1 Ŋikor. 4 - Ebaibul

Erae Ŋikiyakia ŋiketiyak ŋulu a Kristo

¹ Itemokino iyes toyenete atemar ikirae isua ŋiketiyak ŋulu a Kristo, ŋulu adau Akuj ainakin apolokin etic ŋolo ka akisera ŋakiro ŋuna a kire ŋuna imunono.

² Ibore ŋini iitana aloketiyan a ŋolo epolokinit etic, iŋes akikinyoma alokiŋaren ekapolon keŋ.

³ Anapolokinit kaŋ etic, nyamitakinit ayoŋ epite ŋolo etubonokiniata ŋituŋa. Emam tari nyatubonokin ayoŋ bon.

⁴ Emam idiobore ŋini ayeni ayoŋ atemar asecit, nai nyitoodiunito ŋun atemar emam ŋuna akatubokinere ayoŋ, Akuj ŋina erae Ekapolon a daadaŋ, iŋes akatubokini ayoŋ.

⁵ Aŋun, nyitubokis idiotuŋanan eriŋa nyedoluno apaki ŋina itemokino, ŋina eboŋunio Ekapolon. Inwakuni Ekapolon ibore daadaŋ ŋini iwuaitae anakiryonut, itatakanuni ŋakiro ŋuna iwuaitae ŋuna a ŋitai a ŋituŋa. Eryamuni nai ŋinituŋanan akipuro ŋina ejoikinit toryamu aneni ka Akuj.

⁶ Aŋuna kus, ŋikaitotoi, adau ayoŋ akirwor ŋakiro ŋun daadaŋ esitiyae Apolo ka ayoŋ erae akitaanyikinet. Etiya ayoŋ ŋun, ikotere toyenut aneni kosi apolou ŋina ka alimunet a ŋina ebala, “Totupa Ŋikisila ŋulu a kire.” Nyitemokino idio aneni kus iturokina aŋuna a ituŋanan a ipei, ido tojamuwa ŋinice.

⁷ Anerae anityaketait mono iyakar iyoŋ aneni a ŋuluce? Akuj iŋes ikiinakinit iyoŋ ŋiboro daadaŋ ŋulu iyakar iyoŋ. Ikokini nai iyoŋ ituro ai esibit nyerae ŋiboro ŋulu iyakar iyoŋ ainakinet?

⁸ Nai idaut kire iyes aryamun ŋiboro daadaŋ ŋulu iitanito a? Idaut iyes akibara a? Iruworosi iyes ŋirwosi emamukae isua a? Okoe kerae toraakas iyes ŋirwosi kire, kikirae isua daŋ ŋirwosi kaapei ka iyes!

⁹ Anerae atami ayoŋ atemar adau Akuj akituruwor isua Ŋikiyakia ŋulu ikidisyak akilo daadaŋ. Ikikokini isua ŋituŋa ŋulu etubokinitae atwanare alokiŋaren ŋimalaikan ka ŋituŋa daadaŋ.

¹⁰ Aŋuna a Kristo, ikirae isua ŋibaŋaanotin, nai iosok iyes anakimorikina ka Kristo! Ikipalag isua, nai igogoŋ iyes. Ikijamuwaritae isua, nai ikitopolooritae iyes!

¹¹ Akitodol tokona daŋ, ikinyamit isua akoro ka akure; ikinapit isua ŋilowi ŋulu rocom; ikibuŋao ka ikimamukar ŋirerya.

¹² Ikilelenyit isua aŋuna ka akitiya etic ŋolo ikiyarya isua ŋilopeyek. Ani ikicenio isua, ikiterereŋi ŋulu ikicenete isua; ani ikisicanio isua, ikititinyikini;

¹³ ani ikiyanyo isua, ikiboŋokini ikes anarimao. Ikiruwor isua ŋatunyeny alotuŋa, tari tokona ikirae isua agasiya ŋina ka akwap!

¹⁴ Nyekegirakinit ayoŋ iyes nu akisurumya ŋileec, nai akitatam iyes ikwa ŋidwe kaŋ ŋuluminan.

¹⁵ Tari kiyakatar iyes ŋiketatamak ŋulu alalak nooi ananupit kus Kristo, iyakatar iyes papa epei; anerae anakiyar kus iraakasi Ŋikristo, abu ayoŋ oruwor papa kus aŋuna ayaunia Ŋakiro ŋuna Ajokak neni kus.

¹⁶ Aŋun nai, ekemaimai iyes totupakis ŋuna etiyae ayoŋ!

¹⁷ A ŋakiro a ŋun, eyakuunit ayoŋ neni kus Timoteo lokoku kaŋ ŋolo minat alotooma Kristo ka erae ŋolo ekinyomit ayoŋ. Ikitatamuni iŋes iyes ŋipitesyo ŋulu atupit ayoŋ anakiyar kaŋ anakimorikina ka Yesu Kristo ikwapei etatamya ayoŋ natukon daadaŋ ŋuna a Ŋikristo anakwapin.

¹⁸ Eturokinosi ŋice alokidiŋ kus, anerae etamete ikes atemar kori nyabuni ayoŋ aanyun iyes.

¹⁹ Nai, abuni ayoŋ atipei aanyun iyes erae kerae acamit ŋina ke Ekapolon, ido nai oanyu ayoŋ elope apedor kire ŋina eyakatar ŋituŋa ŋulu eturok ŋul, akilo ŋuna irworosi ikes.

²⁰ Anerae nyerae Apukan ka Akuj erworikituk, nai erae ŋina eyai apedor.

²¹ Nyaanu ŋuna icamito iyes? Itemokino mono ayoŋ obu neni kus ka adaset, kori a etau a ŋolo ka amina ka akiyapara.