1 Ŋakiro a ŋirwa 26 - Ebaibul

Ŋiketeok ŋipukei

¹ Epite ŋolo atyakatyakatere ŋiketeok ŋipukei lo: Alemunitae aneni a Ŋikorasi Meselemia lokoku a Kore ŋolo anateker ka Asap.

² Arae lu ŋidwe a Meselemia ŋulusapa: Sakariya iŋes ŋolokiyae, Yediael ŋolo a ŋiarei, Sebadia iŋes ŋolo a ŋiuni, ŋolo a ŋiomwon iŋes Yasiniel,

³ ŋolo a ŋikan iŋes Elam, ŋolo a ŋikanikapei iŋes Yeoanan ka ŋolo a ŋikanikaarei iŋes Elieonai.

⁴ Arae lu ŋidwe ka Obededom ŋulusapa: Ŋolokiyae iŋes Semaia, ŋolo a ŋiarei iŋes Yeosabad, ŋolo a ŋiuni iŋes Yoa, ŋolo a ŋiomwon iŋes Sakar, ŋolo a ŋikan iŋes Nesanel,

⁵ ŋolo a ŋikanikapei iŋes Amiel, ŋolo a ŋikanikaarei iŋes Isakar ka ŋolo a ŋikanikauni iŋes Peulesai. Etiyakin ŋun anerae abu Akuj kiterereŋ Obededom.

⁶ Ayakar Semaia daŋ lokoku ka Obededom ŋidwe ŋulusapa, ŋulu arae ŋikarikok a ŋituŋa kec, anerae ayenete ikes arikit ŋituŋa.

⁷ Ŋidwe ŋul ikes lu: Oseni, Repael, Obed ka Elisabad, arae lu ŋiyeneta a Semaia: Eliu ka Semakia, arae ikes daŋ ŋikarikok ŋulu ayenete arikit ŋituŋa.

⁸ Arae ŋul daadaŋ ŋiletok ka Obededom; ayenete ikes ka ŋidwe kec ta ŋiyeneta kec arikit ŋituŋa, ido agogoŋ daŋ alotooma etic. Arae ikes daadaŋ ŋatomonikanikapei ka ŋaarei.

⁹ Ayakar Meselemia ŋidwe ŋulusapa ka ŋiyeneta ŋulu ayenete arikit ŋituŋa. Arae ikes daadaŋ ŋitomon ka ŋikanikauni.

¹⁰ Arae lu ŋidwe ka Osa a ŋolo arae Emerarit: Simiri iŋes arae ekarikon (tari daŋ ŋina pa araakar iŋes ekiyae, abu papa keŋ toseu iŋes aruwor ekarikon),

¹¹ ŋolo a ŋiarei iŋes Ilikia, ŋolo a ŋiuni iŋes Tebalia ka ŋolo a ŋiomwon iŋes Sakariya. Arae ŋidwe ka Osa ŋulusapa ka ŋiyeneta keŋ daadaŋ ŋitomon ka ŋiuni.

¹² Atyakatyakatae ŋiketeok ka Akai ka Akuj ŋul a ŋatukon, a ŋikalya, ido ainakinitae ŋiticisyo alo Kai ka Akuj lopite ŋolo kitiyaata ŋiyeneta kec ekiŋaren.

¹³ Aponi kisitiyae akilamilam aseunia ŋiketeok a ŋolopuke, eryaaritae a ŋikalya, eseo pa etyakatyakatae ŋisorok ka ŋikasikou.

¹⁴ Aponi anakilamilamet a ŋina esyaunan toseunae Selemia akitere epuke ka Akai ka Akuj ŋolo alo Kide. Ekaku, aponi kilamilamae aŋuna a Sakariya alokoku keŋ, a ŋolo arae ekile ŋolo aoson ŋolo ayeni alimokin ituŋanan ŋakiro ŋuna ajokak, ido abu akilamilamet toseu iŋes akitere epuke ka Akai ka Akuj ŋolo alo Kuju.

¹⁵ Abu akilamilamet ŋina ke epuke a ŋolo alo Kwap Akai ka Akuj toseu Obededom aruwor eketen epuke ŋol, ido abu akilamilamet ŋina ka akitere agule ŋina eŋadao ŋiboro, toseu ŋidwe ka Obededom ŋulusapa.

¹⁶ Apotu ŋakilamilameta ŋuna ke epuke a ŋolo alo To ka ŋuna ke epuke a ŋolo a Salekes a ŋolo ayai lorot ŋolo etorit nenimukur, toseut Supim ka Osa.

¹⁷ Lowae ŋolo alo Kide Akai ka Akuj, ayakasi a ŋinakoloŋit ŋilepi ŋikanikapei, lowae ŋolo alo Kuju Akai ŋin, ayakasi a ŋinakoloŋit ŋilepi ŋiomwon, lowae ŋolo alo Kwap Akai ŋin ayakasi a ŋinakoloŋit ŋilepi ŋiomwon, ido a ŋinakoloŋit ayakasi ŋiketeok ŋiomwon akitere agule ŋina eŋadao ŋiboro, ŋiarei a ŋinagule.

¹⁸ Ayakasi ŋiketeok ŋiomwon lowae ŋolo alo To, eboiyete alorukude ka ŋiarei eboiyete alobarasan ka Akai ka Akuj.

¹⁹ Arae ŋol epite ŋolo atyakatyakatere Ŋikorasi ka ŋidwe a Merari ŋulusapa ŋulu eteete ŋipukei ka Akai ka Akuj.

Ŋikeŋadak ŋisiliŋa, ŋikapolok ka ŋikatubok ŋakiro

²⁰ Alo Lepi a ŋuluce, ainakinitae Aija apolokin ŋisiliŋa ŋulu ka Akai ka Akuj ka ŋagulei ŋuna eŋadao ŋainakineta ŋuna einakinitae neni ka Akuj.

²¹ Ladan epei a ŋidwe a Gerisom a ŋulusapa, iŋes arae papaa a ŋikalya a ŋulu alalak kaapei ke ekal alokoku keŋ Yeiel.

²² Ainakinitae ŋidwe a Yeiel ŋulusapa lu: Sesam ka Yoel akidarit ŋisiliŋa ŋulu ka Akai ka Akuj.

²³ Ainakinitae daŋ ŋiticisyo neni a ŋipapae a Ŋiamirami, a Ŋiisari, a Ŋieburoni ka a Ŋiusieli.

²⁴ Sebuel ŋolo anateker a Moses, lokoku a Gerisom iŋes apolokinit ŋisiliŋa ŋulu ka Akai ka Akuj.

²⁵ Ayenasi Selomis ka Gerisom aneni alokaato keŋ Elieser. Arae Elieser papa a Reabia, a ŋolo arae papa a Yesia, a ŋolo arae papa a Yoram, a ŋolo arae papa a Siciri, a ŋolo arae papa Selomis.

²⁶ Ainakinitae Selomis ka ŋituŋa ke ekal keŋ akidarit ŋainakineta daadaŋ ŋuna einakinit erwosit Daudi neni ka Akuj ŋuna einakinito ŋikarikok a ŋikalya neni ka Akuj ka ŋuna einakinito ŋikarikok a ŋatekerin neni ka Akuj ta ŋuna einakinito ŋikarikok a ŋasigarya neni ka Akuj.

²⁷ Apotu ŋul yaasi ŋiboro ŋice ŋulu aŋatunete ikes alojiesyo Kai ka Akuj, ikotere kisitiyae asubanakinia Akai ke Ekapolon.

²⁸ Aponi inakinae Selomis ka ŋiyeneta keŋ akidar ŋiboro daadaŋ alo Kai ka Akuj ŋulu ainakini Samuel eketeyenikinan ŋakiro, ŋulu ainakini Saul lokoku a Kis, ŋulu ainakini Abiner lokoku a Ner ka ŋulu ainakini Yoab lokoku a Seruia ta ŋiboro ŋice daadaŋ ŋulu ainakinitae Akuj.

²⁹ Aneni a Ŋiisari, aponi Kenania ka ŋidwe keŋ ŋulusapa inakinae ŋiticisyo ŋulu pa ayakasi Kai ka Akuj, aponi ikes inakinae aruwor ŋikapolok ka ŋikatubok ŋakiro alo Isirael daadaŋ.

³⁰ Aneni a Ŋieburoni, aponi Asabia ka ŋiyeneta keŋ ŋikilyok ŋulu apedorito etic, ŋulu arae ekimar kec ŋamiae aliput ka ŋamiae ŋakanikaarei, inakinae apolokin Isirael alowae a ŋolo alo To Yorodan, ikotere ikes itiyaete etic ŋolo ke Ekapolon daadaŋ ka ŋolo ke erwosit.

³¹ Aneni a Ŋieburoni Yeria iŋes arae ekapolon. (Ani edoli ekaru ŋolo a ŋatomoniomwon erae Daudi erwosit, aponi kiwarae ŋakiro ŋuna sek egiritae nakigireta a ŋanyameta ka a ŋikalya, ido aponi toryamunae Ŋieburoni ŋulu apedorito etic alo Yaser anakwap a Gilead.)

³² Abu erwosit Daudi toseu Yaser ka ŋiyeneta keŋ ŋalipyo ŋaarei ka ŋamiae ŋakanikaarei ŋulu apedorito etic, ŋulu arae ŋikarikok a ŋikalya kec, ido abu erwosit Daudi inak ikes apolokin Ŋirubenii, Ŋigadi ka atutubet apei ŋina a Ŋimanasi akitiya etic daadaŋ ŋolo arae ŋolo ka Akuj ka ŋolo ke erwosit.