1 Ŋakiro a ŋirwa 21 - Ebaibul

Kimar Daudi ŋikilyok ŋulu apedorito ajiore

¹ Tolosik Satan Ŋisirael, ido abu inak Daudi atametait ŋina ka akimar Ŋisirael.

² Aŋun, abu Daudi tema neni a Yoab kaapei ka ŋikarikok ŋulu a ŋasigarya keŋ ebe, “Toloto kimara Ŋisirael akisyakin alo Beeriseba tari Dan, ido ipotu itolimokis ayoŋ, ikotere ayenuni ekimar kec.”

³ Nai abu Yoab toboŋok Daudi tema, “Emaimai ayoŋ Ekapolon kiyatak ekimar a ŋasigarya todolo amiat ŋarwa amiat. Meere mono ikes daadaŋ ekapolon erwosit kaŋ ŋituŋa ŋulu ipukat iyoŋ a? Kaanukiro icamitor iyoŋ ekapolon kaŋ akitiya ŋun? Kaanukiro icamitor iyoŋ ayaun akiilit ŋina ka asecit neni a Ŋisirael?”

⁴ Apotu ŋakiro a Yoab nyisimyekis erwosit ŋuna alimunit, aŋun, abu Yoab torotok aneni ke erwosit, kirimo nakwap a Isirael daadaŋ, ido ekaku abu toboŋu Yerusalem.

⁵ Ya nai Yoab ekimar a ŋikilyok a ŋulu apedorito ejie neni a Daudi. Alo Isirael daadaŋ arae ekimar a ŋikilyok a ŋulu apedorito ejie a ŋileŋia amilion ka ŋalipyo amiat ka alo Yudaya arae ekimar ŋalipyo ŋamiae ŋaomwon ka ŋatomonikanikaarei.

⁶ Nai pa emarakinit Yoab ŋituŋa ka ateker a Lepi ka Benjamin nen, anerae pa acamit erwosit Yoab kitiya ŋun.

⁷ Nai abu Akuj nyelakar aŋuna ka akimar ŋituŋa; aŋun, abu kisican Ŋisirael.

⁸ Tema nai Daudi neni ka Akuj, “Adau ayoŋ akisec nooi aŋuna etiyaa ŋakiro ŋun. Nai tokona, ekelipi iyoŋ tolema akiilit ŋina ka asecit na aneni a eketiyan kon, anerae etiya ayoŋ nu anabaŋao a ŋina apolon nooi.”

⁹ Tema Ekapolon neni a Gad a ŋolo arae eketeyenenakinan a Daudi ŋakiro ŋuna eponito,

¹⁰ “Ape tolimok Daudi ebe, ‘Alimu Ekapolon atemar akalimokini ayoŋ iyoŋ ŋakiro ŋauni; toseu apei alokidiŋ kec, ido etiyakini ayoŋ ŋun neni kon.’ ”

¹¹ Aŋun, abu Gad tolot neni a Daudi tema, “Ebala Ekapolon ebe, ‘Toseu iyoŋ elope:

¹² Emaikina mono yaunae ŋikaru ŋiuni ŋulu ke eron; kori ŋilapyo ŋiuni ŋulu ikimunyaryata ŋimoe kus a ŋileŋia itoreut iyes, kori ŋirwa ŋiuni ŋulu ikiarya iyes Ekapolon a ekileŋ keŋ, ŋirwa ŋulu elomunia adyaka anakwap, ŋina inyasia emalaika ŋolo ke Ekapolon ŋinakibois daadaŋ alo Isirael.’ Totamatama mono iyoŋ ŋakiro ŋun, ido toseu ŋuna emaikina ayoŋ oboŋok ŋolo ekeyakuunit ayoŋ.”

¹³ Toboŋok Daudi Gad tema, “Akaryebete ayoŋ ŋakiro nu nooi, kimyekinae ayoŋ ekesican Ekapolon, anerae epol nooi akisyon keŋ; nai nyeruwor ŋituŋa ekesicanete ayoŋ.”

¹⁴ Aŋun, abu Ekapolon kiyakiya edeke neni a Ŋisirael, ido apotu ŋituŋa ŋalipyo ŋatomonikanikaarei totwaka.

¹⁵ Abu Akuj kiyakiya emalaika amunyar ŋituŋa a Yerusalem. Nai ani edikino emalaika itiyae ŋun, abu Ekapolon kiŋolik ŋun, ido abu kilocok ŋatameta keŋ, tosodi tema neni ke emalaika a ŋolo aari ŋituŋa, “Etemokin! Kisieŋu akan kon.” Apaki ŋin, awoi emalaika a Ekapolon ŋol analos a ŋina ka Orenan a Eyebusit.

¹⁶ Kiŋoliya Daudi kidiama, kiŋolik emalaika ke Ekapolon ewoi alokidiŋ nakuj ka akwap, etiŋit ekileŋ ŋolo alemunitae anakuraro aarya ŋituŋa a Yerusalem. Apotu nai Daudi ka ŋikasikou tonapa ŋilowi ŋulukigworyet, toramakinos kwap, kijuuroto.

¹⁷ Kiŋit Daudi Akuj tema, “Meere mono ayoŋ bon abu olimu atemar emaikina kimarae ŋikilyok ŋulu epedorito ajiore a? Ayoŋ bon asecit ka ayoŋ bon etiya aronis ŋina apolon nooi. Nai ŋituŋa lu ŋulu ikote ŋamesekin, nyo itiyato ikes? Okoe Ekapolon Akuj kaŋ, ekemaimai ayoŋ iyoŋ, kisicanae ayoŋ ka ŋituŋa a ekal a papa kaŋ, nai nyicamak ŋican lu torubakis eya lotuŋa kon.”

Namuroet a Daudi ka amuronot

¹⁸ Abu nai emalaika a Ekapolon tolimok Gad alosit neni a Daudi alimokin iŋes atemar emaikina kitipeiyo neni amukur, ido todukok Namuroet ke Ekapolon nalos ŋina ka Orenan a Eyebusit.

¹⁹ Kiira Daudi ŋakiro a Gad, kitipeiyo ikwaŋinapei alimokinitor Gad iŋes alokiro ke Ekapolon.

²⁰ Apaki ŋin, arami Orenan ŋikinyom ŋulu ikwaan ke erau, ani eŋoleŋolekini iŋes, kiŋolik emalaika, toema ŋidwe keŋ ŋulusapa ŋuluomwon ŋulu arukito ka iŋes akiŋop.

²¹ Bu Daudi neni ayai Orenan, ani iŋolikini Orenan Daudi, toesik alos, tolot kijuuru alokiŋaren Daudi todol ereet keŋ kwap.

²² Tema Daudi neni ka Orenan, “Inakinae ayoŋ neni eyai alos kon odukok Namuroet a Ekapolon nen, ikotere edeke ejoŋoe akiar ŋituŋa. Kitogyelakinae ayoŋ nen a egyelit a ŋolo icamit iyoŋ a daadaŋ.”

²³ Tema nai Orenan neni a Daudi, “Ape ya! Emaikina ekapolon erwosit kaŋ kitiya daadaŋ ŋuna italakarito iŋes. Kiira, akainak ayoŋ iyoŋ ŋimoŋin kituruwo ainakinet ŋina epeyo, akainak tari ŋarameta ya toruwor ŋakito, akainak tari ŋikinyom ŋulu ikwaan ke erau toruwor ainakinet a ŋikinyom neni ke Ekapolon. Akainak ayoŋ iyoŋ ŋul daadaŋ.”

²⁴ Nai abu erwosit Daudi toboŋok Orenan tema, “Mam, agyeli ayoŋ ikes aneni kon a egyelit a ŋolo icamit iyoŋ a daadaŋ. Nyaai ayoŋ neni ke Ekapolon ibore ŋini erae ŋini kon, kori ainakinet ŋina epeyo ŋina emam nyagyelit ayoŋ.”

²⁵ Aŋun, abu Daudi totacak Orenan ŋicekelya ŋamiae ŋakanikapei ŋulu ke egolid aŋuna ka akibois a ŋin.

²⁶ Abu Daudi todukok Namuroet a Ekapolon nen, ido inak Ekapolon ŋainakineta ŋuna epeyo ka ŋuna ke ekisil. Kilip Daudi neni ke Ekapolon, ido abu Ekapolon toboŋok ŋakilipasinei keŋ, kiyaku akim anakuj, min Namuroet ŋina a ŋainakineta a ŋuna epeyo.

²⁷ Abu nai Ekapolon tolimok emalaika akinyakakin ekileŋ keŋ nakuraro, ido abu emalaika kinyakak ekileŋ nakuraro.

Akibois ŋina aseunitae aŋuna ka Akai ka Akuj

²⁸ Ani eanyuni Daudi apaki ŋin atemar aboŋoki Ekapolon iŋes analos ka Orenan a ŋolo arae Eyebusit, abu inak ŋamuronisya neni ke Ekapolon a nen.

²⁹ Apaki ŋin, ayakasi eema ke Ekapolon ŋolo kitiyauni Moses analoŋisat ka Namuroet ŋina apeyere ŋainakineta nakibois ŋina amukur alo Gibeon.

³⁰ Nai pa abu Daudi tolot nen akiŋit Akuj ŋakiro ke eema a ŋol, anerae akuryana iŋes aŋuna a emalaika ke Ekapolon.