1 Ŋakiro a ŋirwa 23 - Ebaibul

Ŋikalya a ŋilepi ka ŋiticisyo kec

¹ Ani emojoŋi Daudi itemokin ŋikaru keŋ, abu kituruwo lokoku keŋ Solomon ekepukan Isirael.

² Abu daŋ tocunak ŋikasikou daadaŋ alo Isirael, kaapei ka ŋisacaradotin ta ŋilepi.

³ Kimarunae ŋilepi ŋulu arae ŋikaru kec ŋatomoniuni ka adepar, ido abu ekimar kec todol ŋalipyo ŋatomoniuni ka ŋakanikauni.

⁴ Tema Daudi, “Alotooma lu, emaikina ŋalipyo ŋatomoniarei ka ŋiomwon itiyaete etic ŋolo ka Akai ke Ekapolon, emaikina ŋalipyo ŋakanikapei toruwor ŋikapolok ka ŋikatubok ŋakiro,

⁵ emaikina ŋalipyo ŋaomwon toruwor ŋikedarak ŋipukei ka emaikina ŋalipyo ŋaomwon toruwor ŋulu ipurosi Ekapolon eramete ŋiboro ŋulu eeore, ŋulu adau ayoŋ akitiyaun aŋuna ka akipuryo Ekapolon.”

⁶ Tokorak Daudi ŋilepi natukon itiriyanit ka ŋidwe a Lepi ŋulusapa lu: Gerisom ka Koas ta Merari.

⁷ Arae lu ŋidwe a Gerisom ŋulusapa: Ladan ka Simei.

⁸ Arae lu ŋidwe a Ladan ŋulusapa: Yeiel iŋes ŋolokiyae, totupak Sesam ka Yoel. Arae ikes daadaŋ ŋiuni.

⁹ Arae lu ŋidwe a Simei ŋulusapa: Selomos ka Asiel ta Aran. Arae ikes daadaŋ ŋiuni, ido arae ikes ŋikarikok a ŋiletok a Ladan.

¹⁰ Arae lu ŋidwe a Simei ŋulusapa: Yaas, Sisa ka Yeus ta Beria. Arae ikes daadaŋ ŋiomwon.

¹¹ Yaas iŋes arae ekiyae, ido Sisa iŋes ŋolo a ŋiarei. Apotu Yeus ka Beria nyeuruut ŋidwe ŋulusapa ŋulu alalak, aŋun aponi ikes kimarakinae erae ekal epei.

¹² Arae lu ŋidwe a Koas ŋulusapa: Amiram, Isar ka Eburon ta Usiel. Arae ikes daadaŋ ŋiomwon.

¹³ Arae lu ŋidwe ka Amiram ŋulusapa: Aron ka Moses. Aponi Aron inakinae etic ŋolo ka akitaleunun ŋiboro ŋulu asegak nooi, ikotere iŋes ka ŋidwe keŋ ŋulusapa erubakinete eayeneneete ŋainakineta neni ke Ekapolon, kitiyata etic keŋ, tolimonosi ŋakiro ŋuna ka akiterereŋ ŋituŋa alokiro a Ekapolon ŋikaru ka ŋikaru.

¹⁴ Nai Moses ŋolo arae ituŋanan ŋini ka Akuj, aponi kimarakinae ŋidwe keŋ ŋulusapa nateker a Lepi.

¹⁵ Arae lu ŋidwe a Moses ŋulusapa: Gerisom ka Elieser.

¹⁶ Alodwe a Gerisom a ŋulusapa, Sebuel iŋes arae ŋolokiyae.

¹⁷ Ayakar Elieser isapat ipei bon, anyaritae ekiro keŋ Reabia, nai ayakar Reabia ŋidwe ŋulusapa ŋulu alalak.

¹⁸ Ayakar lokoku a Koas ŋolo anyaritae Isar esapat ŋolo anyaritae Selomis.

¹⁹ Arae lu ŋidwe ke Eburon ŋulusapa: Yeria iŋes ŋolokiyae, Amaria iŋes ŋolo a ŋiarei, Yaasiel iŋes ŋolo a ŋiuni ka Yekameam iŋes ŋolo a ŋiomwon.

²⁰ Arae lu ŋidwe a Usiel ŋulusapa: Mika iŋes ŋolokiyae ka Isia iŋes ŋolo a ŋiarei.

²¹ Arae lu ŋidwe a Merari ŋulusapa: Mali ka Musi. Arae lu ŋidwe a Mali ŋulusapa: Eleasar ka Kis.

²² Abu Eleasar totwana nyeuruuna ŋisapa. Ayakar iŋes ŋapesur bon. Apotu ŋidwe a Kis alokaato a papa kec kiita ikes.

²³ Arae lu ŋidwe a Musi ŋulusapa: Mali ka Eder ta Yeremos. Arae ikes daadaŋ ŋiuni.

²⁴ Arae lu ŋiletok a Lepi imarunitae a ŋatekerin kec ka ŋikalya kec, igiritae ŋinituŋanan kec ekiro keŋ. Ŋiletok a Lepi daadaŋ ŋulu arae ŋikaru kec ŋatomoniarei ka adepar, ayakar etic edio alo Kai ka Akuj.

²⁵ Abu Daudi tema, “Adau Ekapolon Akuj a Ŋisirael akisieŋar ŋituŋa keŋ; ido iboi iŋes alo Yerusalem ŋikaru ka ŋikaru.

²⁶ Aŋun, nyemaikina ŋilepi torubakis edakanarete anakibois kaapei tari ŋinace eema, kori ŋinibore daadaŋ esitiyao ilipyo.”

²⁷ Anakiro a Daudi a ŋuna esidyok, egireneneo ŋilepi daadaŋ apaki ŋina edolyoto ŋikaru kec ŋatomoniarei ka ŋice,

²⁸ ido akoranakinio ŋiticisyo lu: Akiŋaranakin ŋisacaradotin ŋulu arae ŋipapae ka Aron apaki ŋina ilipere alo Kai ka Akuj, akiyokit ŋagulei ka ŋalapatui ŋuna ka Akai ka Akuj, akitaleunun ŋiboro daadaŋ ŋulu asegak alo Kai ka Akuj ka akitiya etic daadaŋ ŋolo iitana alo Kai ka Akuj;

²⁹ akiyok ŋamugati ŋuna ainanakinio Ekapolon, ŋakirya ŋuna ainanakinio Ekapolon, ŋabisikotyo ŋuna emam ŋakinyalet, ŋasipiryae ŋuna epoere ka amunaere ŋamugati ta akipim alalau ka apotis a ŋinibore.

³⁰ Arae daŋ etic kec akiwo a ŋinataparacu alakar neni a Ekapolon ka akipur Ekapolon. Amaikina ikes kitiyata ŋun tari eboŋ

³¹ ka ainanakin neni ke Ekapolon ŋainakineta ŋuna epeyo ŋapakio ŋuna a Sabato ka ŋuna a ŋasuban ke elap a ŋolokitete ta ŋapakio ŋuna itiyaere ŋasuban ŋunace daŋ. Amaikina ikes kitiyanakis Ekapolon a ŋinapaki iwuapito ekimar ŋolo ecikitae ikes kitiyaata a ŋinapaki alokiŋaren Ekapolon.

³² Aŋun, apotu ŋilepi kitiyata ŋiticisyo kec ŋulu ainakinitae aŋuna ke eema a ŋolo elipere ka aŋuna a akibois a ŋina asegan, arae ŋikaitotoi kec ŋipapae ka Aron apolokinito ŋiketiyak ŋul alotic a ŋolo ka Akai ke Ekapolon.