1 Ŋirw. 13 - Ebaibul

Ekile alo Yudaya ŋolo arae ituŋanan ŋini ka Akuj

¹ Ani eriŋa Yeroboam ewoi alodiye Namuroet icunyanakini ekinyate, bu ekile ŋolo alo Yudaya ŋolo arae ituŋanan ŋini ka Akuj, ayakar ekile ŋol akirot aneni ka Akuj aŋuna a Besel.

² Kisera ekile ŋol akirot ke Ekapolon ŋina etoroniyarit Namuroet ŋina alo Besel tema, “Okoe Namuroet, Namuroet, ebala Ekapolon ebe, ‘Idounio ikoku ŋinisapat alokal a Daudi enyarao ekiro keŋ Yosia, eŋolikini iŋes kidiama kon ŋisacaradoti ŋulu a ŋakiboisyo aŋunamukur ŋulu tokona icunyete ekinyate alo kidiama kon eruwor ŋakoyo a ŋituŋa icunyo alo kidiama kon.’ ”

³ Abu ekile ŋol kitoodiu akoloŋit ŋinapei emacar a ŋakiro a ŋun tema, “Erae lo emacar a ŋakiro a ŋun ŋolo itookiunit atemar adau Ekapolon alimun ŋun, ‘Ebwaŋabwaŋaryo Namuroet na, ido ebukoryo ekuron ŋolo eyai kidiama keŋ.’”

⁴ Ani iirari erwosit ŋakiro ŋuna etoroniyarito Namuroet ŋina a Besel, ŋuna erworo ekile ŋolo arae ituŋanan ŋini ka Akuj, tododa Yeroboam akan keŋ Namuroet tema, “Kikamutu ekile ŋol!” Nai abu akan keŋ ŋina adodarit iŋes lokile ŋol toiniya, nyepedo iŋes akinyakun akan keŋ nakuwan keŋ.

⁵ Abu Namuroet daŋ tobwaŋabwaŋaar, tobukor ekuron ŋolo ayai Namuroet, kiyookinos ŋakiro ŋuna alimunit ekile ŋolo arae ituŋanan ŋini ka Akuj ŋolo erworo akirot ke Ekapolon ŋin.

⁶ Tema erwosit neni a ekile a ŋol a ŋolo arae ituŋanan ŋini ka Akuj, “Kilip tokona neni ke Ekapolon Akuj kon, kilipakinae ayoŋ, ikotere tojokyar akan kaŋ.” Aŋun, abu ekile ŋolo arae ituŋanan ŋini ka Akuj kilip neni ke Ekapolon, ido abu akan a erwosit tojokyar, kikok nenipei sek.

⁷ Tema nai erwosit neni a ekile a ŋolo arae ituŋanan ŋini ka Akuj, “Bua apena lore emuja, ido okoinak ayoŋ iyoŋ ainakinet.”

⁸ Nai tema ekile ŋolo arae ituŋanan ŋini ka Akuj neni a erwosit, “Tari kikiinak iyoŋ ayoŋ atutubet apei ŋina ka akwap kon, nyikilosi ayoŋ ka iyoŋ lore kon, mam tari nyemuji ayoŋ akimuj, kori nyamasi ŋakipi anakibois a na,

⁹ anerae, aponi ekeciki ayoŋ anakirot ke Ekapolon temarae: Nyimuj akimuj, kori nyimat ŋakipi, kori nyimet iboŋuni erot ŋolo imyat iyoŋ ilosi.”

¹⁰ Aŋun, abu iŋes tomek erot ece, nyemek eboŋori erot ŋolo amyat iŋes ebuni Besel.

¹¹ Apaki ŋin, ayai Besel ekadwaran ŋolo amojoŋit. Tolimok epei a ŋidwe keŋ a ŋulusapa iŋes ŋakiro daadaŋ ŋuna kebu ekile ŋolo arae ituŋanan ŋini ka Akuj kitiya akoloŋit ŋin alo Besel; tolimokis daŋ ŋidwe ŋul papa kec ŋakiro daadaŋ ŋuna kebu ekile ŋol kirwor neni a erwosit.

¹² Kiŋit papa kec ikes tema, “Alirot abu iŋes tomek?” Kitoodikis ŋidwe ŋulusapa ŋul papa kec erot ŋolo kebu ekile ŋolo arae ituŋanan ŋini ka Akuj, ŋolo abunit alo Yudaya tomek.

¹³ Tema nai iŋes neni a ŋidwe keŋ a ŋulusapa, “Toenikisi esigirya aŋuna kaŋ.” Aŋun, apotu ŋidyain ŋul toenikis esigirya aŋuna keŋ, ido todoka iŋes losigirya.

¹⁴ Abu ekadwaran ŋol kiwuap ekile ŋolo arae ituŋanan ŋini ka Akuj ŋolo toryamu iboi alokwap ekuyon. Kiŋit tema, “Irae iyoŋ ekile ŋolo erae ituŋanan ŋini ka Akuj ŋolo abunit alo Yudaya?” Toboŋok ekile ŋol tema, “Arae.”

¹⁵ Tema nai ekadwaran neni a ekile a ŋol, “Bua apena lore kimuj akimuj adio.”

¹⁶ Nai toboŋok iŋes tema, “Nyapedori ayoŋ aboŋor ka iyoŋ, kori nyikimasi ayoŋ ka iyoŋ ŋakipi anakibois a na;

¹⁷ anerae, aponi okolimokin ayoŋ nu anakirot ke Ekapolon atemar nyimuj akimuj kori nyimat ŋakipi a nen, kori nyimek iboŋuni erot ŋolo imyat iyoŋ ilosi nen.”

¹⁸ Tema nai ekadwaran ŋolo amojoŋit ŋol neni keŋ, “Ayoŋ daŋ arae ekadwaran ikwapei iyoŋ, ido abu emalaika kirwor neni kaŋ ŋakiro ke Ekapolon ebala, ‘Kinyaku iŋes toboŋut ka iyoŋ kai kon, ikotere iŋes imuji akimuj ka emasi ŋakipi.’ ” Nai amodikinit ekadwaran ŋol ekile ŋol.

¹⁹ Aŋun, abu ekile ŋolo arae ituŋanan ŋini ka Akuj ŋol toboŋosi ka ekadwaran ŋol, kimuj ka tomat ŋakipi alo kai a ekadwaran a ŋol.

²⁰ Ani eriŋa ikes iboiyete alomesa bu akirot ke Ekapolon neni a ekadwaran a ŋolo etoboŋuni ekile ŋol;

²¹ Kiserak ekadwaran ŋol ŋakiro lokile ŋolo arae ituŋanan ŋini ka Akuj ŋolo abunit alo Yudaya tema, “Ŋakiro ŋuna irworo Ekapolon ikes nu, ‘Aŋuna iŋeryo iyoŋ akirot ŋina ke Ekapolon ka nyiwuapa iyoŋ ŋakiciketa ŋuna abu Ekapolon Akuj kon ikicik iyoŋ,

²² nai iboŋu, ido imuj akimuj ka imat ŋakipi anakibois a na a ŋina ikilimokinit Ekapolon iyoŋ atemar nyimuj akimuj, kori nyimat ŋakipi,’ nyenukyo akuwan kon neni enukitae atapapaa kon.”

²³ Ani irikakini ekile ŋolo arae ituŋanan ŋini ka Akuj akimuj ka akimat, toenik ekadwaran esigirya keŋ aŋuna a ekile a ŋol.

²⁴ Ani nai erotokini iŋes, kiryamunos ke eŋatuny lorot, toar eŋatuny iŋes, kimasak akuwan keŋ nen lorot, torubak esigirya ewoi a nen alodiye akuwan keŋ, eŋatuŋ daŋ torubak ewoi a nen.

²⁵ Tolunyanarosi ŋituŋa alorot a ŋol iteete akuwan keŋ eperi alorot, kiteete eŋatuŋ daŋ ewoi alodiye akuwan, ido potu ŋituŋa ŋul toloto lotaun ŋolo eboiyo ekadwaran ŋolo amojoŋit tolimosi ŋakiro.

²⁶ Ani iirari ekadwaran ŋolo etoboŋuni ekile ŋol ŋakiro ŋun, abu tema, “Erae ekile ŋolo erae ituŋanan ŋini ka Akuj ŋolo abu toŋer akirot ŋina ke Ekapolon; ŋun, ainaki Ekapolon iŋes neni ke eŋatuŋ a ŋolo anyilinyiliya ka aar iŋes lopite ŋolo aris Ekapolon kelimokinia iŋes.”

²⁷ Tolimok nai ekadwaran ŋol ŋidyain keŋ tema, “Toenikisi esigirya aŋuna kaŋ.” Aŋun, apotu ikes toenikis esigirya epei.

²⁸ Torotok nai iŋes toryamu akuwan a ekile a ŋol imasakinitae lorot, ewuasi esigirya ka eŋatuŋ alodiyete akuwan. Ariŋa eŋatuŋ nyenyama akuwan ŋin, kori nyisiiryakina esigirya.

²⁹ Tolemu ekadwaran ŋol akuwan a ekile a ŋolo arae ituŋanan ŋini ka Akuj todakak losigirya, toboŋunio lotaun, kigwor mono aŋuna keŋ, ido tonuk.

³⁰ Tonukak iŋes akuwan a ekile a ŋol nakipany ŋina abokit iŋes aŋuna keŋ ke elope; ido kigworo ikes aŋuna a ekile a ŋol ebasi, “Oitakoi! lokaato kaŋ!”

³¹ Ani kedau ekadwaran akinuk iŋes tolimok ŋidyain keŋ tema, “Ani atwani ayoŋ tonukakinae ayoŋ nakipany ŋina enukakinitae ekile ŋol ŋolo arae ituŋanan ŋini ka Akuj, kiperikis ŋakoyo kaŋ diyete ŋakoyo keŋ,

³² anerae, iyookin kire jik akirot ŋina ke Ekapolon, ŋina abu iŋes kisera itoroniyarit Namuroet ŋina a Besel ka itoroniyarit ŋakais ŋuna amuroet anakiboisyo a ŋuna ayakasi nenimukur alotaunio a ŋulu a Samaria.”

³³ Tari ŋina aponiata ŋakiro ŋun kitiyakin, pa abu Yeroboam toesik akitiya aronis aŋuna a ŋakiboisyo nai abu torubak iwuanakini ŋisacaradotin alotuŋa ca a daadaŋ aŋuna ayakasi nenimukur. Ituŋanan daadaŋ ŋini acamit aruwor esacaradoti, abu iŋes kituruwo, kiwuak nakiboisyo ŋuna ayakasi nenimukur.

³⁴ Arae ŋun asecit ŋina a ekal a Yeroboam, ŋina abu yau neni kec abukor ka amunyaro anakwap.