1 Ŋikor. 12 - Ebaibul

Ŋainakineta aneni ke Etau a ŋolo Asegan

¹ Ŋakiro ŋuna etapito ŋainakineta ŋuna eponito aneni ke Etau a ŋolo Asegan: tokona, acamit ayoŋ iyes ŋikaitotoi kaŋ toyenut ŋakiro ŋuna a kire ŋuna etapito ŋakiro ŋun.

² Iyenete iyes atemar apaki ŋina iraakatar iyes ŋituŋa ŋulu pa inupito Akuj ŋina a kire, aponi ikitooliyor iyes alorotin a ŋulu alalak nakujo ŋace ŋuna etwakito.

³ Aŋun, acamit ayoŋ iyes toyenut atemar emam ituŋanan ŋini irworo a Etau a ŋolo ka Akuj epedori alimun ebe, “Itemokino kicenoi Yesu!” Nabo, emam ituŋanan epedori alimun ebe, “Erae Yesu Ekapolon”, mati erae Etau ŋolo Asegan erikit iŋes.

⁴ Egelegelya ŋainakineta ŋuna ke Etau a ŋolo Asegan, nai Etau ŋolopei ekori ikes.

⁵ Egelegelya ŋirotin ŋulu ijaanakinere, nai Ekapolon ŋolopei ijaanakinio.

⁶ Egelegelya ŋirotin ŋulu itiyaere ŋiticisyo, nai Akuj apei ekorakinit ŋinituŋanan apedor ŋinakitiyaet etic.

⁷ Itoodiunitae ayakau ŋina ke Etau a ŋolo Asegan tooma ŋinituŋanan alopite ke ece, aŋuna ka akiŋarakinia ŋuluce daadaŋ.

⁸ Einakini Etau ŋolo Asegan neni a ipei apedor ŋina kirworet ŋuna ka aosou, neni a ice einakini Etau ŋolopei ŋol apedor ŋina ka ayenut ŋakiro.

⁹ Neni a ice einakini Etau anupit, neni a ice einakini Etau ŋolopei ŋol apedor ŋina kitaŋaleununuyet.

¹⁰ Neni a ice einakini apedor ŋinakitiyaet ŋakujuwuanisya, neni a ice akidwar; neni a ice apedor ŋinayenunet ŋakiro ŋuna erae ŋuna ke Etau a ŋolo Asegan kori ŋuna nyerae. Einakini neni a ice apedor ŋina kirworet ŋaŋajepa ŋuna egelaaka, neni a ice einakini akisileereun ŋuna irworoe a ŋaŋajepa a ŋuna egelaaka.

¹¹ Ŋainakineta ŋun daadaŋ erae Etau ŋolo Asegan ŋolopei ŋol einanakini, iŋes ekoranakini neni a ŋinituŋanan anacamit keŋ.

Elalak ŋinerin anakuwan ka apei

¹² Ikoni Kristo akuwan ŋina erae apei ŋina eyakar ŋinerin ŋulu alalak; anerae ani tari kelalak ŋinerin anakuwan, eriŋa erae apeikuwan.

¹³ Ikwaŋinapei, iwon daadaŋ tari kikirae Ŋiyudayan kori ŋituŋa ŋulu nyerae Ŋiyudayan, ŋipi kori ŋulu nyerae ŋipi, ikibatisae tooma nakuwan apei a Etau a ŋolopei a ŋol ka ikimori iwon Etau ŋolopei ŋol.

¹⁴ Kire, nyeyakar akuwan ekiner epei, nai ŋinerin ŋulu alalak.

¹⁵ Ani kerae tolimu akeju tema, “Nyarae ayoŋ ekiner ŋolo ka akuwan, anerae nyarae ayoŋ akan”, nyiretakinete ŋun akeju araakau ekiner ŋolo ka akuwan.

¹⁶ Ani kerae tolimu akit tema, “Nyarae ayoŋ ekiner ŋolo ka akuwan, anerae nyarae ayoŋ akoŋu”, nyiretakinete ŋun akit araakau ekiner ŋolo ka akuwan.

¹⁷ Ani bo kerae torae akuwan daadaŋ akoŋu, kiiranari bo iŋes ikwaani? Ani bo kerae torae akuwan daadaŋ akit, kiŋuununui iŋes ikwaani?

¹⁸ Nai ikwaŋinapei tokona eyakar, abu Akuj kitemok ŋinerin nakuwan ŋulu egelegelya, ikwaŋina ecamitor iŋes.

¹⁹ Kerae torae ikes daadaŋ ekiner epei, kemam akuwan eyai!

²⁰ Nai ikwaŋinapei tokona eyakar, elalak ŋinerin, nai akuwan apei.

²¹ Aŋun nai, nyepedori akoŋu atemar akan ebe, “Nyekeitanit ayoŋ iyoŋ!” Nabo nyepedori akou atemar ŋakejen ebe, “Nyekeitanit ayoŋ iyes!”

²² Nai akilo, ŋinerin ŋulu ka akuwan ŋulu esibito epalag, ikes iitana nooi.

²³ Ŋinerin ŋulu ikitami iwon atemar emam nyelal ajokis eyai, ikes ŋinerin ŋulu ecoikinitae nooi ka ŋinerin ŋulu ka akuwan ŋulu nyejokak akiŋolikin, ikes ŋulu ikiyait iwon ka akiyapara.

²⁴ Nai, nyiitanito ŋinerin ŋulu ejokak, iŋolikini acoikinit nooi. Akuj alope iŋes abu kimorik ŋinerin ŋulu ka akuwan ka kitopoloo ŋinerin ŋulu epalag.

²⁵ Aŋun, emam atyakatyaka eyai nakuwan, nai ŋinerin daadaŋ emitakina make.

²⁶ Ani keryabakin ekiner epei, eryebakinosi ŋinerin ŋuluce daadaŋ; ani kipuri ekiner epei, elakarosi ŋinerin ŋuluce daadaŋ.

²⁷ Iraakasi iyes daadaŋ akuwan a Kristo ka erae ŋinituŋanan ekiner keŋ.

²⁸ Anatukot a Ŋikristo, adau Akuj akiwuakin ŋituŋa loticisyo kec: ŋulu esyaunak erae ŋikiyakia, ŋulu a ŋiarei erae ŋikadwarak, ŋulu a ŋiuni erae ŋiketatamak, totupakis ŋulu etiyak ŋakujuwuanisya ka nabo ŋulu einakinitae apedor akitaŋaleunun ŋidekesyo; ŋice akiŋarakin ŋuluce, ŋice apolokinit ŋuluce ka ŋice daŋ akirworo ŋaŋajepa ŋuna egelaaka ŋuna ke Etau.

²⁹ Nyerae daadaŋ ŋikiyakia kori ŋikadwarak, kori ŋiketatamak. Nyeyakatar daadaŋ apedor ŋinakitiyaet ŋakujuwuanisya

³⁰ kori ŋina kitaŋaleununuyet ŋidekesyo, kori ŋina kirworet ŋaŋajepa ŋuna egelaaka kori akisileereun ŋuna irworoe a ŋaŋajepa a ŋuna egelaaka.

³¹ Kiitana nooi ŋainakineta ŋuna apolok akilo. Eketoodikini nai ayoŋ iyes erot ece ŋolo ajokan nooi adepar.