1 Ŋakiro a ŋirwa 24 - Ebaibul

Epite ŋolo atyakatyakatere ŋisacaradotin

¹ Arae lo epite ŋolo atyakatyakatere ŋipapae ka Aron: Arae lu ŋidwe ka Aron ŋulusapa: Nadab, Abiu ka Eleasar ta Isamar.

² Nai apotu Nadab ka Abiu totwaka eriŋa papa kec eyari, mam ŋidwe ŋulusapa apotu ikes touruut; aŋun, apotu Eleasar ka Isamar toruwor ŋisacaradotin.

³ Anakiŋarakina kaapei ka Sadok lopapait ke Eleasar ka Aimelek lopapait ka Isamar, abu Daudi totyak ikes toruwor ŋatukon, ikotere eboonokin akitiya apaki ŋina emaikina kitiyaata.

⁴ Aŋuna aponere toryamunae ŋikarikok ŋulu alalak eyakasi lopapae ke Eleasar akilo alopapae ka Isamar, aponi totyakae ikes ikona: Kituruworoe ŋitomon ka ŋikanikapei ŋulu arae ŋipapae ke Eleasar ŋikapolokinitok ŋikalya a ŋituŋa ke Eleasar, kituruworoe ŋikanikauni ŋikapolokinitok ŋikalya a ŋituŋa ka Isamar.

⁵ Aponi ikes totyakae emam ŋini ariit neni a ŋice, kisitiyae akilamilam, anerae amaikina toryamunae ŋikarikok ŋulu ka akibois a ŋina asegan ka ŋikarikok ŋulu ke etic ka Akuj alopapae ke Eleasar ka Isamar.

⁶ Abu ekaran Semaia lokoku a Nesaniel ŋolo arae Elepait, kigir ŋirorwa kec alokiŋaren erwosit ka ŋikapolok lu: Sadok ŋolo arae esacaradoti, Aimelek lokoku ka Abiasar ka ŋikapolok ŋulu a ŋikalya a ŋituŋa a ŋisacaradotin ka ŋilepi. Tolemunae ekal epei aneni a ŋituŋa ke Eleasar ka epei aneni a ŋituŋa a Isamar.

⁷ Akilamilamakinet ŋina esyaunan, abu min neni a Yeoyarib, ŋina a ŋaarei neni a Yedaya,

⁸ ŋina a ŋauni neni ka Arim, ŋina a ŋaomwon neni a Seorim,

⁹ ŋina a ŋakan neni a Maliciya, ŋina a ŋakanikapei neni a Mijamin,

¹⁰ ŋina a ŋakanikaarei neni ka Akos, ŋina a ŋakanikauni neni ka Abiya,

¹¹ ŋina a ŋakanikaomwon neni a Yesua, ŋina a ŋatomon neni a Sekania,

¹² ŋina a ŋatomon kaapei neni ke Eliasib, ŋina a ŋatomon ka ŋaarei neni a Yakim,

¹³ ŋina a ŋatomon ka ŋauni neni a Upa, ŋina a ŋatomon ka ŋaomwon neni a Yesebeab,

¹⁴ ŋina a ŋatomon ka ŋakan neni a Biliga, ŋina a ŋatomon ka ŋakanikapei neni a Imer,

¹⁵ ŋina a ŋatomon ka ŋakanikaarei neni ke Esir, ŋina a ŋatomon ka ŋakanikauni neni ka Apises,

¹⁶ ŋina a ŋatomon ka ŋakanikaomwon neni a Pesaia, ŋina a ŋatomoniarei neni a Yesikel,

¹⁷ ŋina a ŋatomoniarei ka apei neni a Yakin, ŋina a ŋatomoniarei ka ŋaarei neni a Gamul,

¹⁸ ŋina a ŋatomoniarei ka ŋauni neni a Delaia ka ŋina a ŋatomoniarei ka ŋaomwon neni a Masia.

¹⁹ Arae ŋol epite ŋolo esibakitere ikes itiyaete apaki ŋina elomaryata Kai ke Ekapolon, lopite ŋolo alimunitotor ŋikisila a papaa kec ka Aron aŋuna kec, ikwapei ecikitor Ekapolon Akuj a Ŋisirael iŋes.

Ŋilepi ŋuluce

²⁰ Ŋipapae a Lepi ŋuluce lu ŋulu aseunitae: Aponi toseunae alodwe ka Amiram a ŋulusapa Subael; toseunae alodwe a Subael a ŋulusapa Yedeia.

²¹ Aneni a Reabia, aponi toseunae Isia lokoku keŋ ŋolokiyae.

²² Alopapae a Isarites, aponi toseunae Selomos; alodwe a Selomos a ŋulusapa, aponi toseunae Yaas.

²³ Aneni a ŋidwe ke Eburon a ŋulusapa, aponi toseunae lu: Ŋolo esyaunan Yeria, ŋolo a ŋiarei Amaria, ŋolo a ŋiuni Yaasiel ka ŋolo a ŋiomwon Yekamean.

²⁴ Aneni a ŋidwe a Usiel a ŋulusapa, aponi toseunae lokoku keŋ Mika; aneni a ŋidwe a Mika a ŋulusapa aponi toseunae Samir.

²⁵ Aneni alokaato a Mika, aponi toseunae Isia; aneni a ŋidwe a Isia a ŋulusapa, aponi toseunae Sakariya.

²⁶ Aneni a ŋidwe a Merari a ŋulusapa, aponi toseunae Mali ka Musi. Aneni a Yasia, aponi toseunae lokoku keŋ Beno.

²⁷ Aneni a ŋipapae a Merari aponi toseunae ŋidwe a Yasia lu: Beno, Soam ka Sakur ta Ibiri.

²⁸ Aneni a Mali, aponi toseunae Eleasar, amamukar Eleasar ikoku ŋinisapat.

²⁹ Aneni a Kis aponi toseunae Yerameel lokoku keŋ.

³⁰ Aneni a Musi, aponi toseunae Mali ka Eder ta Yerimos. Arae ŋul Ŋilepei imarunitae a ŋikalya kec.

³¹ Apotu ikes daŋ kisitiyata akilamilam lopite ŋolo esitiyaata ŋikaitotoi kec ŋidwe ka Aron. Apotu ikes kitiyata ŋun alokiŋaren erwosit Daudi ka alokiŋaren Sadok ka Aimelek ta ŋikarikok a ŋikalya a ŋisacaradotin ka ŋilepi. Apotu ikes kitiyata ŋun eriyan neni a ŋikalya a ŋikaitotoi kec a ŋulu apolok ka ŋulucicik.