1 Ŋakiro a ŋirwa 4 - Ebaibul

Ŋipapae a Yuda

¹ Arae ŋidwe a Yuda ŋulusapa lu: Peres, Esiron, Karimi ka Ur ta Sobal.

² Abu Reaya lokoku a Sobal touru Yaas, touru Yaas Aumai ka Laad. Lotuŋa ŋul iŋes aponiata ŋatekerin ŋuna a Ŋisorasi.

³ Arae ŋidwe ke Etam ŋulusapa lu: Yesireel ka Isima ta Idibas. Anyaritae nakaato kec Aselelponi.

⁴ Panuel iŋes abu kisyak etaun ŋolo a Gedor, ido Eser iŋes abu kisyak etaun ŋolo a Usa. Arae ŋul ŋipapae a Ur alokoku a Epurasa a ŋolokiyae. Ur iŋes abu kisyak etaun ŋolo a Betelem.

⁵ Ayakar Asiur ŋolo abu kisyak etaun ŋolo a Tekoa ŋaberu ŋaarei: Ela ka Naara.

⁶ Apotu iŋes ka Naara touruut ŋisapa lu ŋiomwon: Ausam, Eper ka Temeni ta Aasitari.

⁷ Apotu Asiur ka Ela touruut ŋisapa lu ŋiuni: Seres ka Isar ta Esinan.

⁸ Abu Kos touru Anub ka Sobeba, iŋes arae papaa a ŋatekerin a ŋuna ke ekile a ŋolo anyaritae Aariel a lokoku ka Arum.

⁹ Ayai ekile ŋolo anyaritae Yabes, arae iŋes ŋolo akeritae nooi akilo ŋikaitotoi keŋ ŋuluce. Kebu toto keŋ tolimok iŋes ekiro ŋol aŋuna abalar, “Abu ayoŋ edou iŋes aryeba nooi.”

¹⁰ Abu Yabes kilip neni ka Akuj a Ŋisirael tema, “Okoe kiterereŋoe ayoŋ Akuj, inakinae ayoŋ akwap ŋina alalan. Oruko ka ayoŋ, ido kiuryarae ayoŋ anibore a ŋini aronon a daadaŋ a ŋini eyauni aryeba neni kaŋ.” Abu nai Akuj inak iŋes ŋakiro ŋuna elipa.

¹¹ Ayakar Kalubai lokaato a Sua lokoku keŋ ŋolo anyaritae Meir. Abu Meir touru Esiton,

¹² touru Esiton Bes-Rapa ka Pasea ta Teina. Teina iŋes abu kisyak etaun ŋolo a Irinaas. Eboiyete atapapa a ŋikilyok a ŋul alo Reka.

¹³ Arae ŋidwe a Kenas ŋulusapa ikes lu: Osiniel ka Seraia. Arae ŋidwe a Osiniel ŋulusapa lu: Asas ka Meonosai.

¹⁴ Abu Meonosai touru Opura. Touru Seraia Yoab, ŋolo abu kisyak akiduk nakadipaalat a Gearasim. Apolou a Gearasim iŋes atemar akadipaalat ŋina eyeniata ŋikilyok akicere ŋiboro.

¹⁵ Arae ŋidwe a Kaleb a lokoku a Yepune ŋulusapa lu: Iru ka Ela ta Naam. Abu Ela touru Kenas.

¹⁶ Arae ŋidwe a Yealel ŋulusapa lu: Sip, Sipa ka Tiria ta Asarel.

¹⁷ Arae ŋidwe ke Esira ŋulusapa lu: Yeser, Mered ka Eper ta Yalon. Arae aberu a Mered apei, abu touru Miriam ka Samai ta Isiba ŋolo abu kisyak etaun ŋolo anyaritae Esitemoa.

¹⁸ Abu daŋ Mered kiitu aberu anateker a Yuda, touruut ŋisapa lu: Yered ŋolo abu kisyak etaun ŋolo a Gedor; ŋolo a ŋiarei arae Eber ŋolo abu kisyak etaun ŋolo a Soko; ŋolo a ŋiuni arae Yekusiel ŋolo abu kisyak etaun ŋolo a Sonoa.

¹⁹ Abu Odia kiit nakaato a Naam, arae ŋipapae kec abunio ateker ŋina a Garim, ŋina eboi alotaun a ŋolo a Keila ka neni kec abunio ateker ŋina a Maakas, ŋina eboi alotaun a ŋolo ke Esitemoa.

²⁰ Arae ŋidwe a Simon ŋulusapa lu: Amon, Rina ka Benaanan ta Tilon. Arae ŋidwe a Isi ŋulusapa lu: Soes ka Benisoes.

²¹ Arae ŋidwe a Sela alokoku a Yuda ŋulusapa lu: Er ŋolo abu kisyak etaun ŋolo a Leka; ŋolo a ŋiarei iŋes Laada ŋolo abu kisyak etaun ŋolo a Maresaka ka ateker a ŋituŋa a ŋulu etiyaete ŋilowi ŋulu amilimilak alo Bes-Asibea.

²² Ŋuluce ikes: Yokim ka ŋituŋa ŋulu alo Koseba ta Yoas ka Sarap ŋolo abu kiit Ŋamoabi, ido kiboiyo Leem. (Erae ŋakiro ŋun ŋuna kigiryo koloŋ sek).

²³ Kerae ŋituŋa ŋul ŋikayiak ŋamoti alotic a ŋolo ke erwosit, ido kiboiyete ikes alotaunio a lu: Netaim ka Gedera.

Ŋipapae a Simeon

²⁴ Arae ŋidwe a Simeon ŋulusapa lu: Nemuel, Yamin, Yarib ka Sera ta Saul;

²⁵ arae Saul abu touru Salum, touru Salum Mibisam, touru Mibisam Misima.

²⁶ Arae Ŋipapae a Misima ikes lu: Amuel lokoku a Misima, touru Amuel Sakur, ido touru Sakur Simei.

²⁷ Ayakar Simei ŋidwe ŋulusapa ŋitomon ka ŋikanikapei ka ŋulupesur ŋikanikapei, nai akudyoko ŋidwe a ŋikaitotoi keŋ, aŋun, pa abu ateker kec tolalaar ikwapei ateker a ŋituŋa a Yuda.

²⁸ Akisyakin ŋinapei tari napaki ŋina aruworor Daudi erwosit, apotu ŋipapae a Simeon kiboiyoto alotaunio a lu: alo Beeriseba, alo Molada, alo Asarisual,

²⁹ alo Bila, alo Esem, alo Tolad,

³⁰ alo Besuel, alo Orima, alo Sikilag,

³¹ alo Bes-Marikabos, alo Asarisusim, alo Besibiri ka alo Saaraim.

³² Apotu daŋ ŋituŋa ŋul kiboiyoto anakiboisyo a ŋakan a ŋace: Alo Etam, alo Ain, alo Rimon, alo Tocen ka alo Asan,

³³ ta ŋirerya ŋice ŋulu erimokinito nen kidiŋ, todoyosi Kwap To, todolo lotaun ŋolo a Baalas. Erae ŋun ŋakigireta ŋuna kiricito ikes, ŋuna a ŋikalya kec ka ŋakiboisyo ŋuna kiboiyoto ikes.

³⁴ Arae ŋikilyok lu ŋikarikok a ŋatekerin kec: Mekobab, Yamilek, Yosa lokoku ka Amasia,

³⁵ Yoel, Yeu lokoku a Yosibia a ŋolo arae lokoku a Seraia a ŋolo arae lokoku ka Asiel,

³⁶ ŋice ikes Elibenai, Yaakoba, Yosoaya, Asaia, Adiel, Yesimiel, Benaia,

³⁷ Sisa lokoku a Sipi a ŋolo arae lokoku ka Alon a ŋolo arae lokoku a Yedaia a ŋolo arae lokoku a Simiri a ŋolo arae lokoku a Semaia.

³⁸ Arae ŋikilyok ŋul ŋikarikok a ŋatekerin kec. Apotu ŋituŋa a ŋatekerin kec tolalata nooi,

³⁹ topetaros todolo neni elomarere Gedor, Kide akadipaalat, iwarito ŋinya ŋulu a ŋamesekin kec.

⁴⁰ Apotu ikes toryamut ŋalup ŋuna ajokak ka ŋinya ŋulu ajokak, alotooma akwap ŋin, torae ŋina amam egurigur, ekisil bon ayai. Kerae sek akwap ŋin ŋina kiboiyoto Ŋiami ekiŋaren.

⁴¹ Kepote ŋikilyok ŋulu igiritae ŋirorwa kec ŋul nakwap ŋin apaki ŋina araakar Esekia erwosit ŋolo a Yudaya. Kepotu ikes kitijioto Ŋiami anakiboisyo kec kaapei ka Ŋimeuni ŋulu keyakasi nen, ido kepotu kiritasi ikes a nen jik, ikwapei ileereoto ŋakiro tari nakoloŋit na, kepotu nai ikes kiboikinos nen, anerae keya ŋinya a ŋamesekin kec nen.

⁴² Kepotu Ŋisimeoni ŋice ŋamiae ŋakan ŋulu kerikito ŋikilyok lu: Pelatia, Nearia, Repaia ka Usiel lokoku a Isi toremo Seir, akwap ŋina a ŋikamukumukui.

⁴³ Toara Ŋiamaleki ŋulu kidoŋito nen, ŋulu sek kepotu tobucar. Iboiyete tokona Ŋisimeoni ŋul a nen tari nakoloŋit na.