitodol ŋina esilounia Ekapolon papa kaŋ ŋimoe keŋ.

⁴ Nai tokona, akainakinit ayoŋ Ekapolon Akuj kaŋ ekisil alowaetin a daadaŋ, mam emoit, kori ŋace daŋ ŋuna aronok.

⁵ Aŋun nai, acamit ayoŋ akiduk Akai ka Akuj aŋuna a ekiro a Ekapolon Akuj kaŋ, lopite ŋolo alimokinitor Ekapolon papa kaŋ Daudi apaki ŋina alimunio ebe, ‘Lokoku kon ŋolo elunyokini ayoŋ lokicoloŋ kon, iŋes edukokini Akai ka Akuj aŋuna a ekiro kaŋ.’

⁶ Aŋun, tolimok ŋituŋa okoyepakin ayoŋ ŋakito a ŋikito a ŋulu enyaritae Cedar alo Lebanon. Epote ŋiketiyak kaŋ kimorikinos ka ŋiketiyak kon kitiyata kaapei ido akainakini ayoŋ iyoŋ eropit ŋolo ilimuni iyoŋ aŋuna a ŋiketiyak kon; anerae iyeni iyoŋ atemar mam ice alokidiŋ yok ŋini eyeni ŋikito ikwa ŋituŋa ŋulu a Sidon.”

⁷ Ani iirari Kiram ŋakiro a Solomon tolelyan nooi tema, “Kipuroe Ekapolon akoloŋit na aŋuna ainakinia Daudi ikoku ŋinisapat ŋini aoson, ŋini ipukae ŋituŋa keŋ ŋulu alalak nooi ŋul.”

⁸ Kiyakia Kiram ŋakiro neni a Solomon tema, “Adau ayoŋ akiirar ŋakiro ŋuna ibu iyoŋ kiyaku neni kaŋ etiyakini ayoŋ ŋuna ibala iyoŋ daadaŋ ayepuni ŋakito a ŋikito a ŋulu enyaritae Cedar ka Cipres.

⁹ Iwokunete ŋiketiyak kaŋ ŋakito ŋun alo Lebanon tari nanam, ido iwokunete ŋakipi ŋakito ŋun ananam eeniyanara tari nakibois ŋina ikilimokini iyoŋ ayoŋ. Ani edolunete nen, tolacanakinae ŋaeneta ikotere epatana iyes akiwok. Eropit ŋolo acamit ayoŋ ikiinak iyoŋ ayoŋ iŋes akimuj ŋina a ekal kaŋ.”

¹⁰ Aŋun abu Kiram inanak Solomon ŋakito ŋuna eitanit daadaŋ ŋuna a ŋikito a ŋulu enyaritae Cedar ka Cipres.

¹¹ Aŋolokaru, ainanakini Solomon Kiram aŋuna a ekal keŋ ŋakirya ŋuna a ŋaganoi ŋunakimuja ŋabapwa ŋalipyo ŋatomoniarei ka akimyet ŋina ajokan ŋijerikanin ŋatomoniarei.

¹² Abu Ekapolon inak Solomon aosou lopite ŋolo eikinitor. Toyakaun ekisil kidiŋ Kiram ka Solomon; tocamunos ŋuluarei akiboi a ekisil.

¹³ Kisyak erwosit Solomon areanakin ŋituŋa a Isirael daadaŋ etic, todol ekimar a ŋulu areikinitae akitiya ŋalipyo ŋatomoniuni.

¹⁴ Kiyakiyana Solomon ŋituŋa ŋul Lebanon a ŋololap ŋituŋa ŋalipyo ŋatomon, kiboiyoto a nen elap, ido toboŋut lore kiboiyoto ŋilapyo ŋiarei. Arae Adoniram iŋes apolokinit ŋituŋa ŋul ŋulu areikinitae akitiya.

¹⁵ Ayakar daŋ Solomon ŋikilyok ŋatomonikanikauni ŋulu abokete ŋamoru alokamukumukui ka ŋatomonikanikaarei ŋulu erisete ŋamoru ŋun.

¹⁶ ayakar daŋ Solomon ŋikilyok ŋalipyo ŋauni ka ŋamiae ŋauni ŋulu apolokinito ŋiticisyo, kisitiyaete ŋituŋa.

¹⁷ Apotu ikes tobokununut ŋamoru ŋuna apolok nooi lopite ŋolo alimokinitor erwosit ikes, tobokununut ikes ŋamoru ŋuna ajokak nooi ŋuna epedorete akisiakin alokwap arwatata ŋina ka Akai ka Akuj anerae ecietae ejok.

¹⁸ Apotu ŋikadukok a Solomon ka ŋulu a Kiram ta ŋiketiyak ŋulu alo Giligal totubutuboto ka kitemonokis ŋamoru ka ŋakito aŋuna ka adukio Akai ka Akuj.