1 Ŋirw. 16 - Ebaibul

¹ Abu akirot ke Ekapolon ŋina etoroniyarit Baasa bu neni a Yeu alokoku ka Anani ebala,

² “Abu ayoŋ eketopoloo iyoŋ anaraakau ecaryoit, eketuruwo ekapolon a ŋituŋa kaŋ a Ŋisirael, nai iwuap iyoŋ ŋuna etiyat Yeroboam ka irikok ŋituŋa kaŋ Ŋisirael nasecit, ido ikitoŋo iyoŋ ayoŋ aŋuna a ŋasecisya kec.

³ Aŋun etoŋopiyari Baasa ke ekal keŋ, kikok ekal keŋ ekal a Yeroboam a lokoku a Nebat.

⁴ Enyamete ŋiŋokwo ŋituŋa a Baasa ŋulu etwanikinete lotaun, ido enyamete ŋikyeny ŋulu eporete ŋituŋa ŋulu etwanikinete nariet.”

⁵ Ŋiticisyo nai a Baasa ŋuluce daadaŋ, ŋuna etiyat iŋes ka arwonu keŋ, igiritae lokitaabo ŋolo a ŋakiro a ŋirwosi a Isirael.

⁶ Totwana nai Baasa, ido aponi tonukae iŋes Tirisa; kilunyokin Ela lokoku keŋ lokicoloŋ keŋ kipuka Isirael.

⁷ Abu daŋ akirot ke Ekapolon ŋina etoroniyarit Baasa ka ekal keŋ bu neni a Yeu alokoku ka Anani, anerae abu Baasa ke ekal keŋ kitiya ŋuna aronok alokiŋaren Ekapolon; kitoŋo Baasa Ekapolon a ŋiticisyo keŋ a ŋulu etiyae iŋes, kitiya lopite ŋolopei abunio Yeroboam ka ekal keŋ kitiyata. Meere ŋun bon, abu daŋ Baasa toar ŋituŋa a ekal a Yeroboam daadaŋ.

Kipuka Ela Isirael

⁸ Alokaru a ŋolo a ŋatomoniarei ka ŋikanikapei ipukat erwosit Asa Yudaya, kisyak Ela lokoku a Baasa akipuka Isirael alo Tirisa. Abu Ela kipuka Isirael ŋikaru ŋiarei.

⁹ Nai abu Simiri eketiyan keŋ ŋolo apolokinit atutubet a ajore keŋ ŋina a ŋagaari a ŋuna eritae a ŋaŋolei totuk akiar iŋes. Apeikoloŋit eyai Ela Tirisa, emata ka emera alo kai ka Arisa a ŋolo apolokinit akai ka apukan alo Tirisa,

¹⁰ bu Simiri tooma kai kicum Ela tocakak kwap toar. Apaki ŋin, arae ŋikaru ŋulu epukator Asa Yudaya ŋatomoniarei ka ŋikanikaarei, abu nai Simiri kilunyokin lokicoloŋ a Ela kipuka Isirael.

¹¹ Ani isyakini iŋes akipuka iboikin lokicoloŋ, abu atipei toar ŋituŋa a ekal a Baasa daadaŋ. Mam ituŋanan ŋinisapat ŋini abu iŋes kimyek eyari ŋini arae iyenet a Baasa, kori ekone.

¹² Tomunya Simiri ŋituŋa a ekal a Baasa daadaŋ, lopite ŋolo alimunitere anakirot ke Ekapolon a ŋina alimuni Ekapolon aneni a ekadwaran Yeu, itoroniyarit Baasa.

¹³ Arae ŋun a ŋuna a ŋasecisya a Baasa ka ŋasecisya ŋuna ka Ela alokoku keŋ, ŋasecisya ŋuna kepotu ikes kitiyata, ido apotu torikokis Ŋisirael, toseca, ido apotu kitoŋoa Ekapolon Akuj a Ŋisirael a ŋakujo kec.

¹⁴ Ŋiticisyo nai ke Ela ŋuluce daadaŋ, ŋuna daadaŋ etiyat iŋes igiritae lokitaabo ŋolo a ŋakiro a ŋirwosi a Isirael.

Apukan ŋina a ŋauni: Kipuka Simiri Isirael

¹⁵ Ani edolete ŋikaru ŋulu epukator erwosit Asa Yudaya ŋatomoniarei ka ŋikanikaarei, kisyak Simiri akipuka Isirael alo Tirisa. kipuka ŋirwa ŋikanikaarei bon. Apaki ŋin, erikaunit ajore a Ŋisirael etaun a Ŋipilistin ŋolo anyaritae Gibeson.

¹⁶ Ani iirarete Ŋisirael ŋulu erikaunito Gibeson atemar aluki Simiri erwosit aar, kitopoloosi ikes Omiri ŋolo arae ekarikon a ajore, kituruwosi erwosit a Isirael akoloŋit ŋinapei ŋin aneni erikaunitotor ikes Gibeson.

¹⁷ Aŋun, abu Omiri toboŋo alo Gibeson kaapei ka Ŋisirael daadaŋ, kirikaut Tirisa.

¹⁸ Ani eanyuni Simiri atemar ekamar etaun, tolot kai ke erwosit neni aoya alokidiama, kicunyak akai ke erwosit tonom akim iŋes a nen totwan.

¹⁹ Arae ŋun aŋuna a ŋasecisya a ŋuna abu iŋes kitiya aronis ŋina etiyae iŋes alokiŋaren Ekapolon, iwuapit ŋipitesyo a Yeroboam. Arae daŋ ŋun aŋuna ka asecit a ŋina abu iŋes kitiya, torikokinia Ŋisirael nasecit.

²⁰ Ŋiticisyo nai a Simiri ŋuluce daadaŋ ka ayere ŋuna abu iŋes kitiya, igiritae lokitaabo ŋolo a ŋakiro a ŋirwosi a Isirael.

Apukan ŋina a ŋaomwon: Kipuka Omiri Isirael

²¹ Apaki ŋin, totyakas ŋituŋa a Isirael ŋaarei. Toriwo atutubet apei ka Tibini lokoku a Ginas, akituruwor ŋol erwosit kec. Toriwo atutubet ŋinace ka Omiri.

²² Nai apotu ŋituŋa ŋulu ariito ka Omiri toreut ŋulu ariito ka Tibini lokoku a Ginas. Aŋun, aponi toarae Tibini ido, abu Omiri toruwor erwosit a Isirael.

²³ Alokaru a ŋolo a ŋatomoniuni ka epei ipukat erwosit Asa Yudaya, kisyak Omiri akipuka Isirael. Abu iŋes kipuka Isirael ŋikaru ŋitomon ka ŋiarei, ŋikanikapei alo Tirisa.

Kituruworoe Samaria etaun ŋolo apol alo Isirael

²⁴ Abu Omiri togyel emukura ŋolo enyaritae Samaria aneni a Semer a ŋitalentae a ŋiarei a ŋulu a esilipa; toduk iŋes lomukura ŋol ejok, tolimok ekiro ke etaun Samaria, ekiro a Semer a elope emukura.

²⁵ Abu Omiri kitiya ŋuna aronok alokiŋaren Ekapolon, kitiya iŋes ŋuna aronok nooi akilo ŋuna itiyato daadaŋ ŋulu epukato eriŋa iŋes.

²⁶ Abu iŋes kiwuap ŋuna etiyat Yeroboam lokoku a Nebat ka abu kiwuap asecit ŋina abunio Yeroboam torikokinia Ŋisirael nasecit kitoŋo Ekapolon Akuj a Ŋisirael a ŋakujo kec.

²⁷ Ŋiticisyo nai a Omiri ŋuluce daadaŋ ŋulu etiyat iŋes, arwonu keŋ ŋina abu iŋes kitoodiu, igiritae lokitaabo ŋolo a ŋakiro a ŋirwosi a Isirael.

²⁸ Abu Omiri totwana ido, aponi tonukae iŋes Samaria; kilunyokin Aab lokoku keŋ lokicoloŋ keŋ kipuka Isirael.

Kipuka Aab Isirael

²⁹ Alokaru a ŋolo a ŋatomoniuni ka ŋikanikauni ipukat erwosit Asa Yudaya, kisyak Aab lokoku a Omiri akipuka Isirael; abu Aab lokoku a Omiri kipuka Isirael alo Samaria todolo ŋikaru ŋatomoniarei ka ŋiarei ipukat iŋes.

³⁰ Abu Aab lokoku a Omiri kitiya ŋuna aronok alokiŋaren Ekapolon, kitiya iŋes ŋuna aronok nooi akilo ŋuna etiyato daadaŋ ŋulu epukato eriŋa iŋes.

Kiit Aab Yesebel, ido kisyak akilip neni a Baal

³¹ Ikwapei atakania aneni ka Aab esibit edit ŋina abunio iŋes kiwuapya ŋuna etiyat Yeroboam alokoku a Nebat, abu Aab kiit Yesebel nakoku a Esibaal a erwosit a ŋolo a Sidon, ido kisyak akitiyanakin Baal ka akilip neni a Baal.

³² Todukok iŋes Namuroet aŋuna a Baal kai a Baal ŋina abu iŋes todukok Samaria.

³³ Kitiyau Aab tari etorube a akuj a ŋina enyaritae Asera, kitiya ŋace ŋuna alalak ŋuna apotu kitoŋoa Ekapolon Akuj a Ŋisirael, kitiya iŋes ŋuna aronok nooi akilo ŋuna etiyato ŋirwosi daadaŋ ŋulu epukato Isirael eriŋa iŋes.

³⁴ Alorwa a ŋulu epukator iŋes, abu Kiel ŋolo alo Besel todukok Yeriko, todukok akisyakinet ŋina ka arwatata etacit kan Abiram lokoku keŋ ŋolo kiyae, ido tosipok ŋipukei etacit kan Segub lokoku keŋ ŋolo ŋororit, lopite ŋolo alimunitere anakirot ke Ekapolon aŋina alimuni Yosua a lokoku a Nun.