1 Ŋikor. 9 - Ebaibul

Etic ŋolo ke ekiyakia

¹ Nyayakar mono ayoŋ apedor akitiya ŋuna acamit a? Meere mono ayoŋ ekiyakia a? Nyeŋolikinit mono ayoŋ Yesu Ekapolon yok a? Meere mono iyes ŋulu ipotu tonupa anakitatam kaŋ ŋakiro ŋuna ke Ekapolon a?

² Tari pa keketeete ŋice ayoŋ atemar arae ekiyakia, kire icamunito iyes atemar arae ayoŋ. Aŋuna ka akiyar kus anakimorikina ke Ekapolon, iyes ŋilopeyek itoodiunito araakau kaŋ ekiyakia.

³ Erae lo epite ŋolo erworya ayoŋ aŋuna kaŋ apaki ŋina ekeŋisiŋisiyere ayoŋ alokiŋaren ŋituŋa:

⁴ nyayakar mono ayoŋ apedor ŋina maset ka ŋinakimujet akimuj aŋuna ke etic kaŋ a?

⁵ Nyayakar mono ayoŋ apedor ŋina ryamunet aberu ŋina Kristoit orukito ka ayoŋ analosit kaŋ, ikwapei Ŋikiyakia ŋuluce ka ŋikaitotoi ŋulu ke Ekapolon ka Petero a?

⁶ Kori Baranaba bon ka ayoŋ itemokino kitiyaetei aŋuna ka aryamunia akimuj ŋinayaret?

⁷ Emam esigarit itiyae etic keŋ pa etacio. Emam eketan ŋolo nyenyamenene ŋaraito ŋuna ke epiini alomanikor keŋ. Kori alikeyokon nyemasenene ŋakile a ŋamesekin keŋ?

⁸ Nyerworo ayoŋ ŋun alopite bon a ŋolo irworotor ŋituŋa. Irworosi Ŋikisila a Moses daŋ ŋunapei.

⁹ Igiritae Lokisila a Moses ebe, “Nyien akituk ke emoŋ apaki ŋina isitiyaa iyoŋ ikes aramya ŋimomwa”. Etapito mono Akuj ŋuna a emoŋ a?

¹⁰ Kori pa alimuni iŋes ŋakiro ŋun kan iwon a? Kire egiritae ŋakiro ŋun kan iwon. Itemokino eketan ka ekaleman kitiyata etic kec igenosi aryamun ekimar kec ŋolo a ŋaraito a ŋun.

¹¹ Adaun isua aekin ŋikinyom ŋulu erae ŋakiro ŋuna ka Akuj neni kus. Erono mono nooi aryamun aneni kus ikwapei ŋaraito ŋiboro ŋulu ikiitanit isua a?

¹² Ani nai keyakatar ŋulucetuŋa apedor ŋina ryamunet ŋiboro ŋul aneni kus, nyikiyakar nai isua apedor ŋina apolon akilo ikes a? Tari kikote neni, nyisitiya isua apedor ŋin; nai ikititinyik isua ŋican daadaŋ, ikotere nyitukuruwor alimonokin ŋina a Ŋakiro a ŋuna Ajokak a ŋuna a Kristo.

¹³ Kire, iyenete iyes atemar, ŋikilyok ŋulu itiyaete Kai ka Akuj eryamununeeteakimuj kec alo Kai ka ŋulu itiyaete Namuroet, eryamununeeteakimuj kec anamuronisya a ŋuna einanakinete ikes.

¹⁴ Ikwaŋinapei, icikakinit Ekapolon atemar ŋituŋa ŋulu elimonokinete Ŋakiro ŋuna Ajokak, itemokino toyarikis nalimonokin ŋinapei.

¹⁵ Nai, nyisitiya ayoŋ ŋapedorosyo ŋun tari apei daŋ, nabo nyegiri ayoŋ ŋun aŋuna ka aryamun idiobore aŋuna kaŋ. Kejok ayoŋ otwan akilo idiotuŋanan alemar aneni kaŋ ibore ŋini eturor ayoŋ.

¹⁶ Nyapedori ayoŋ akituro aŋuna alimonokinia Ŋakiro ŋuna Ajokak. Anerae ekecikak Akuj ayoŋ alimonokin ŋakiro ŋun. Erokyarosi aneni kaŋ erae pa kalimonok Ŋakiro ŋuna Ajokak!

¹⁷ Ani kalimonok ayoŋ aŋuna ka acamit kaŋ, iŋes atemar aryamuni ayoŋ eropit; nai itemokino ayoŋ etiyae ŋun, anerae ekecikak Akuj ayoŋ akitiya.

¹⁸ Aliropit nai aryamuni ayoŋ? Eropit kaŋ iŋes alimonokin Ŋakiro ŋuna Ajokak emam etacit, ido nyesitiyae ŋapedorosyo ŋuna itemokino oyakar alotic a ŋol.

¹⁹ Arae ayoŋ ituŋanan ŋini alacakina ka nyarae epito a idiotuŋanan, nai eturuwor ayoŋ epito a ŋituŋa a daadaŋ, ikotere onyaraunia ŋituŋa ŋulu alalak nooi neni a Kristo.

²⁰ Ani ikiruki ayoŋ ka Ŋiyudayan ekoni Eyudayat, ikotere onyaraunia ikes neni a Kristo. Ani ikiruki ka ŋulu iwuapito Ŋikisila a Moses, ekoni ŋulu iwuapito Ŋikisila a Moses--tari pa kekepukato Ŋikisila a Moses ayoŋ, ikotere onyaraunia ikes neni a Kristo.

²¹ Ikwaŋinapei, ani ikiruki ka ŋulu nyiwuapito Ŋikisila a Moses, ekoni ŋulu nyiwuapito Ŋikisila a Moses, ikotere onyaraunia ikes neni a Kristo. Nyerae nai ŋun atemar aŋerit ayoŋ Ŋikisila ka Akuj, nai ekepukato ayoŋ Ŋikisila ŋulu a Kristo.

²² Aneni a ŋulu epalag ananupit, apalag ikwa ikes, ikotere onyaraunia ŋulu palag daŋ neni a Kristo. Aruwor ayoŋ ŋinibore daadaŋ alotuŋa a daadaŋ, ikotere oiunia ŋice a epite a daadaŋ a ŋolo apedorya.

²³ Etiyae ayoŋ ŋun daadaŋ aŋuna a Ŋakiro a ŋuna Ajokak, ikotere oryamunia ayoŋ daŋ ŋarereŋisyo aneni kec.

²⁴ Iyenete iyes kire atemar anakerit, elalak ŋituŋa ŋulu isyakinete akerit, nai ipei bon eryamuni eropit. Aŋun, tokera nai lopite ŋolo ipedoryata aryamun eropit.

²⁵ Ekakeran daadaŋ ŋolo itatamio, ipukae iŋes ekibure daadaŋ, ikotere eryamunia ebokot ŋolo nyeropari; ikitiyae iwon daŋ ikwaŋinapei, ikotere oryamuniata ebokot ŋolo eropari.

²⁶ Iŋes nai akeria ayoŋ ocorosi tari naŋetakinet; ikikwaan ayoŋ ka ekanaŋan egum ŋolo nyedyaki ŋoloce.

²⁷ Etogogoŋi ayoŋ akuwan kaŋ a ŋanaŋan, ikotere kiwuap ŋuna acamit ayoŋ, ikotere nyakalemar ayoŋ ŋolo abu onyarau ŋuluce nakerit.