1 Ŋakiro a ŋirwa 22 - Ebaibul

¹ Tema nai Daudi, “Emaikina Akai ke Ekapolon ka Akuj min ne, kaapei ka Amuroet ŋina icunyere ŋainakineta ŋuna a Ŋisirael.”

Kitemonokin Daudi akiduk Akai ka Akuj

² Tolimok Daudi ŋituŋa atemar emaikina tocunakinae ŋituŋa daadaŋ ŋulugelae ŋulu iboiyete alo Isirael. Abu iŋes toseu alotuŋa a ŋul ŋulu etubutubuyete ŋamoru kitemonokis ejok aŋuna ka adukio Akai ka Akuj.

³ Inak ŋituŋa ŋasuwa ŋuna etemokino akitiyaunia ŋisumari ŋulu a ŋipukei ka ŋulurucet, inak ikes tari eburonis ŋolo alalan nooi, ŋolo pa apedoritae akipim.

⁴ Inak ikes tari ŋakito a Cedar ŋace ŋuna pa ayenen ekimar, anerae keris Ŋisidoniani ka Ŋitiriani keyaut neni a Daudi ŋakito a Cedar ŋuna alalak nooi.

⁵ Tema Daudi, “Edit Solomon lokoku kaŋ, emam ŋuna eyeni iŋes akitiya nooi, ido Akai ŋina emaikina todukoe aŋuna ke Ekapolon, emaikina erae ŋina ailiilon nooi, ŋina eyenen, ŋina itopolooritae anakwapin a daadaŋ; aŋun, emaikina ayoŋ etemonokin aŋuna keŋ.” Aŋun, abu Daudi kitemonok ŋiboro ŋulu alalak nooi ŋulu edukere Akai ŋin eriŋa apaki ŋina etwania iŋes.

Ŋakiro ŋuna abu Daudi tolimok Solomon ka Ŋikarikok

⁶ Tonyarau nai Daudi lokoku keŋ Solomon, tolimok iŋes akiduk Akai aŋuna ke Ekapolon Akuj a Ŋisirael.

⁷ Tema Daudi neni a Solomon, “Ikoku kaŋ, abu ayoŋ oyeu akiduk Akai aŋuna ke ekiro a Ekapolon ka Akuj kaŋ;

⁸ nai abu akirot a Ekapolon bu neni kaŋ ebala, ‘Idau iyoŋ abukor ŋaokot a ŋituŋa a ŋulu alalak ka idau iyoŋ akitijiore ŋituŋa alojiesyo a ŋulu apolok nooi; emam nyikidukokini iyoŋ ayoŋ Akai aŋuna a ekiro kaŋ, anerae ibuko iyoŋ ŋaokot a ŋituŋa a ŋulu alalak anakwap ete ayoŋ.

⁹ Kiira, iuruuni iyoŋ ikoku ŋinisapat, eruwor iŋes ekile ŋolo emina ekisil. Ainakini ayoŋ iŋes kisila ka ŋimoe keŋ daadaŋ alowaetin ka akwap keŋ a daadaŋ; enyarao ekiro keŋ Solomon, ainakini ayoŋ iŋes ekisil ka akinapakina alo Isirael ŋirwa ŋulu ipukator iŋes.

¹⁰ Edukokini iŋes Akai aŋuna ke ekiro kaŋ. Eruwor iŋes lokoku kaŋ, ido aruwor ayoŋ papa keŋ, eturubakini ayoŋ ŋiletok keŋ ipukato alo Isirael ŋikaru ka ŋikaru.’

¹¹ Tokona ikoku kaŋ, toyai Ekapolon ka iyoŋ, ikotere ipedori akiduk Akai ke Ekapolon Akuj kon, lopite ŋolo adaunia iŋes alimun aŋuna kon.

¹² Ŋuna apolok ikes nu, elipi ikiinak Ekapolon iyoŋ ayenut ka aosou apaki ŋina ikiwuakinia iŋes iyoŋ akipuka Isirael daadaŋ, ikotere iyoŋ iwuapi ŋikisila ke Ekapolon ka Akuj kon.

¹³ Ipedori nai akilounun daadaŋ erae kiwuap ejok ŋitalyo ka ŋikisila ŋulu abu Ekapolon inak Moses aŋuna a Ŋisirael. Togogoŋior ka tomukyaniar. Nyikuryaniar, kori nyicamu ikikadanakini.

¹⁴ Alotooma aryebo ŋina apolon, adau ayoŋ alemun aŋuna ka Akai a ŋina ke Ekapolon ŋatalantae ŋalipyo amiat ŋuna a egolid, ŋatalantae amilion ŋuna a esilipa, ido alemu eburonis ka ŋasuwa ŋuna alalak ŋuna nyimarun apotis kec, anerae elalak nooi, alemu ayoŋ ŋakito ka ŋamoru daŋ. Emaikina iyoŋ kiyatak ŋiboro ŋice loboro ŋul.

¹⁵ Iyakar iyoŋ ŋiketiyak ŋulu alalak lu: Ŋulu atubok ŋamoru, ŋulu ipucete esimit, ŋulu iciete ŋabaoi, ŋikadukok daadaŋ ŋulu eyenete etic ŋulu nyimarun ka daadaŋ ŋulu eyenete akitiya ŋiticisyo ejok.

¹⁶ Iyakar iyoŋ ŋiketiyak ŋulu eyenete akitiya isitiyaete, egolid, esilipa, eburonis ka ŋasuwa. Togeu tokona etic, toyai Ekapolon ka iyoŋ.”

¹⁷ Kicik daŋ Daudi ŋikasikou alo Isirael akiŋarakin lokoku keŋ Solomon, kiŋit tema,

¹⁸ “Nyirukito mono iyes ke Ekapolon Akuj kus a? Nyeinakina mono iŋes iyes akieŋar ejie alowaetin a daadaŋ a? Akainaki iŋes ayoŋ akipuka ŋituŋa ka akwap a na, ido aruwor akwap na ŋina ke Ekapolon ka ŋina a ŋituŋa keŋ.

¹⁹ Inakinos tokona alotai ka anakiyar kus, kiwara Ekapolon Akuj kus. Apesi kisyakis akiduk akibois ŋina asegan ŋina ke Ekapolon Akuj, ikotere iyaunete Asaduku ŋina ka Acamunet ke Ekapolon ka ŋiboro ŋulu asegak ŋulu ka Akuj tooma Akai ŋina idukokinete aŋuna ke ekiro a Ekapolon.”