1 Ŋirw. 10 - Ebaibul

Apeyo a arwosit a ŋina alo Seba

¹ Ani iirari arwosit ŋina alo Seba arwonu a Solomon, (arwon ŋina araakar ekiro ke Ekapolon eturuunit iŋes), abu arwosit ŋin bu akikatakin Solomon a ŋakiŋiseta a ŋuna atyoko.

² Abu arwosit ŋin bu Yerusalem, torukut ka ŋituŋa ŋulu alalak, ŋikaala ŋulu ewokito ŋikito ŋulu akukunyok, egolid ŋolo alalan nooi ka ŋamoru ŋuna epol egyelit. Abu arwosit ŋin bu neni a Solomon kiyana ka iŋes ŋakiro daadaŋ ŋuna ayakar iŋes.

³ Toboŋonok Solomon ŋakiŋiseta keŋ daadaŋ mam ŋakiro abu erwosit toryamu etyoko akisileerekin arwosit ŋin.

⁴ Ani kedau arwosit ŋina a Seba akiŋolikin aosou a Solomon daadaŋ, akai ŋina kebu Solomon toduk,

⁵ akimuj ŋina ayai lomesa keŋ, epite ŋolo eboiyoto ŋikapolok anapukan a Solomon, epite ŋolo etiyaata ŋiketiyak ŋulu etiyanakinete Solomon, epite ŋolo anapitotor ŋiketiyak ŋul, epite ŋolo ayakatar ŋulu ayaununeete ekopo neni a Solomon ka ŋainakineta ŋuna epeyo ŋuna aayenene Solomon Kai ke Ekapolon, toumok arwosit ŋin nooi todaun ŋuna elimuni.

⁶ Tema arwosit ŋin neni a Solomon, “Iyookino ŋakiro ŋuna abu ayoŋ eira anakwap kaŋ, ŋuna a ŋiticisyo a ŋulu idau iyoŋ akitiya ka ŋuna ka aosou kon.

⁷ Nai pa abu ayoŋ onup ŋakiro ŋun akitodol ŋina abunio ayoŋ ne eŋolik a ŋakonyen kaŋ ka alope. Kire, pa akalimokinitae ayoŋ tari atutubet apei a ŋuna eŋolik; anaosou kon ka alobari kon, eŋolik ayoŋ ŋuna edeparito ŋuna aris ayoŋ keira.

⁸ Okoe etya alakara a ŋikilyok a akwap kon ai! Okoe etya alakara a ŋikapolok anapukan kon ai a ŋulu irukito ka iyoŋ jwi jwi topupete ŋakiro ŋuna ka aosou ŋuna irworo iyoŋ ai!

⁹ Akipuro toyai neni ke Ekapolon Akuj kon, ŋina alakari a ŋuna kon, ido ikiinak iyoŋ akiboikin lokicoloŋ ikwapei erwosit a ŋituŋa a Isirael. Aŋuna ka amina ka Akuj Ŋisirael ŋikaru ka ŋikaru, ikituruwo iŋes iyoŋ erwosit, ikotere itubi ŋakiro anakiyookino ka kitiyae ŋuna iyookino.”

¹⁰ Inak nai arwosit ŋina a Seba erwosit ŋatalantae amiat ka ŋatomoniarei ŋuna ke egolid, ŋikito ŋulu ekukuny ŋulu alalak ka ŋamoru ŋuna epol egyelit; mam apaki ace ŋina ayaunitere neni a Solomon ŋikito ŋulu ekukuny ŋulu alalak, ŋulu etya ŋulu abu arwosit ŋina a Seba inak erwosit Solomon.

¹¹ Apotu daŋ ŋameeli a Iram ŋuna ewokunitere egolid alo Opir, yaut alo Opir ŋakito ŋuna alalak ŋuna enyaritae Alemugim ka ŋamoru ŋuna epol egyelit.

¹² Abu erwosit kitiyau anakito a ŋuna ka Alemugim ŋipirin ka Akai ke Ekapolon, ka ŋipirin ŋulu ka akai ke erwosit, ŋagitae ka ŋaduŋgui, ŋuna a ŋikaeok; mam ŋakito ŋuna alalak ŋuna atya ŋun ŋuna aponi yaunae Isirael kori eŋolikin tari tokona.

¹³ Abu nai erwosit Solomon inak arwosit ŋina a Seba ibore daadaŋ ŋini acamit iŋes ka ŋini eŋita iŋes pa imarakinitae ŋulu abu Solomon inak iŋes alobari keŋ a ŋolo a ekepukan. Abu nai arwosit ŋin toboŋo nakwap keŋ kaapei ka ŋiketiyak keŋ.

Ebari a Solomon

¹⁴ Aryamununui Solomon a ŋolokaru egolid ŋolo arae apotis keŋ ŋitalantae ŋamiae ŋakanikapei ka ŋatomonikanikapei ka ŋikanikapei,

¹⁵ pa imarakinitae ŋolo aryamununui iŋes aneni a ŋimucurus ka aneni a ŋirwosi a daadaŋ a ŋulu ka Arabia ta aneni a ŋikapolok anakwap keŋ.

¹⁶ Abu erwosit Solomon kitiyau ŋaupala ŋuna apolok ŋamiae ŋaarei a egolid a ŋolo etyekitae, kitiyau iŋes ŋinaupal a egolid a ŋolo arae ŋakiloi ŋauni ka atutubet.

¹⁷ Abu Solomon kitiyau ŋaupala ŋuna cicik ŋamiae ŋauni a egolid a ŋolo etyekitae, kitiyau iŋes ŋinaupal a egolid a ŋolo aapiyaritŋakiloi ŋaarei. Kiwuak erwosit ŋaupala ŋun kai ka apukan ŋina anyaritae Akai ŋina ka Amoni a Lebanon.

¹⁸ Kitiyau daŋ erwosit ekicoloŋ a ŋikyal a ŋitome, toburusik egolid ŋolo ajokan nooi lokicoloŋ ŋol.

¹⁹ Ayakasi lokicoloŋ ŋol ŋadoketa ŋakanikapei. Aluluŋ kaku alokidiama ekicoloŋ ŋol, ayai ŋolowae a ekicoloŋ a ŋol neni apete ŋakan a ituŋanan iboi. Diyete neni apeneneete ŋakan, ayakasi ŋitorubei a ŋiŋatunyo ŋiarei ŋulu awuasi.

²⁰ Awuasi daŋ ŋitorubei a ŋiŋatunyo ŋitomon ka ŋiarei anadoketa a ekicoloŋ a ŋol, epei ŋatuny epeiwae neni isalya ŋinadoket alotooma ŋadoketa ŋunakanikapei. Mam ibore etiyatae anakwap ka adio ŋini ekwaan ka ekicoloŋ ŋol.

²¹ Ŋiboro daadaŋ ŋulu amasya erwosit Solomon, arae ŋulu etiyaunitae a egolid ka ŋiboro daadaŋ ŋulu ayakasi kai ŋina anyaritae Akai ŋina ka amoni a ŋina alo Lebanon, arae ŋulu etiyaunitae a egolid bon, meere a esilipa, anerae arae esilipa ibore koŋin alorwa a ŋulu a Solomon.

²² Ayakar erwosit ŋameeli ŋuna alalak ŋuna alo Tarisis ŋuna kicurutaet ananam kaapei ka ŋuna a Iram. Ayaununeete ŋameeli ŋuna alo Tarisis egolid, esilipa, ŋikyal a ŋitome, ŋicomin ka ŋikyeny ŋulu ebusak, apeiyaunet kelunyar ŋikaru ŋiuni.

²³ Aŋun, abarit ka aos erwosit Solomon nooi akilo ŋirwosi ŋuluce daadaŋ anakwap.

²⁴ Apotu ŋituŋa daadaŋ anakwap kiitana akiryamun ka Solomon, ikotere iirarete ŋuna ka aosou keŋ a ŋina kebu Akuj kiwuak natameta keŋ.

²⁵ Ayaununui ŋinituŋanan abuni aanyun Solomon ŋiboro ŋulu arae ŋainakineta ŋulu etiyaunitae a esilipa ka egolid. Ayaununeete ikes ŋilowi, ŋiboro ŋulujiet, ŋikito ŋulu ekukuny, ŋaŋolei ka ŋaŋolei-sigirya. Ayaununuyo ŋul elalak a ŋolokaru.

²⁶ Tocunak Solomon iwapei ŋagaari ka ŋaŋolei, arae ekimar a ŋagaari a ŋuna ayakar iŋes aliput ka ŋamiae ŋaomwon ka arae ekimar a ŋaŋolei ŋalipyo ŋatomon ka ŋaarei ŋulu edaritere ikes ka ŋace kiwuak Yerusalem neni eboiyo iŋes.

²⁷ Abu erwosit kitepetu esilipa alo Yerusalem ikwa ŋamoru ka abu kitalala ŋikito a Cedar nooi ikwa ŋikito ŋulu ke eki ŋulu aya Sepela.

²⁸ Agyelununui Solomon ŋaŋolei nakwap keŋ alo Ijipit ka alo Kue, ido arae ŋimucurus ŋulu a erwosit ikes agyelununeete ŋaŋolei ŋun alo Kue.

²⁹ Agyelununuyo ŋagaari a Ijipit a ŋicekelya a ŋulu a esilipa a ŋamiae a ŋakanikapei, ido agyelununuyo ŋaŋolei a ŋicekelya a ŋulu a esilipa a amiat ka ŋatomonikan. Agyelanarete ŋimucurus a erwosit ŋaŋolei ŋun ka ŋagaari ŋun lorwosi ŋulu a Ŋiitaiti ka ŋulu ka Aram.