1 Ŋirw. 4 - Ebaibul

Ŋikapolok a apukan a Solomon

¹ Erwosit Solomon iŋes apolokinit akwap a Isirael daadaŋ,

² ido arae lu ŋikapolok ŋulu a apukan keŋ: Asaria lokoku a Sadok iŋes arae esacaradoti,

³ Eliorep ka Aija ŋidwe a Sisa ŋulusapa ikes erae ŋikaranin, Yeosapat lokoku a Ailud iŋes arae ekeŋadan ŋakiro ŋuna igirir.

⁴ Benaia lokoku a Yekoiyada iŋes arae ekarikon a ajore a ŋolo apolon nooi, Sadok ka Abiasar ikes arae ŋisacaradotin.

⁵ Asaria lokoku a Nasan iŋes apolokinit ŋikapolok a ŋitela; Sabub lokoku a Nasan iŋes arae esacaradoti, arae daŋ iŋes ekone a erwosit ŋolo amoryata ŋakiro ŋuna a apukan.

⁶ Aisar iŋes apolokinit akai ŋina ka apukan; ka Adoniram lokoku ka Abida iŋes apolokinit etic ŋolo areikinitae ŋituŋa akitiya.

⁷ Ayakar Solomon ŋikapolok a apukan keŋ ŋitomon ka ŋiarei ŋulu epukato ŋitela a apukan keŋ anakwap a Isirael a daadaŋ. Arae ŋikapolok ŋul ayaununeete akimuj aŋuna a erwosit ka aŋuna a ŋituŋa a ŋulu aya kai a apukan. Ayaununui ŋolokapolon akimuj nen ŋina a elap a epei alotooma ekaru.

⁸ Ŋirorwa a ŋikapolok a ŋul ikes lu: Ben-Ur, iŋes epukat akwap ŋina a ŋikamukumukui ŋina a Epuraim;

⁹ Ben-Deker, iŋes epukat Makas, Salibim, Besisemes ka Elon-Besianan;

¹⁰ Ben-Esed, iŋes epukat Arubos (Soko ka akwap a Eper daadaŋ arae ŋuna keŋ);

¹¹ Ben-Abinadab, iŋes epukat Napos-Dor (eisit iŋes nakoku a Solomon ŋina anyaritae Tapas);

¹² Baana lokoku a Ailid, iŋes epukat Taanak, Megido ka Bes-sean daadaŋ akwap ŋina edunyasi ka Saresan ŋina ayai kwap etaun Yesireel, ido anyoun alo Bes-sean tari Abel-Meola, akitodol yaye Yokimeam;

¹³ Ben-Geber, iŋes epukat Ramos Gilead. (Epukat daŋ Ben-Geber akwap ŋina ka Arigob alo Basan. Aya nen, ŋitaunio ŋatomonikanikapei ŋulu apolok ŋulu adukitoe ŋarwatatain kec ebutur ka adukitoe ŋipukei kec a ŋasuwa aŋuna a eburonis);

¹⁴ Ainadab lokoku a Ido iŋes epukat Maanaim;

¹⁵ Aimas iŋes epukat Naputali (eisit iŋes Basemas nakoku a Solomon);

¹⁶ Baana lokoku a Usai iŋes epukat Aser ka Alos;

¹⁷ Yeosapat lokoku a Purua, iŋes epukat Isakar;

¹⁸ Simei lokoku a Ela, iŋes epukat Benjamin;

¹⁹ Geber lokoku a Uri, iŋes epukat Gilead (akwap ŋina a Sikonaa erwosit, a Ŋiamori ka akwap ŋina a Og a erwosit a Basan). Ekapolon epei bon epukat akwap ŋina a Yuda.

Arwonu ŋina ka apukan a Solomon

²⁰ Apotu ŋituŋa ŋulu atutubet a Yudaya ka ŋulu ka atutubet a Isirael tolalata nooi kikwaanikin alalau kec ka asinyon ŋina eyai nawae a anam; emujete ikes ka amasete ejok, ido alakara.

²¹ Arae Solomon apolokinit ŋakwapin ŋun daadaŋ anyoun anaŋolol a ŋina enyaritae Eupurate akitodol nakwap ŋina a Ŋipilistin, kiropo lokukor ŋolo a Ijipit. Atacete ŋakwapin ŋun ocur neni Solomon ka etiyanakinete ŋakwapin ŋun Solomon ŋirwa ŋulu a akiyar keŋ daadaŋ.

²² Etyae ka akimuj a ŋina eitanit Solomon a ŋinakoloŋit iŋes lo: ŋakirya ŋunadopir ŋabapwa ŋatomoniuni, ŋakirya ŋuna pa adopir ŋabapwa ŋatomonikanikapei,

²³ ŋimoŋin ŋitomon ŋulu itanunitae, ŋimoŋin ŋatomoniarei ŋulu anadakar ka ŋamesekin amiat pa imarakinitae ŋatili, ŋagetei, ŋisarico ka ŋatapemo ŋuna itanunitae.

²⁴ Epukat Solomon akwap daadaŋ ŋina alo To aŋolol ŋina enyaritae Eupurate ameun aneni enyaritae Tipisa tari Gasa, arae iŋes apolokinit ŋirwosi daadaŋ ŋulu alo To aŋolol Eupurate, esilito iŋes ka ŋikidunyet keŋ daadaŋ.

²⁵ Ŋirwa ŋulu epukator Solomon, eboiyete ŋituŋa ŋulu a atutubet a Yudaya ka atutubet a Isirael anakinapakina ameun alo Dan tari Beeriseba. Eboiyete ŋikilyok alotolimon a ŋikito kec aŋulu a epiini ka ŋiboboryo.

²⁶ Ayakar Solomon ŋakiboisyo ŋalipyo ŋatomoniomwon ŋuna aya ŋaŋolei ŋuna eritere ŋagaari keŋ ka ayakar ŋikametok ŋulu a ŋaŋolei ŋalipyo ŋatomon ka ŋaarei.

²⁷ Arae ŋikapolok a ŋakwapin a ŋatomon ka ŋaarei a ŋuna epukat Solomon ikes ayaununeete neni a Solomon akimuj ŋina anyamete iŋes ka ŋituŋa alore a apukan daadaŋ. Ayauuni ŋolokapolon neni a Solomon akimuj ŋina a elap ke epei, ido arae etic kec ayenut ebe mam ibore icana erwosit.

²⁸ Ayaununeete daŋ ikes kai ka apukan ŋakasirim a ŋikinyom a ŋulu ikote erau ka eoot aŋuna a ŋaŋolei ka ŋaŋolei-sigirya. Ayaununui ŋolokapolon etyae ŋolo alimokinitae iŋes yau.

Arwonu ŋina ka aosou a Solomon

²⁹ Inak Akuj Solomon aosou ŋina alalan nooi, ayenut epite ŋolokisibaket ŋakiro ka etau ŋolo ijaununui ŋakiro daadaŋ tari daŋ kelalak ikwa asinyon ŋina eyai nawae a anam.

³⁰ Eloit nooi aosou a Solomon ŋina a ŋikilyok a daadaŋ a ŋulu aya kide akwap ka ŋina a daadaŋ a ŋulu aya Ijipit.

³¹ Aos iŋes akilo ŋikilyok daadaŋ, aos akilo Esan ŋolo arae Esirait, Eman, Kalikol, Darida ka ŋidwe a Maol ŋulusapa. Toru ekiro a Solomon anakwapin a daadaŋ a ŋuna edunyatar iŋes.

³² Abu Solomon kirwor ŋakitadapeta ŋalipyo ŋauni ka totamu ŋieosyo aliput ka ŋikan.

³³ Abu iŋes tolimununu ŋirorwa a ŋikito akisyakin aneni a ŋolo enyaritae Cedar a ŋolo ayai Lebanon tari neni a ŋolo anyaritae Isop a ŋolo elemununio anarwatatain. Alimununui Solomon ŋirorwa a ŋityaŋ, ŋulu a ŋikieny, ŋulu a ŋiboorei a ŋulu elyato ka ŋulu a ŋikolya.

³⁴ Aponeneete ŋituŋa ŋice anakwapin a daadaŋ akiirar ŋuna ka aosou a Solomon, arae ŋul ŋulu eyakuunito ŋirwosi kec ŋulu keris kiirasi ŋakiro a aosou a Solomon anakwapin a daadaŋ anakwap.