1 Ŋikor. 8 - Ebaibul

Ŋakiŋiseta ŋuna etapito ŋamuja ŋuna einanakinio nakujo ŋace

¹ Egiri tokona ŋuna ikamunito ŋuna ipotu iyes kigira aŋuna a ŋamuja a ŋuna einanakinio erae amuronot nakujo ŋace. Iyookino kire atemar, “Ikiyakar iwon daadaŋ ayenut.” Isiturokini ayenut ituŋanan, nai amina iŋes itogogoŋi ituŋanan.

² Ŋini etami atemar ayeni idiobore, eriŋa nyeyenuna lopite ŋolo itemokino toyenunia.

³ Nai ituŋanan ŋini emina Akuj, eyeni Akuj iŋes.

⁴ Aŋun nai, ŋuna etapito akinyam ŋamuja ŋuna einanakinio erae amuronot nakujo ŋace: ikiyeni atemar erae ŋakujo ŋuna kitiyauna ŋuna eyakasi nakwap ŋakoŋinae. Eyai Akuj apei bon.

⁵ Tari keyakasi nakuj kori nakwap, ŋiboorei ŋulu enyaritae ŋakujo ikwapei kire elalaata ŋakujo ŋun ka ŋikapolok ŋul,

⁶ nai aneni yok eyai Akuj apei bon, Papa ŋolo asubi ŋiboro daadaŋ, ŋolo ikiteyari iwon ka eyai iwon Ekapolon epei bon, Yesu Kristo ŋolo asubia Akuj ŋiboro daadaŋ, ido iŋes ikiyarya iwon.

⁷ Nai emamukatar ŋituŋa ŋulu alalak ayenut ŋin. Anaikis ŋituŋa ŋice ŋakujo ŋace; iŋes nai ani kenyama ikes akimuj ŋina einakinitae erae amuronot nakujo ŋace, eriŋa ikes etamete atemar ilipete ikes neni a ŋakujo a ŋun; epalag ŋatameta kec ka eyenete ikes alotai kec atemar ikisecit.

⁸ Nyepedori akimuj akitojok epite ŋolo iboiyere iwon ka Akuj: emam ibore ikibuci iwon erae pa kikinyam ŋamuja ŋun, nabo emam ibore ikiryamuni iwon erae kikinyam.

⁹ Nai tocoito nyeruwor alacakina kus ŋina nyamet ŋamuja, ŋina iteseci ŋulu epalag ayenut kec anakiro a ŋun.

¹⁰ Iyoŋ ituŋanan ŋini ibala ayakar ayenut; ani mono kikiŋolik iyoŋ ituŋanan ŋini epalag ayenut inyami akimuj alokai a ŋina a ŋakujo a ŋace, nyiburakini mono iŋes aŋuna a ŋakiro a ŋun akinyam akimuj ŋin a?

¹¹ Aŋun, inyasun ituŋanan ŋin, ŋini epalag ayenut keŋ aŋuna ka ayenut kon--iŋes ŋini abu Kristo totwan aŋuna keŋ.

¹² Alopite a lo, isecete iyes alokiŋaren ŋikaitotoi kus alotooma Kristo ka kinyasut ikes anatameta kec a ŋuna palag, iseca iyes kire alokiŋaren Kristo.

¹³ Aŋun, ani kerae akimuj iteseci lokaato kaŋ, nyanyami nabo akiriŋ jik, ikotere nyetesec iŋes.