1 Ŋirw. 1 - Ebaibul

Tomaryae akilunyokin lokicoloŋ a Daudi

¹ Abu erwosit Daudi tomojoŋ, tolalata ŋikaru nooi, tolilimiyo akuwan keŋ, tari daŋ ŋina imukorere iŋes a ŋilowi, apa apedori nen akitomwanun akuwan keŋ.

² Aŋun, apotu ŋiketiyak keŋ temasi neni keŋ, “Erwosit Ekapolon kosi kimyek ikiwarakin apese ŋina nyiryamakina ka ekile, itowoik iyoŋ apese ŋin, toruwor akedaran kon. Emaikina iŋes inapakina losyepi kon, ikotere nai kitomwanu akuwan a ekapolon a erwosit kosi.”

³ Aŋun, apotu ikes kiwarut apese ŋina ebusan alotooma akwap ŋina a Ŋisirael daadaŋ, toryamut Abisag ŋina arae Asunamit, yaut iŋes neni a erwosit.

⁴ Ebus apese ŋin nooi. Abu iŋes toruwor akedaran a erwosit, kitiyanak erwosit, nai abu erwosit nyituruwo iŋes aberu keŋ.

⁵ Apaki ŋin, abu Adoniya lokoku ka Agis kitopoloor bon tema, “Ayoŋ aruwwor erwosit;” abu kitemok aŋuna keŋ ŋikametok ŋaŋolei ta ŋikilyok ŋatomonikan ŋulu iŋarenikinete iŋes.

⁶ Mam sek ka aŋorot akoloŋit apei daŋ ŋina abunio papa keŋ kitoŋoya Adoniya kiŋit tema, “Kaanukiro itiyaa iyoŋ ikoŋina?” Arae daŋ Adoniya ekile ŋolo ebus, iŋes edounio ekaku Abusalom.

⁷ Kepotu Adoniya tocamunos ka Yoab lokoku a Seruia ta esacaradoti Abiasar. Tocamut ŋul akiri ka Adoniya.

⁸ Nai apotu esacaradoti Sadok ka Benaia lokoku a Yekoiyada ka ekadwaran Nasan ka Semei ka Rei ta ŋikilyok ŋulu ajiok ŋulu arae ŋirukitos a Daudi toŋero akiri ka Adoniya.

⁹ Abu Adoniya kitiya ŋamuronisya, toar ŋibaren ŋulu atumak, toar ŋamesekin, ŋimoŋin ka ŋaatuk, toarak ikes nakibois ŋina anyaritae, aamoru ŋina a emun ŋina ayai diyete ecowa Eu-Rogel. Tonyarau iŋes ŋikaitotoi keŋ daadaŋ, ŋidwe a erwosit ŋulusapa ka ŋikilyok ŋulu a Yudaya daadaŋ ŋulu epukatotor erwosit.

¹⁰ Nai abu iŋes nyenyara ekadwaran Nasan, Benaia ka ŋikilyok ŋulu ajiok ŋulu arae ŋirukitos a Daudi ta lokaato keŋ Solomon.

¹¹ Abu nai Nasan kiŋit Basiseba toto a Solomon tema, “Eriŋa iyoŋ nyiirara atemar aruwor Adoniya lokoku ka Agis erwosit ka nyeyeni ekapolon yok Daudi ŋun a?

¹² Aŋun, bua tokona atipei okolimok iyoŋ ŋuna emaikina kitiya, ikotere iiuni akiyar kon ka alope ka akiyar alokoku kon a Solomon.

¹³ Kionyak atipei neni a Daudi a erwosit tolimok iŋes ebe, ‘Mam mono ekapolon kaŋ erwosit pa ibu iyoŋ kikoŋ neni a aketiyan kon atemar eruwor lokoku kon Solomon ilunyi lorot kon aruwor erwosit a? Kaanukiro nai eruworor Adonia erwosit?’

¹⁴ Ani nai eriŋa iyoŋ iyai nen irworosi ka erwosit, alomuni ayoŋ okotup iyoŋ, ido etogogoŋ ŋakiro kon.”

¹⁵ Aŋun, abu Basiseba tolot aanyun erwosit anagule keŋ. Aris erwosit kemojoŋ nooi, ido arae nen edaritor Abisag ŋina arae Asunamit erwosit.

¹⁶ Toryedik Basiseba, kijuuru alokiŋaren erwosit, kiŋit erwosit iŋes tema, “Nyo icamit iyoŋ?”

¹⁷ Toboŋok iŋes erwosit tema, “Ekapolon kaŋ, ibu iyoŋ kikoŋ neni a aketiyan kon alokiro a Ekapolon Akuj atemar: Eruwor lokoku kon Solomon ilunyokin lorot kon aruwor erwosit ka kipuka.

¹⁸ Nai tokona aruwor Adoniya erwosit, ido nyiyeni iyoŋ ŋun ekapolon kaŋ erwosit.

¹⁹ Adau iŋes akiar ikwapei ŋamuronisya ŋimoŋin, ŋitak ŋulu atumak ka ŋamesekin ŋuna alalak nooi. Anyaraiya iŋes ŋidwe a erwosit ŋulusapa daadaŋ ta esacaradoti Abiyasar ka Yoab ŋolo erae ekarikon ajore; nai nyenyara iŋes eketiyan kon Solomon.

²⁰ Nai ekapolon kaŋ erwosit, erae neni kon iteete ŋisirael daadaŋ ayenun aneni kon atemar ŋae ilunyokin lokicoloŋ a ekapolon a erwosit kipuka ekaku kon.

²¹ Ani pa kisubak iyoŋ ŋun, epedorio ayoŋ ka lokoku kaŋ Solomon akituruwor ŋikasecak apaki ŋinapei ikinukakinere iyoŋ ekapolon kaŋ erwosit neni eya atapapaa kon.”

²² Ani eriŋa Basiseba irworosi ka erwosit, tolomu ekadwaran Nasan.

²³ Tolimokis ŋituŋa erwosit temasi, “Eyai ekadwaran Nasan ne.” Ani elomuni Nasan tooma neni ayai erwosit, toryedik, kijuuru todol ereet kwap.

²⁴ Kiŋit Nasan erwosit tema, “Idau iyoŋ ekapolon kaŋ erwosit alimor atemar Adoniya eruwor erwosit ekaku kon ka iŋes iboikin lokicoloŋ kon kipuka a?

²⁵ Eŋita ayoŋ nu, anerae akoloŋit na, atiyaar iŋes kwap ama, ido aar ikwapei ŋamuronisya ŋimoŋin, ŋitak ŋulu atumak ka ŋamesekin ŋuna alalak nooi. Anyaraiya iŋes ŋidwe a erwosit ŋulusapa daadaŋ ta Yoab ŋolo erae ekarikon ajore ka esacaradoti Abiasar. Imujete ka emasete tokona ikes aloŋaren Adoniya, ido ebasi, ‘Ikigasi isua torubak erwosit Adoniya eyari.’

²⁶ Nai nyenyara iŋes ayoŋ eketiyan kon kaapei ka esacaradoti Sadok ka Benaia lokoku a Yekoiyada ta eketiyan kon Solomon.

²⁷ Ani kerae neni kon ekapolon kaŋ erwosit eponitotor ŋakiro ŋun, iŋes atemar nyiteyenikinit iyoŋ ŋiketiyak kon ituŋanan ŋini ilunyokin lokicoloŋ kon ekapolon kaŋ erwosit kipuka ekaku kon.”

Kituruworoe Solomon Erwosit

²⁸ Toboŋok nai erwosit Daudi tema, “Tonyarakinae ayoŋ Basiseba.” Abu nai Basiseba bu neni a erwosit, towo alokiŋaren keŋ.

²⁹ Kikoŋ erwosit tema, “Ikwaŋipei eyarya Ekapolon ŋolo abu okoiu ayoŋ alomoe kaŋ a daadaŋ,

³⁰ ekoŋi ayoŋ neni kon alokiro a Ekapolon a Akuj a ŋina a Ŋisirael ebe, ‘Lokoku kon Solomon iŋes ilunyokin lorot kaŋ ikwapei erwosit, ido iŋes iboikin lokicoloŋ kaŋ kipuka alokai kaŋ a ŋina ka apukan.’ Etiyakini ayoŋ nu nakoloŋit na.”

³¹ Tosodi nai Basiseba toryedik aloŋaren erwosit kijuuru todol ereet kwap, ido tema, “Elipi torubak ekapolon kaŋ erwosit Daudi eyari ŋikaru ka ŋikaru.”

³² Tema Daudi, “Tonyarakinae ayoŋ esacaradoti Sadok ka ekadwaran Nasan ta Benaia lokoku a Yokoiyada.” Ani epote ŋul kiŋaren erwosit,

³³ tema erwosit neni kec, “Torukosi ka ŋiketiyak kaŋ a ekapolon kus, kitodakakisi Solomon lokoku kaŋ aŋole-sigirya kaŋ totiyaarotor iŋes Gion.

³⁴ Ani idolete nen, tolimokis esacaradoti Sadok ka ekadwaran Nasan kiosakis iŋes akimyet kituruwosi erwosit a Isirael. Ani ekaku, tokutakis arupepe temasi, ‘Ikigasi isua torubak erwosit Solomon eyari.’

³⁵ Emaikina nai iyes itupito iŋes itipeunete lotaun. Kimyekis iŋes toloma tooma, kiboikin lokicoloŋ kaŋ; anerae aseu ayoŋ iŋes aruwor ekepukan a Isirael ka Yudaya.”

³⁶ Toboŋok Benaia ŋolo arae lokoku a Yekoiyada erwosit Daudi tema, “Amen! Elipi Ekapolon Akuj a ekapolon kaŋ a erwosit kitiyak ŋakiro ŋun.

³⁷ Lopite ŋolo pei ayakatar Ekapolon ka ekapolon kaŋ erwosit, elipi toyai iŋes ka Solomon, kitopoloo nooi apukan keŋ kilo ŋina a ekapolon kaŋ a erwosit a Daudi.”

³⁸ Aŋun apotu esacaradoti Sadok ka ekadwaran Nasan ka Benaia lokoku a Yekoiyada ka Ŋiceresi ta Ŋipelesi totiyaaros Gion, kitodokakis Solomon aŋole a Daudi a erwosit, kitenasi ikes Solomon Gion.

³⁹ Ani edolete ikes nen, tolemu esacaradoti Sadok amomwara ŋina eyai akimyet alo eema, ido kiosak akimyet neni a Solomon. Tokutakis nai arupepe, temasi ŋituŋa daadaŋ “Ikigasi isua torubak erwosit Solomon eyari.”

⁴⁰ Kitipeiyosi ŋituŋa daadaŋ lotaun iwuapito Solomon ekusete ŋapilui, elelyanete analelyanu a ŋina apolon nooi, ŋina abu kitecelu ikes kituruturokin tari akwap.

⁴¹ Kiirasi Adoniya ka ŋipeyok daadaŋ ŋulu arukitotor iŋes ecelet ŋol apaki ŋina adaunotor ŋasuban kec. Ani iirari Yoab arupepe erwo, kiŋit tema, “Alicelet lo ŋolo ireta alotaun?”

⁴² Ani eriŋa iŋes irworo, todolu Yonasan lokoku Abiasar a esacaradoti. Tema Adoniya neni keŋ, “Bua tooma, anerae iyoŋ ekile ŋolo ikinyoma ŋolo iyaunit ŋakiro ŋuna ajokak.”

⁴³ Toboŋok Yonasan Adoniya tema, “Nyejokak ŋakiro, anerae adau erwosit yok Daudi akituruwor Solomon erwosit;

⁴⁴ abu erwosit kiyakiya Solomon ka esacaradoti Sadok ka ekadwaran Nasan ka Benaia lokoku a Yekoiyada ka Ŋiceresi ta Ŋipelesi; kitodokakis iŋes aŋole-sigirya a erwosit.

⁴⁵ Adaut esacaradoti Sadok ka ekadwaran Nasan akios iŋes ka akimyet ka akituruwor iŋes alo Gion erwosit. Anyout ikes a nen etipeiyosi lotaun elelyanete. Ŋakiro ŋun nai ayakar ecelet lotaun, ido ecelet ŋol iŋes ipupete iyes.

⁴⁶ Adau Solomon akiboikin lokicoloŋ ikwapei ekepukan.

⁴⁷ Adaut daŋ ŋiketiyak a erwosit alosit akitalakar ekapolon yok erwosit Daudi ebasi, ‘Ikilipi kituruwo Akuj yok ekiro a Solomon ŋolo eyenen nooi akilo ŋolo kon ka akipuka iŋes akwap ŋina alalan nooi akilo ŋina kon.’ Kijuuru erwosit kilip alokitaada,

⁴⁸ tema ‘Kipuritetei Ekapolon Akuj a Isirael, ŋina nakoloŋit na ainaki epei a ŋidwe kaŋ akiboikin lokicoloŋ kaŋ ete ayoŋ.’”

⁴⁹ Aŋakiro a ŋun, apotu ŋipeyok ka Adoniya daadaŋ tonyout emaranete, toloto a ŋinituŋan a akeŋ.

⁵⁰ Tokuryaniar Adoniya aŋuna a Solomon, tonyou tolot, kikam ŋamomwar a Namuroet alo Kai ka Akuj egeno atemar eiun kikam ŋamomwar a Namuroet.

⁵¹ Tolimokinae Solomon ŋakiro ŋun ebe, “Ebulit adoniya aŋuna a erwosit Solomon, aŋun, atunakin namomwar a Namuroet abala, ‘kimyekisi erwosit Solomon kikoŋ neni kaŋ nakoloŋit na atemar nyaari ayoŋ aketiyan kaŋ.’”

⁵² Aŋun, abu solomon toboŋok tema, “Ani ketakan iŋes erae ekile ŋolo ikinyoma, mam tari etimat epei daŋ anakou keŋ, nolo ecakakin kwap; nai ani ketakanu aronis aneni keŋ, etwani iŋes.”

⁵³ Kiyakiya nai Solomon ituŋanan ayaun Adoniya a Namuroet. Abu Adoniya kijuuru aneni a erwosit Solomon. Tema Solomon neni keŋ, “Ape kai kon.”