1 Ŋirw. 17 - Ebaibul

Todwar Eliya atemar emamukaun akiru

¹ Tema Eliya Etisibait ŋolo alo Gilead neni ka Aab, “Ikwaŋinapei eyarya Ekapolon Akuj a Ŋisirael, ŋina arae ayoŋ eketiyan keŋ, emamukaun ŋakopi, kori akiru ŋikaru ŋulu eponito, mati kalimu ayoŋ.”

² Tema nai Ekapolon neni ke Eliya,

³ “Torotok a ne, ape lowae ŋolo alo Kide, ido toŋop anayonae a ŋina enyaritae Ceris, a ŋina eyai Kide Yorodan.

⁴ Imasenene iyoŋ anayonae a ŋin, adau ayoŋ akicik ŋikurukwa akitan iyoŋ a nen.”

⁵ Aŋun, abu Eliya tolot, kitiya ikwapei alimunitor Ekapolon anakirot keŋ, tolot iŋes kiboi alodiyete ayonae Ceris, ŋina ayai Kide Yorodan.

⁶ Yaununut ŋikurukwa neni keŋ ŋamugati ka akiriŋ a ŋinataparacu ka a ŋinataboŋ; ido amasi iŋes a nayonae.

⁷ Nai ani elunyar apaki adio, kijuwa ayonae toono deu, anerae amam akiru anakwap a ŋin.

Apuserut ŋina alo Sarepas

⁸ Apaki ŋin, tema Ekapolon neni ke Eliya,

⁹ “Tonyou tokona tolot Sarepas nakwap ŋina eyai Sidon, kiboi a nen. Adau ayoŋ akicik apuserut ŋina eyai nen akitan iyoŋ.”

¹⁰ Aŋun, abu Eliya tonyou a nen, tolot Sarepas. Ani edoluni iŋes lopuke ke etaun, toryamu apuserut a nen ikeyeni ŋakito, tonyara Eliya apuserut ŋin tema, “Inakinae ayoŋ ŋakipi ŋadi a abakuli, ikotere omat.”

¹¹ Ani eriŋa aberu elosi aomikin iŋes ŋakipi, tonyara Eliya aberu tema, “Inunae ayoŋ amugati adio a akan.”

¹² Nai toboŋok aberu ŋin tema, “Ikwapei eyarya Ekapolon Akuj kon, mam ayoŋ amugati epot, ŋakirya ŋadi bon eya ayoŋ locwee ka akimyet adio cici eyai namot. Ekeyeni tokona ayoŋ ŋakito ŋadi a ne, ikotere oboŋo lore epou ŋun aŋuna kaŋ ka aŋuna lokoku kaŋ, emuja ani ekaku eriyaros.”

¹³ Tema Eliya neni keŋ, “Nyikuryaniar, ape kitiya lopite ŋolo ilimunio iyoŋ, nai kipokinoe mono ayoŋ amugati adio a ŋakirya a ŋun ikiinu ayoŋ, kipou nai ekaku ŋina kon ka ŋina alokoku kon,

¹⁴ anerae adau Ekapolon Akuj a Ŋisirael alimun atemar nyedaun ŋakirya alocwee ka nyedaun akimyet anamot akitodol akoloŋit ŋina eyaunia Ekapolon akiru nakwap.”

¹⁵ Abu aberu ŋin tolot kitiya ikwapei alimokinitor Eliya iŋes, aŋun, apotu iŋes ka ekal keŋ ta Eliya torubakis eyakatar akimuj a ŋinakoloŋit.

¹⁶ Apotu ŋakirya nyedaun alocwee, nyedaun tari akimyet anamot, lopite ŋolo alimunitere anakirot ke Ekapolon a ŋina alimuni Eliya.

Kiteyaru Eliya lokoku a apuserut

¹⁷ Ekaku aŋun, todyakakin lokoku ka aberu a ŋin a ŋinalope akai, todyakakin edya ŋol nooi neni aronon, ido kiridak.

¹⁸ Tema apuserut ŋin neni ke Eliya, “Anukiro eya iyoŋ, ŋuna ikitoronitor iyoŋ ayoŋ, okoe ekile ŋolo irae ituŋanan ŋini ka Akuj? Ibu iyoŋ neni kaŋ akitatamun ayoŋ asecit kaŋ ka iyau atwanare neni alokoku kaŋ.”

¹⁹ Nai tema Eliya neni keŋ, “Yau lokoku kon neni kaŋ.” Kijaa Eliya edya anatorobu a toto keŋ, todaka ya nagule ŋina aperi iŋes, ŋina ayai kidiama, kiperik Eliya edya lokitaada keŋ.

²⁰ Kikaloik Eliya Ekapolon tema, “Okoe Ekapolon Akuj kaŋ, iyau iyoŋ ŋican neni ka apuserut a na, a ŋina ikiboiyo ayoŋ, iar lokoku keŋ a?”

²¹ Torwakin nai Eliya neni a edya ŋarwakinet ŋauni, kikaloik Ekapolon tema, “Okoe Ekapolon Akuj kaŋ, kimyek edya lo toyaru.”

²² Kiira Ekapolon akigworo ke Eliya, ido toyaru edya.

²³ Todaku Eliya edya, totiyaaror nagule ŋina alokwap inak neni a toto keŋ tema, “Kiŋolik eyari lokoku kon.”

²⁴ Tema nai aberu ŋin neni ke Eliya, “Ayenu tokona ayoŋ atemar irae iyoŋ ekile ŋolo irae ituŋanan ŋini ka Akuj ka akirot a Ekapolon ŋina irworo iyoŋ, erae ŋina a kire.”