1 Ŋikor. 10 - Ebaibul

Nyitemokino Ŋikristo ilipete neni a ŋakujo a ŋace

¹ Ŋikaitotoi kaŋ, acamit ayoŋ iyes totamut ŋuna apotu kitiyakinos neni atapapaa yok, ŋulu apotu totupakis Moses. Abu edou toiu ikes, todoka daadaŋ anam ŋina enyaritae “Anam ŋina areŋan”.

² Aponi kibatisae ikes daadaŋ ananam eriŋa edou imukorit ikes, toruworos ŋikewuapak a Moses.

³ Tonyama daadaŋ akimuj ŋina ainakini Akuj ikes,

⁴ tomata daŋ ŋakipi ŋuna ainakini iŋes ikes. Apotu ikes tomata anataaba a ŋina ka Akuj a ŋina arukito ka ikes; arae ataaba ŋin Kristo elope.

⁵ Nai pa alakara Akuj neni kec a ŋulu alalak, aŋun apotu ŋalyalin kec kiryama aloŋisat.

⁶ Erae ŋakiro ŋun daadaŋ akitaanyikinet aneni yok, ikotere nyikiburakinito ŋiboro ŋulu ka aronis ikwa ikes.

⁷ Nyitemokino iwon elipete neni a ŋakujo a ŋace, ikwa kilipyata ikes ŋice; ikwapei ebaakatar Ŋakigireta ebe, “Apotu ŋituŋa kiboikinos; kimuja, tomata ka tobolyata.”

⁸ Nyitemokino iwon etiyata ŋuna ka amalao ikwa kitiyaata ikes ŋice; aŋun, apotu ŋalipyo ŋatomoniarei ka ŋiuni totwaka apeikoloŋit bon.

⁹ Nyitemokino iwon etemo Ekapolon ikwa etemitotor ŋice kec; aŋun, apotu ŋimuno tomunyasi ikes.

¹⁰ Nyitemokino iwon eŋuruŋuras ikwa eŋuruŋuratar ŋice kec; aŋun, abu Emalaika ŋolo ka Atwanare tomunya ikes.

¹¹ Apotu ŋakiro ŋun daadaŋ kitiyakinos neni kec, erae akitaanyikinet aneni a ŋuluce ka aponi kigirae erae akiciket neni yok a ŋulu ikiboi anapakio a ŋuna eapiya Akoloŋit ŋina esidyon.

¹² Aŋun, itemokino ituŋanan ŋini etami atemar eboi ecasit, tocoite nyibusokin.

¹³ Emam akitemyet ŋina iryamut iyes ŋina nyitemitere ŋituŋa ŋuluce. Nai erae Akuj ŋina itiyae ŋuna adau akiikin, ka nyikicamakini iŋes iyes ikitemio tari adepar agogoŋu kus. Apaki ŋina ikitemere iyes, ikiinakini Akuj iyes erot ŋolo ibucarotor, ido topedosi atitinyikin.

¹⁴ Aŋun nai, ŋikaitotoi kaŋ ŋuluminan, toŋero akilip neni a ŋakujo a ŋace.

¹⁵ Erworo ayoŋ neni kus iraakasi ŋituŋa ŋulu iosok, totamatamata mono iyes ŋakiro ŋuna erworo ayoŋ.

¹⁶ Ekopo ŋolo isitiyao iwon Anakimuj a ŋina ke Ekapolon--ekopo ŋolo ikilakanaror iwon neni ka Akuj--apaki ŋina ikimasya erae ŋolo ikimorya iwon ŋaokot a Kristo. Amugati daŋ ŋina ikinyilinyili iwon apaki ŋina enyamere, erae ŋina ikimorya iwon akuwan a Kristo.

¹⁷ Aŋuna eyakar amugati apei, ikirae iwon ŋulu alalak akuwan apei, anerae ikimori iwon daadaŋ amugati apei.

¹⁸ Totamakisi epite a Ŋisirael: nyimorikina mono ŋulu enyamete ŋamuronisya ka Namuroet a?

¹⁹ Nyaanu mono ŋuna alosikinit ayoŋ? Abala mono ayoŋ erae ŋakujo ŋace kori ŋamuronisya ŋuna einanakinio ikes ŋiceboro ajokak a?

²⁰ Emam, nai alosikinit ayoŋ atemar ŋamuronisya ŋun, einanakinitae neni a ŋipyan, meere neni ka Akuj. Nyacamit ayoŋ iyes kimorikina ka ŋipyan.

²¹ Nyipedorete iyes akimat alokopo a ŋolo ke Ekapolon, ido tomata alokopo a ŋolo a ŋipyan daŋ. Nyipedorete iyes akimuj alomesa a ŋolo ke Ekapolon, ido kimuja alomesa a ŋolo a ŋipyan daŋ.

²² Ikicamit mono iwon akitoŋo Ekapolon a? Ikigogoŋ mono iwon akilo Akuj a?

²³ Ebookoi ebe, “Ikicamakinitae iwon akitiya ŋinibore daadaŋ”. Nai nyejokak ŋiboro daadaŋ, kire, “Ikicamakinitae iwon akitiya ŋinibore daadaŋ.” Nai nyikitogogoŋete ŋiboro daadaŋ.

²⁴ Nyitemokino idiotuŋanan atamuna bon, nai itemokino totamunite ŋulucetuŋa.

²⁵ Ikicamakinitae iyes akinyam akiriŋ ŋina egyelanaryo alomaket. Nyejoikina akiŋita, ikotere nyepodosi ŋatameta kus.

²⁶ Anerae igiritae Nakigireta ebe, “Erae akwap ka ŋiboro daadaŋ ŋulu eya tooma keŋ ŋulu ke Ekapolon.”

²⁷ Ani kikinyaraiya iyes ituŋanan ŋini nyerae Ekristoit kai keŋ akimuj ka iŋes, ido tocamut iyes, ejoikinit iyes kimuja ibore daadaŋ ŋini ikiinakinio tomam akiŋita, ikotere nyepodosi ŋatameta kus.

²⁸ Ani nai kikilimok iyes ituŋanan atemar, “Erae akimuj na ŋina ka amuronot a ŋina einakinitae nakujo ŋace”, nyinyama akimuj ŋin aŋuna a ituŋanan a ŋini abu itolimok iyes ka ikotere nyipodosi;

²⁹ iŋes atemar meere aŋuna a ŋatameta kus, nai aŋuna a ŋatameta keŋ. Kaanukiro iretakinitor icetuŋanan alacakina kaŋ aŋuna a ŋatameta keŋ?

³⁰ Ani kalakanar ayoŋ neni ka Akuj aŋuna ka akimuj kaŋ, kaanukiro eketoroniyaritor ayoŋ ituŋanan aŋuna ka akimuj a ŋina alakanaror ayoŋ neni ka Akuj?

³¹ Aŋun nai, ŋinibore daadaŋ imujete kori imasete kori itiyaete iyes, kitiyata ŋun daadaŋ aŋuna ka akitopoloor Akuj.

³² Nyitoŋoa Ŋiyudayan kori Ŋigirik kori ŋatukon a Ŋikristo ŋuna erae ŋuna ka Akuj.

³³ Kiboiyoto lopite ŋolopei eboiyo ayoŋ; ekatakinit ayoŋ akitalakar ŋituŋa daadaŋ alopitesyo a daadaŋ, nyatami ŋuna kaŋ bon, nai atami aŋuna a ŋituŋa a daadaŋ, ikotere toiunos ikes daadaŋ.