1 Ŋikor. 14 - Ebaibul

Ŋainakineta ŋace ŋuna eponito aneni ke Etau a ŋolo Asegan

¹ Itemokino toŋirikis aryamun amina. Kiitanito ŋainakineta ŋuna ke Etau a ŋolo Asegan, kiitana nooi ainakinet ŋina ka akidwar ŋakiro ŋuna ka Akuj.

² Anerae ituŋanan ŋini irworo ŋaŋajepa ŋuna egelaaka, nyirworo lotuŋa, nai irworo neni ka Akuj, anerae emam ituŋanan eyeni ŋakiro ŋuna irworo iŋes, nai irworo iŋes ŋakiro ŋuna imunono aŋuna ka apedor a ŋina ke Etau ka Akuj.

³ Nai ituŋanan ŋini edwari, irworo lotuŋa aŋuna ka akitogogoŋ, akisimukekin ka akimaima ikes.

⁴ Ituŋanan ŋini irworo ŋaŋajepa ŋuna egelaaka itogogoŋo iŋes bon, nai ituŋanan ŋini edwari, itogogoŋi iŋes atukot a Ŋikristo.

⁵ Acamit ayoŋ iyes daadaŋ kirworo ŋaŋajepa ŋuna egelaaka, nai nooi todwarete. Anerae epol ŋini edwari akilo ŋini irworo ŋaŋajepa ŋuna egelaaka--mati eyai ŋini isileereuni ŋuna irworo iŋes, ikotere kitogogoŋio atukot a Ŋikristo daadaŋ.

⁶ Ŋikaitotoi kaŋ, kabu ayoŋ neni kus, erworo ŋaŋajepa ŋuna egelaaka, anijokis iryamunete iyes alorwor kaŋ? Emam tari adio, mati kerwor ayoŋ adiokitoodikinet aneni ka Akuj, kori adioyenut kori akidwar adio kori akitatam adio.

⁷ Totamakisi mono iyes ŋiboro ŋice ŋulu ikote apilu kori aduŋgu, ŋulu nyeyarete; ikokini ituŋanan eyenuni eete ŋolo eramio a ŋiboro a ŋul, erae pa kerwosi ikes ejok ai?

⁸ Ani pa kekutaki ekakutan aluut ejok, ŋae eteni aŋuna ka alosit lojiye?

⁹ Ikote nenipei aneni kus daŋ. Ani kirwor iyes a ŋaŋajepa a ŋuna egelaaka, ido nyilereete ŋuna irworosi iyes, ikokini nai ituŋanan eyenuni ŋakiro ŋun ai? Eŋopikinete ŋakiro ŋuna irworosi iyes lokuwuam.

¹⁰ Eyakasi ŋaŋajepa ŋuna alalak ŋuna egelegelya nakwap, nai epuposi daadaŋ.

¹¹ Nai ani pa kayeni ayoŋ aŋajep ŋina irworo ituŋanan, iŋes atemar eruworekerworon egela aneni kaŋ ka Aruwor ayoŋ daŋ egela aneni keŋ.

¹² Aŋun nai, ikwapei iitanitotor iyes aryamun ŋainakineta ŋuna ke Etau ka Akuj, akilo daadaŋ itemokino toyenut ŋainakineta ŋuna itogogoŋete atukot a Ŋikristo.

¹³ Aŋun, ituŋanan ŋini irworo ŋaŋajepa ŋuna egelaaka, itemokino kilip Akuj aŋuna ka ainakinet a ŋinakisileereunet ŋuna irworo iŋes.

¹⁴ Anerae ani elipi ayoŋ aŋajep a ŋina egelaana, elipi alotooma Etau ka Akuj, nai nyimorikina ŋatameta kaŋ ka Etau.

¹⁵ Nyo nai erae ayoŋ etiya? Etiyae ayoŋ nuarei nu: elipi alotooma Etau ka Akuj ka a ŋatameta kaŋ daŋ; aeo alotooma Etau ka Akuj ka a ŋatameta kaŋ daŋ.

¹⁶ Nai ani ilakar iyoŋ neni ka Akuj ka aŋajep a ŋina ke Etau ka Akuj, ikokini nai ituŋanan ŋini emamukar ainakinet ŋin etemari “Amen” aŋuna ka akilip a ŋina ka alakar kon neni ka Akuj ai? Emam epite ŋolo epedorya iŋes ayenun ŋuna irworo iyoŋ.

¹⁷ Tari kejok akilip kon ŋina ka alakara neni ka Akuj, nyepedori akitogogoŋ ituŋanan ŋinice.

¹⁸ Alakara ayoŋ neni ka Akuj, anerae erworo ayoŋ ŋaŋajepa ŋuna egelaaka ŋuna ke Etau akilo iyes daadaŋ.

¹⁹ Nai anatukot a Ŋikristo, ejok ayoŋ alimun ŋakiro ŋakan bon ŋuna epuposi ikotere etatam ŋuluce, akilo akirworo ŋakiro ŋalipyo a ŋaŋajepa a ŋuna egelaaka.

²⁰ Ŋikaitotoi kaŋ, nyikote ŋidwe alopite a ŋolo itamyata iyes. Ipedorete iyes akitiya ikwa ŋidwe anakiro a ŋuna aronok, nai alopite a ŋolo itamyata iyes, toruworos ŋituŋa ŋulu ipakito anakiro a ŋuna ka Akuj.

²¹ Igiritae Nakigireta ebe, “Ebala Ekapolon ebe, ‘Alorwor a ŋituŋa a ŋulu irworosi ŋaŋajepa ŋuna egelegelya, erwori ayoŋ neni a ŋituŋa kaŋ. Erwori ayoŋ anakituka a ŋituŋa a ŋulu gelae. Nai tari kikote neni daŋ, nyepedorete apupokin ŋakaakiro!’ ”

²² Aŋun nai, ainakinet ŋina kirworet ŋaŋajepa ŋuna egelaaka erae akitoodikinet aneni a ŋulu nyenupito Kristo, meere neni a ŋulu enupito. Ainakinet ŋina ka akidwar erae akitoodikinet neni a ŋulu enupito, meere neni a ŋulu nyenupito Kristo.

²³ Ani nai kecunakinosi ŋikanupak daadaŋ iwapei, togeut daadaŋ akirworo ŋaŋajepa ŋuna egelaaka, ido tolomut nai nen ŋituŋa ŋulu nyeyenete ŋun kori ŋulu nyerae ŋikanupak, nyetemarete mono ikes ikikerepikinit iyes daadaŋ a?

²⁴ Nai ani kirworosi daadaŋ ŋakiro ŋuna einakinit Akuj ikes, ido tolomu ituŋanan ŋini nyerae ekanupan kori ŋini nyeyeni ŋun, epedori iŋes ayenun atemar asecit iŋes. Etubokinete nai iŋes ŋakiro daadaŋ ŋuna epupi iŋes.

²⁵ Isileereuni ŋuna alotau keŋ ŋuna imunono, ido toryedik kilip neni ka Akuj, ebala, “Kire, eyai Akuj neni kus!”

Epite ŋolo eriyan anatukot a Ŋikristo

²⁶ Ŋikaitotoi kaŋ, apolou a ŋakiro a ŋuna erworo ayoŋ iŋes na: ani iryamiryamete akilip, epedori ipeituŋanan alimun eete, kitatam ice ŋakiro ŋuna ka Akuj, ice toyakar akitoodikinet aneni ka Akuj, ice toyakar akirot a ŋaŋajepa a ŋuna egelaaka, ka ice daŋ kisileereu ŋuna irworoe a ŋaŋajepa a ŋuna egelaaka. Nai itemokino ŋinibore torae ŋini itogogoŋi ŋikanupak.

²⁷ Ani keya ŋulu irworosi ŋaŋajepa ŋuna egelaaka, itemokino ituŋanan ice kisileereu ŋuna irworosi ikes.

²⁸ Ani kemam ituŋanan isileereuni, itemokino ikes kililiŋa cek, kirwor ŋinituŋanan nenipei keŋ bon ka neni ka Akuj.

²⁹ Itemokino ŋituŋa ŋiarei kori ŋiuni ŋulu einakinit Akuj ŋakiro keŋ, kirworikis, totamatamaete ŋuluce ŋakiro ŋun.

³⁰ Nai, ani kisileerek Akuj akirot keŋ neni a icetuŋanan a ŋini iboi anatukot, itemokino ituŋanan ŋini sek erworo kililiŋ.

³¹ Ipedorete iyes daadaŋ akisera ŋakiro ŋuna ka Akuj a ŋipeipei, ikotere eyenunete ŋituŋa daadaŋ ka kimukekis.

³² Itemokino ainakinet ŋinakiseraet ŋakiro ŋuna ka Akuj torae ekerworon eyeni epite ŋolo isitiyaa.

³³ Anerae nyerae Akuj ŋina ke eguriguri, nai erae ŋina ke ekisil. Ikwapei itiyaere anatukon a Ŋikristo a daadaŋ,

³⁴ itemokino ŋaberu kililiŋete anatukot a Ŋikristo. Nyecamakinitae ikes erwori; ikwaŋina igiritere Lokisila a Moses, nyecamakinitae ikes apolokinit atukot.

³⁵ Ani kecamito ikes ayenun ŋakiro ŋadi, itemokino ikes kiŋita ŋikilyok kec alorerya; anerae erae ŋileec aberu akirworo anatukot a Ŋikristo.

³⁶ Meere neni kus elomunitotor Ŋakiro ŋuna Ajokak ŋuna ka Akuj. Meere iyes bon iryamut ŋakiro ŋun.

³⁷ Ani ketami ituŋanan atemar erae iŋes ekadwaran ŋolo ka Akuj kori ipukat Etau ka Akuj iŋes, itemokino toyenu atemar ŋakiro ŋuna egir ayoŋ tokona neni kus erae akiciket aneni ke Ekapolon.

³⁸ Ani pa kemitaki idiotuŋanan ŋakiro ŋun, nyimitakis iŋes daŋ.

³⁹ Aŋun nai ŋikaitotoi kaŋ, kiitana nooi akidwar ŋakiro ŋuna ka Akuj. Nyiretakis idiotuŋanan akirwor ŋaŋajepa ŋuna egelaaka,

⁴⁰ nai itemokino kitiyae ŋiboro daadaŋ alopite a ŋolo ajokan ka alopite a ŋolo eriyan.