1 Ŋirw. 15 - Ebaibul

Kipuka Abiyam Yudaya

¹ Alokaru a ŋolo a ŋitomon ka ŋikanikauni ipukat erwosit Yeroboam lokoku a Nebat Isirael, Kisyakini Abiyam akipu Yudaya.

² Kipuka iŋes Yudaya alo Yerusalem ŋikaru ŋiuni. Arae ekiro a toto keŋ Maaka nakoku ka Abisalom.

³ Abu Abiyam kitiya aronis daadaŋ ŋina sek etiyato papa keŋ pa eyookino etau keŋ aneni ke Ekapolon ka Akuj keŋ, pa ekoni etau keŋ ŋolo a Daudi a papaa keŋ.

⁴ Kikote neni daŋ aŋuna a Daudi, abu Ekapolon Akuj keŋ kiturubak ŋituŋa a Daudi eyakasi Yerusalem aŋuna abunio kilunyokinia lokoku keŋ kipuka ka aŋuna abunio kituruworya Yerusalem akibois ŋina emam ituŋanan ereuni.

⁵ Arae ŋun aŋuna abunio Daudi toruwor ŋolo eyookino alokiŋaren Ekapolon, ido nyimyekina iŋes akiwuap adio a ŋakiciketa ke Ekapolon ŋirwa daadaŋ ŋulu ka akiyar keŋ, mati ŋuna ka atwanare a Uria bon a ŋolo arae Eitait.

⁶ Torubak ejie eyai kidiŋ Reoboam ŋirwa daadaŋ ŋulu ka akiyar ka Abiyam.

⁷ Ŋiticisyo ka Abiyam ŋuluce daadaŋ ka ŋuna daadaŋ etiyat iŋes, igiritae lokitaabo ŋolo a ŋakiro a ŋirwosi a Yudaya. Apotu Abiyam ka Reoboam torubakis ejiete.

⁸ Abu Abiyam totwana, ido aponi tonukae iŋes lotaun a Daudi. Abu nai lokoku keŋ Asa kilunyokin lokicoloŋ keŋ kipuka Yudaya.

Kipuka Asa Yudaya

⁹ Alokaru a ŋolo a ŋatomoniarei ipukat erwosit Yeroboam Isirael, kisyak Asa akipuka Yudaya.

¹⁰ Kipuka iŋes Yudaya alo Yerusalem ŋikaru ŋatomoniomwon ke epei. Arae ekiro a toto keŋ Maaka nakoku ka Abisalom.

¹¹ Abu Asa kitiya ŋuna eyookino alokiŋaren Ekapolon, lopite ŋolo abunio Daudi papaa keŋ kitiyaa.

¹² Abu iŋes tolema ŋimalaae ka ŋamalaae anakiboisyo a ŋuna elipyata ŋituŋa alo Yudaya. Tolema iŋes nakujo ŋuna kepotu atapapaa keŋ kitiyaut.

¹³ Tolema iŋes tari Maaka toto keŋ anarakau arwosit anerae, kebu kitiyau etorube a akuj aŋina enyaritae Asera. Abu Asa toyepak akuj ŋin kwap tosodi kicuny anauwat a ŋina a Kidiron.

¹⁴ Nai pa abu iŋes tolema ŋaduketa ŋuna aya nenimukur. Tari pa kelemarit ŋun, eyookino etau ka Asa aneni ke Ekapolon ŋirwa daadaŋ ŋulu ka akiyar keŋ.

¹⁵ Abu Asa yau Kai ke Ekapolon ŋainakineta a papa keŋ ŋuna asegak ka ŋainakineta keŋ ke elope ŋuna asegak; ŋainakineta ŋuna ke esilipa, a egolid ka ŋiboro ŋulukimujet.

Toriwo Yudaya ka Aram akitijiore Isirael

¹⁶ Apotu Asa ka Baasa erwosit ŋolo a Isirael torubakis ejiete ŋirwa daadaŋ ŋulu ka akiyar kec.

¹⁷ Abu Baasa erwosit ŋolo a Isirael kitipeiyo Yudaya kisyak akiduk Rama kojokon, aŋuna ka akiretakin ituŋanan ŋini ebuni aneni ka Asa, kori elosi neni ka Asa a erwosit a ŋolo a Yudaya.

¹⁸ Aŋun nai, abu Asa tolemu esilipa daadaŋ ka egolid ŋolo edoŋit lositowae ŋulu ka Akai ke Ekapolon ka lositowae ŋulu ka akai ke erwosit, inak ŋiboro ŋul neni a ŋiketiyak keŋ. Kiyakiya Asa ŋiketiyak keŋ ŋul neni a erwosit Ben-Adad a lokoku a Tabirimon a ŋolo arae lokoku ka Esion a ŋolo alo Aram. Eboi Ben-Adad alo Damasko apaki ŋin. Temasi ŋiketiyak ŋul neni a Ben-Adad abala Asa,

¹⁹ “Oriwo iyoŋ ka ayoŋ, lopite ŋolo ariitotor papa kaŋ ka papa kon; ekeyakikinit ayoŋ iyoŋ ŋainakineta ŋuna a esilipa ka egolid; toŋer tokona ariit ka Baasa, erwosit ŋolo a Isirael, ikotere iŋes eboŋori nyeketijik ayoŋ.”

²⁰ Kiira Ben-Adad ŋakiro ka Asa a erwosit, ido kiyakiya ŋikarikok a ŋajorei keŋ akirem ŋitaunio ŋulu a Isirael. Toreu iŋes ŋitaunio lu: Ijon, Dan, Abel-Bes-Maaka ka akwap ŋina anyaritae Keneres daadaŋ ta akwap a Naputali daadaŋ.

²¹ Ani iirari Baasa ŋakiro ŋun, tojoŋo akiduk Rama, toboŋo kiboiyo Tirisa.

²² Tolimok nai Asa ŋituŋa a Yudaya daadaŋ atemar emaikina ŋituŋa daadaŋ emam akimyekin tari idio, toloto kiwokut ŋamoru ka ŋakito alo Rama ŋuna sek adukio Baasa. Abu erwosit Asa kisitiya ŋamoru ka ŋakito ŋun adukio Geba ka Misipa, ŋitaunio ŋulu aya Benjamin.

²³ Ŋiticisyo nai ka Asa ŋuluce daadaŋ, arwonu keŋ a daadaŋ ka ŋuna etiyat iŋes daadaŋ ta ŋitaunio daadaŋ ŋulu abu iŋes toduk, igiritae lokitaabo ŋolo a ŋakiro a ŋirwosi a Yudaya. Nai ani edoli ŋirwa ŋulu amojoŋia Asa, todyakakin ŋakejen.

²⁴ Totwana nai Asa, ido tonukae lotaun a Daudi a papaa keŋ, neni anukitae atapapaa keŋ. Abu lokoku keŋ Yeosapat kilunyokin lokicoloŋ keŋ kipuka Yudaya.

Kipuka Nadab Isirael

²⁵ Alokaru a ŋolo a ŋiarei ipukat Asa Yudaya, kisyak Nadab lokoku a Yeroboam akipuka Isirael. Kipuka Nadab Isirael ŋikaru ŋiarei bon.

²⁶ Abu iŋes kitiya ŋuna aronok alokiŋaren Ekapolon, kiwuap ŋuna etiyat papa keŋ ŋuna arikokinia Ŋisirael nasecit.

²⁷ Abu Baasa lokoku ka Aija a ŋolo alokabila ka Isakar totuk akiar Nadab, kitijik iŋes alo Gibeson alotaun a Ŋipilistin a ŋolo kepotu Nadab ka Ŋisirael daadaŋ kirikaut togolo.

²⁸ Aari Baasa Nadab alokaru a ŋolo a ŋiuni ipukat Asa Yudaya, ido abu Baasa kilunyokin lokicoloŋ a Nadab kipuka Isirael.

²⁹ Aruwaor iŋes erwosit bon, abu toar ŋituŋa a ekal a Yeroboam daadaŋ. Mam ituŋanan a Yeroboam abu iŋes kimyek eyari, nai abu tomunya daadaŋ, ikwapei alimokinitere anakirot ke Ekapolon a ŋina alimuni Aija eketiyan ke Ekapolon ŋolo alo Silo.

³⁰ Arae ŋun aŋuna a ŋasecisya a Yeroboam ka aŋuna abunio iŋes torikokinia Ŋisirael nasecit ta aŋuna abunio iŋes kitoŋoya Ekapolon Akuj a Ŋisirael.

³¹ Ŋiticisyo nai a Nadab ŋuluce daadaŋ ka ŋuna daadaŋ etiyat iŋes, igiritae lokitaabo ŋolo a ŋakiro a ŋirwosi a Isirael.

³² Apotu Asa ka Baasa erwosit ŋolo a Isirael torubakis ejiete ŋirwa daadaŋ ŋulu ka akiyar kec.

Apukan ŋina a ŋaarei: Kipuka Baasa Isirael

³³ Alokaru a ŋolo a ŋiuni ipukat erwosit Asa Yudaya, kisyak Baasa akipuka Isirael alo Tirisa; kipuka iŋes Isirael ŋikaru ŋatomonairei ka ŋiomwon.

³⁴ Abu Baasa kitiya ŋuna aronok alokiŋaren Ekapolon, kiwuap ŋuna etiyat Yeroboam ka asecit ŋina abu Yeroboam torikok Ŋisirael toseca.