1 Ŋikor. 13 - Ebaibul

Amina

¹ Ani kerwor ayoŋ a ŋaŋajepa a ŋituŋa ka a ŋuna a ŋimalaikan daŋ, nai tomam amina aneni kaŋ, ikoni erwor kaŋ asuwat ŋina arwon kori ekadoŋodoŋot ŋolo ikilya.

² Ani kayakar ayoŋ apedor ŋina dwaret ŋakiro ŋuna ka Akuj, oyeni ŋuna imunono ka aosou daadaŋ; ani kayakar anupit ŋina apolon ŋina iitana aŋuna ka akisiyotonor ŋimoru, nai tomam amina aneni kaŋ, arae ayoŋ koŋin.

³ Ani kakorak ayoŋ ŋiboro kaŋ lokulyak, ojalak daŋ ŋituŋa kicunya akuwan kaŋ, nai tomam amina aneni kaŋ, emam ibore aryamuni.

⁴ Etitiny amina ka erimaana; nyerakaana amina kori nyitojoka bon kori nyiturono.

⁵ Nyitiyae amina ŋipitesyo ŋulu aronok ka emam emwane aneni keŋ; nyeŋoyenene amina atipei. Nyidyasi amina ŋakiro ŋuna aronok.

⁶ Nyelakara amina aŋuna a ŋakiro a ŋuna nyiyookino, nai elakara aŋuna a kire.

⁷ Idaŋidaŋi amina ŋakiro daadaŋ, enupit ŋakiro daadaŋ, igeno ka etitinyikinit ŋinibore daadaŋ.

⁸ Erae amina ŋina a jik. Eyakasi ŋakiro ŋuna edwaritae, nai erae ŋuna ka adiouriyen; eyakasi ŋainakineta ŋuna kirworet ŋaŋajepa ŋuna egelaaka, nai elunyarosi; eyai ayenut, nai esaluni.

⁹ Anerae ŋainakineta yok ŋuna ka ayenut ka ŋuna ka akidwar ŋakiro ŋuna ka Akuj erae ŋuna eriŋa nyirikakina,

¹⁰ nai ani ŋina ebunio akiyookino daadaŋ, eŋopiarete ŋuna eriŋa nyirikakina.

¹¹ Apaki ŋina ariŋa ayoŋ araakar ikoku, arae erwor kaŋ ŋolo a ikoku, ayeni ŋakiro ikwa ikoku ka atami ikwa ikoku; ani ŋina aruworor ituŋanan ŋini apolon, abu oesik ŋuna a ikoku.

¹² Ibore ŋini ikite iwon tokona ikoni etorube ŋolo emuimui anaroet, nai moi, ikianyuni iwon Akuj; ŋuna ayeni ayoŋ tokona erae ŋuna eriŋa nyirikakina, nai moi, ayenuni ejok lopite ŋolopei akayenia Akuj ayoŋ.

¹³ Eriŋa nai nu ŋunauni eroparito: anupit, akigeno ka amina, nai ŋina iloit ŋun daadaŋ iŋes amina.