1 Ŋakiro a ŋirwa 19 - Ebaibul

Kilou Daudi Ŋiamoni ka Ŋiarameani

¹ Ekaku ka apaki a ŋina auruwuana, totwana erwosit a Ŋiamoni ŋolo anyaritae Naas, kilunyokin lokoku keŋ lokicoloŋ keŋ kipuka Ŋiamoni.

² Tema Daudi, “Etiyae ayoŋ ŋuna ajokak neni Anun alokoku a Naas, lopite ŋolopei abunio papa keŋ kitiya ejok neni kaŋ.” Aŋun, abu Daudi kiyakiya ŋituŋa akisirworiun Anun; alimokin iŋes akiyaloloŋ a Daudi aŋuna ka atwanare a Naas a papa Anun. Ani edolete ŋituŋa ŋulu eyakit Daudi nakwap a Ŋiamoni neni Anun, akisirworiun iŋes,

³ kiŋita ŋikapolok a Ŋiamoni Anun ekapolon kec temasi, “Itami kire iyoŋ atemar itopoloorit Daudi papa kon aŋuna eyakuunia ŋituŋa alimokin iyoŋ akiyaloloŋ keŋ aŋuna a papa kon a? Meere mono aripirip iyakuunitor Daudi ŋituŋa, ikotere erosete ejok, ido kikamasi akwap a?”

⁴ Aŋun, abu Anun kikama ŋituŋa ŋulu eyakit Daudi, tobanya ŋipeneka kec, totub ŋilowi kec alokidiŋ anacirin, ido kirita ikes toloto nariet;

⁵ ido apotu ŋituŋa ŋul torotokis. Ani elimokinio Daudi ŋakiro ŋun, kiyakiya ŋituŋa akisiryam ŋikilyok ŋul, anerae apotu ŋileec kiruma ikes nooi. Tema erwosit neni kec, “Kiboiyoto mono alo Yeriko, akitodol ŋina elomuniata ŋipeneka kus, ido nai toboŋut laalo.”

⁶ Ani eanyunete Ŋiamoni atemar aremokin Daudi ikes, abu Anun kaapei ka Ŋiamoni kiyakiyasi esilipa ŋolo arae ŋakiloi ŋalipyo ŋatomoniuni ka ŋaomwon akipaŋgaunia ŋagaari ka ŋikametok ŋaŋolei. Apotu ikes kipaŋgaut ŋikajiok ŋulu alosete a ŋakejen alo Mesopotamia, alo Aramaaca ka alo Soba.

⁷ Kipaŋgaut ikes ŋagaari ŋalipyo ŋatomoniuni ka ŋaarei ke erwosit ŋolo a Maaka ka ŋasigarya keŋ, ŋulu apotu kiboiut kiŋaren neni anyaritae Medeba. Apotu Ŋiamoni daŋ tolomut alotaunio kec itemokino alosit lojie.

⁸ Ani iirari Daudi ŋakiro ŋun, kiyakiya Yoab ka ŋasigarya daadaŋ ta ŋikilyok ŋulu apedorito ajiore.

⁹ Tolomut Ŋiamoni alotaun, kicodosi iwuapito erot epei akisyakin alopuke ke etaun; ido apotu ŋirwosi ŋulu aponito lojie toriwo neni kec make neni alapat.

¹⁰ Ani iŋolikini Yoab atemar ekecodokis iŋes ŋimoe akitijikin alokicodi ka anabusya, abu iŋes toseu ŋikilyok daadaŋ ŋulu ajiok alo Isirael kisicodo ikes akisiiryakin Ŋiarameani;

¹¹ inak Yoab lokaato keŋ Abisai apolokin ŋikilyok ŋuluce daadaŋ, kisicodo ikes akisiiryakin Ŋiamoni.

¹² Tema Yoab, “Ani kegogoŋioto Ŋiarameani akilo ayoŋ, emaikina iyoŋ ibu akiŋarakin ayoŋ; nai ani kegogoŋioto Ŋiamoni akilo iyoŋ, abuni ayoŋ akiŋarakin iyoŋ.

¹³ Togogoŋior ka totitinyor eŋarakisi ŋituŋa yok, oiutu ŋitaunio ŋulu ka Akuj yok, elipa Ekapolon kitiya ŋuna ejokak aneni keŋ.”

¹⁴ Aŋun, apotu Yoab ka ŋikilyok ŋulu arukitotor kicodosi akisiiryakin Ŋiarameani; ido apotu Ŋiarameani tobwaŋas alokiŋaren Yoab.

¹⁵ Ani iŋolikinete Ŋiamoni atemar abwaŋasi Ŋiarameani, tobwaŋas ikes daŋ alokiŋaren Abisai, tolomasi lotaun. Toboŋo nai Yoab Yerusalem.

¹⁶ Nai ani eanyunete Ŋirameani atemar elout Ŋisirael ikes, apotu kiyakiyasi ŋituŋa anyarare Ŋiarameani ŋulu eboiyete Alokekwaye Aŋolol ŋina enyaritae Eupurate. Potu ŋul epolokinit Sobac ŋolo arae ekarikon a ŋasigarya ka Adadeser.

¹⁷ Ani elimokinio Daudi ŋakiro ŋun, tocunak Ŋisirael daadaŋ, todokasi Kide Yorodan, toloto neni ayakasi Ŋiarameani, kisicodo Daudi ŋasigarya keŋ akisiiryakin Ŋiarameani. Ani kedau Daudi akisicodor ŋasigarya keŋ akisiiryakin Ŋiarameani, apotu kiiryakin ka ikes.

¹⁸ Tobwaŋas Ŋiarameani alokiŋaren Ŋisirael; toara ata Daudi Ŋiarameani ŋalipyo ŋakanikaarei ŋulu ameto ŋaŋolei ka ŋalipyo ŋatomoniomwon ŋulu alosete a ŋakejen. Toara tari Sobac ekarikon a ajiore a Ŋiarameani.

¹⁹ Ani eanyunete ŋituŋa ka Adadeser atemar elout Ŋisirael ikes, apotu kisila ka Daudi, toruwor Daudi ipukat ikes. Aŋun, apotu Ŋiarameani tokuryaketa akiŋarakin Ŋiamoni nabo.