1 Ŋirw. 19 - Ebaibul

Tosi Eliya aneni a Yesebel

¹ Tolimok Aab Yesebel ŋakiro daadaŋ ŋuna abu Eliya kitiya, epite ŋolo abunio toarya ke ekileŋ ŋikadwarak a Baal daadaŋ.

² Aŋun, abu Yesebel kiyakiya ituŋanan neni ke Eliya alimokin iŋes ebe, “Elipi ayoŋ ekesican ayoŋ ŋakujo, nai nooi, erae pa kesikwaanik ayoŋ akiyar kon ka ŋina a ekadwaran a epei a ŋul moi taparacu esaa lopei lo.”

³ Kitubulo ŋun Eliya, ido tosi aiun akiyar keŋ. Ani edoli iŋes Beeriseba, nakwap ŋina a Yudaya, kimyek eketiyan keŋ a nen.

⁴ Nai tolot iŋes ka a keŋ akoloŋit apei analoŋisat. Ani edoli iŋes iwace neni ayai ekitoe ŋolo esibit epetet kiboikin kwap ekitoe ŋol, kilip a nen egasi atwanare tema, “Etemokin tokona, okoe Ekapolon, tolema akiyar kaŋ, anerae nyajok ayoŋ akilo atapapaa kaŋ.”

⁵ Toper nai iŋes alokwap ekitoe ŋol, ido tojotoor. Ajotoor iŋes bon, totapi emalaika iŋes tema, “Tonyou kimuj.”

⁶ Toŋoleŋolek iŋes, kiŋolik alodiyete akou keŋ amugati ŋina apeyo a ŋamoru a ŋuna amwanak, ido ayai nen amot a ŋakipi. Kimuj iŋes ka tomat, ido toper nabo.

⁷ Bu Emalaika ke Ekapolon neni keŋ abunet ŋina a ŋaarei, totap iŋes tema, “Tonyou kimuj, acepaki ikioyakini iyoŋ erot.”

⁸ Tonyou iŋes kimuj, ido tomat, torotok nai keryamu agogoŋu kedau akimuj. Torubak iŋes elosi alorot ŋapaarasya ŋatomoniomwon ka ŋakuwarisya ŋatomoniomwon, akitodol ŋina adolio iŋes Oreb, lomoru ŋolo ke Ekapolon.

⁹ Alomoru a ŋol, abu iŋes tolot naturukan, toper nen nakwaare. Kiŋit nai Ekapolon iŋes a nen tema, “Nyo itiyae iyoŋ a ne Eliya?”

¹⁰ Toboŋok iŋes tema, “Alelakinit ayoŋ nooi Ekapolon Akuj ŋina etiron; anerae emyekis Ŋisirael ŋuna apotu tocamut, abwaŋabwaŋaasi Ŋamuroeta kon, ido adaut akiar ŋikadwarak kon ke ekileŋ. Ayoŋ bon edoŋ ka iwarito ikes akiar ayoŋ.”

Kiryamunos Eliya ke Ekapolon Oreb

¹¹ Tema nai Ekapolon neni ke Eliya, “Toloma kiŋa, towo alomoru alokiŋaren Ekapolon anerae eapi Ekapolon atubor a nen.” Apaki ŋin tokut ekuwuam ŋolo apolon, agogoŋ ekuse keŋ, acilicili ŋimukura ka atubutubui ŋamoru ekusi alokiŋaren Ekapolon, nai amam Ekapolon alokuwuam. Ekaku ke ekuwuam, toyakaun amaran ka akwap, nai amam Ekapolon anamaran ka akwap.

¹² Ekaku ka amaran ka akwap, torirau akim, nai amam Ekapolon anarira ka akim. Ekaku ka arira ka akim, bu etoil ŋolo eŋaiŋaa.

¹³ Ani iirari Eliya etoil ŋol, kimuko ereet keŋ a elou keŋ, toloma kiŋa alopuke ka aturukan. Kirworik nai neni keŋ etoil ŋolo abala, “Nyo itiyae iyoŋ a ne Eliya?”

¹⁴ Toboŋok Eliya tema, “Alelakinit ayoŋ nooi Ekapolon Akuj ŋina etiron, anerae emyekis Ŋisirael ŋuna apotu tocamut, abwaŋabwaŋaasi Ŋamuroeta kon, ido adaut akiar ŋikadwarak kon ke ekileŋ. Ayoŋ bon edoŋ ka iwarito ikes akiar ayoŋ.”

¹⁵ Tema nai Ekapolon neni keŋ, “Ape, toboŋo tomek erot ŋolopei ŋoon, tolot naloŋisat ŋina alo Damasko. Ani idoli iyoŋ nen, kiosak akimyet neni ka Asael kituruwo iŋes erwosit ŋolo ka Aram.

¹⁶ Kiosak Yeu lokoku a Nimisi akimyet, kituruwo iŋes erwosit a Isirael, kiosak neni ke Elisa alokoku a Capat a ŋolo alo Abelimeola kituruwo iŋes ekadwaran kilunyokin moi lorot kon.

¹⁷ Ituŋanan daadaŋ ŋini ebucar alokileŋ ka Asael, eari Yeu, ido ŋini ebucar alokileŋ a Yeu, eari Elisa ŋin.

¹⁸ Nai emyekini ayoŋ alo Isirael ŋikilyok ŋalipyo ŋakanikaarei ŋul daadaŋ ŋulu nyeryediko kilipa neni a Baal, ŋulu nyenua Baal a ŋakituki kec.”

Toruwor Elisa ekewuapan ke Eliya

¹⁹ Aŋun, abu Eliya toboŋo a nen, toryamu Elisa lokoku a Capat itae. Aenit Elisa ŋimoŋin ŋatomoniarei ka ŋiomwon ŋulu etaete apaki ŋin amyat Elisa ŋimoŋin ŋulu a emeleku a ŋolo a ŋitomon ka ŋiarei. Tolot Eliya neni ke Elisa, kimasak elou keŋ neni ke Elisa.

²⁰ Toesik Elisa ŋimoŋin keŋ toem kiwuapak Eliya tema, “Kimyekinae mono olot onu papa kaŋ ka toto kaŋ, ido nai obu ekewuapak iyoŋ.” Toboŋok Eliya tema, “Toboŋo, anukiro etiyak ayoŋ neni kon ikiwuapitor iyoŋ ayoŋ?”

²¹ Toboŋo Elisa kimyek akiwuapit Eliya, tomyaa ŋimoŋin ŋulu sek etaa iŋes toŋol ikes; tosodi tolemu ayokot kinokakinia akim kipo ŋimoŋin a ŋul, ido inak ŋituŋa tonyama. Torotok nai iŋes kiwuapak Eliya, toruwor eketiyan ke Eliya.