1 Ŋirw. 3 - Ebaibul

Kiŋit Solomon ainakino aosou

¹ Toyenakin Solomon ka Parao, erwosit ŋolo a Ijipit anakiit Solomon nakoku a Parao. Yau Solomon aberu ŋin akiboi lotaun a Daudi akitodol ŋina erikakinia Solomon akiduk akai keŋ ka Akai ke Ekapolon ta arwatata ŋina eryamit Yerusalem.

² Apaki ŋin, ariŋa ŋituŋa itiyaete ŋamuronisya anakiboisyo a ŋunamukur aneni elipeneneere. Arae ŋun aŋuna amamukar Akai ŋina adukitoe aŋuna ka akilipya Ekapolon.

³ Amina Solomon Ekapolon ewuapit daŋ ŋikisila a Daudi a papa keŋ. Nai aayenene iŋes ŋamuronisya nakiboisyo ŋunamukur ŋun ka ecunyanakini ekinyate a nen.

⁴ Akoloŋit apei, tolot erwosit Gibeon, anerae arae Gibeon aoya nooi ka neni etopoloritae nooi. Abu Solomon kiwuak Namuroet ŋina ayai nen ŋainakineta apeiliput ŋuna epeyo.

⁵ Ani eriŋa iŋes eyai Gibeon, totakanu Ekapolon nakwaare neni keŋ anakiruja. Tema Akuj neni keŋ, “Kiŋitae ayoŋ ibore ŋini icamit iyoŋ okoinak ayoŋ iyoŋ.”

⁶ Tema Solomon, “Idau iyoŋ akitoodikin amina kon ŋina apolon, ŋina nyiryaŋiryaŋa neni a eketiyan kon a papa kaŋ Daudi, anerae arae iŋes ŋolo ikikinyomit iyoŋ ka akiyookino, ido ajok iŋes alotau keŋ aneni kon. Idau iyoŋ akiric aŋuna keŋ arimao na ŋina apolon, iinak iŋes ikoku ŋinisapat ŋini elunyokin lokicoloŋ keŋ nakoloŋit na.

⁷ Tokona nai Ekapolon Akuj kaŋ idau iyoŋ akituruwor ayoŋ eketiyan kon erwosit, elunyokin lorot a Daudi a papa kaŋ tari keriŋa ayoŋ arae ikoku ŋinidiocici. Nyayeni ayoŋ epite ŋolo apedorya akitiya.

⁸ Ayai ayoŋ ne eketiyan kon, kidiŋ ŋituŋa ŋulu iseu iyoŋ, ŋituŋa kon ŋulu alalak ŋulu nyeyenen ekimar, kori ŋulu nyimarun aŋuna elalaata.

⁹ Aŋun inakinae ayoŋ eketiyan kon ŋatameta ŋuna eyenete ŋakiro ŋuna ka akipuka ŋituŋa kon, ikotere oyenunia ŋuna ajokak ka ŋuna aronok; anerae ŋae epedori akipuka ŋituŋa kon lu ŋulu alalak?”

¹⁰ Tolakar Ekapolon aŋuna eŋisya Solomon iŋes ŋakiro ŋun.

¹¹ Tema Akuj neni keŋ, “Aŋuna ikiŋisya iyoŋ ayoŋ ŋakiro ŋun, ido nyiŋita iyoŋ ayoŋ akiyar ŋina aoyan aŋuna kon a elope, meere tari ebari aŋuna kon a elope, meere tari amunyar ŋimoe kon, nai ayenun epite ŋolokipukaet ejok,

¹² akainakini ayoŋ iyoŋ ŋuna iŋita. Akainakini ayoŋ iyoŋ ŋatameta ŋuna ka aosou ŋuna eyenete ŋuna ajokak ka ŋuna aronok; mam ituŋanan ice ŋini ekoni iyoŋ kori mam ice ŋini ikoni iyoŋ ŋini eyakaun ekaku kon.

¹³ Akainakini ayoŋ iyoŋ tari ibore ŋini nyiŋita iyoŋ ayoŋ, ikes lu: Ebari ka apolou ŋirwa daadaŋ ŋulu ka kiyar kon; mam erwosit isikwaanio ka iyoŋ.

¹⁴ Ani kiwuap ŋakiro kaŋ, kiwuap ŋikisila kaŋ ka ŋakiciketa kaŋ, lopite ŋolo ewuapitor Daudi papa kon, akainakini nai ayoŋ iyoŋ akiyar ŋina aoyan.”

¹⁵ Tokyenyu nai Solomon; toyenu atemar kirujae iŋes. Tolot iŋes Yerusalem, towo alokiŋaren Asaduku ŋina ka Acamunet a Ekapolon, inak a nen neni a Ekapolon ŋainakineta ŋuna epeyo ka ŋuna a ekisil. Abu daŋ kitemok ŋasuban aŋuna aŋiketiyak keŋ a daadaŋ.

Aosou ŋina epukator Solomon

¹⁶ Ekaku a ŋun, potu ŋaberu ŋaarei ŋuna arae ŋamalaae neni a erwosit, towua alokiŋaren keŋ.

¹⁷ Tema aberu apei, “Ekapolon kaŋ, ikiboi ayoŋ ka aberu na alokai ka apei. Abu ayoŋ edou ikoku alokai eyai iŋes daŋ kai.

¹⁸ Ani nai edolete ŋirwa ŋiuni, ekaku kedou ayoŋ, abu aberu na daŋ kidou. Arukitoe isua apaki ŋin; mam ituŋanan ice arukitere isua alokai, isua ŋaarei bon ayakae kai.

¹⁹ Nai abu ikoku ka aberu a na totwan nakwaare, anerae kebu iŋes eperi totik ikoku keŋ.

²⁰ Tosodi tonyou kidiŋ akuwar, todaka lokoku kaŋ alosyep kaŋ eriŋa ayoŋ aketiyan kon ajotoe. Kebu kiperik lokoku kaŋ natorobu keŋ, ido kiperik lokoku keŋ ŋolo atwan natorobu kaŋ.

²¹ Ani anyouni ayoŋ taparacu akitanakakin lokoku kaŋ abu ayoŋ oryamu etwanit; nai ani esyeme ayoŋ iŋes taparacu, kileereu jik pa erae isapat ŋini abu ayoŋ edou.”

²² Nai abu aberu ŋinace tema, “Mam, erae isapat ŋini kaŋ ido ŋini etwanit erae ŋini kon.” Tema aberu ŋina sek ageuni akirworikin, “Mam, erae isapat ŋini etwanit ŋini kon, ido erae isapat ŋini eyari ŋini kaŋ.” Aŋun, apotu ikes topeganakinos alokiŋaren erwosit.

²³ Tema nai erwosit, “Ebala iyes apei, ‘Erae lokoku kaŋ en ŋini eyari, lokoku kon ŋini etwanit.’ Tobali bo ŋinace. ‘Meere ikoŋina! Lokoku kon ŋini etwanit, ido lokoku kaŋ ŋini eyari.’ ”

²⁴ Aŋun, abu erwosit tema, “Inunae ayoŋ atum.” Yaut ŋituŋa atum, kiwuakis kiŋaren erwosit.

²⁵ Tema erwosit, “Kibela ŋaarei isapat ŋin ŋini eyari; ido nai inakis atutubet apei neni aberu ka apei ka atutubet apei neni a ŋinace.”

²⁶ Kidisik etau a aberu a ŋina arae lokoku keŋ ŋini ayari aŋuna alokoku keŋ, tema neni ke erwosit, “Okoe, ekapolon kaŋ inak aberu ŋin isapat ŋin eyari!” Nai tema ŋinace, “Nyayai ayoŋ nyiyai iyoŋ daŋ; kibela iŋes.”

²⁷ Toboŋok nai erwosit tema, “Inakisi aberu ŋina ageuni akirworikin isapat eyari; nyiar iŋes, erae ŋin toto keŋ.”

²⁸ Kiirasi Ŋisirael daadaŋ epite ŋolo kebunio erwosit totubio ŋakiro ŋun; min akereru neni kec aŋuna a erwosit, anerae apotu ikes kiŋolikis aosou ŋina ka Akuj ŋinatubet ŋakiro iyookino eyai neni a erwosit.