1 Ŋakiro a ŋirwa 17 - Ebaibul

Tocamunos Akuj ka Daudi

¹ Ani kedau Daudi akiboikin kai keŋ, tema Daudi neni a Nasan a ekadwaran, “Ayai ayoŋ ne, eboi alokai a ŋina edukitoe a ŋakito a Cedar, nai eyai Asaduku ŋina ka Acamunet ke Ekapolon loeema.”

² Tema Nasan neni a Daudi, “Kitiya daadaŋ ŋuna itami iyoŋ akitiyakin, anerae irukito iyoŋ kaapei ka Akuj.”

³ Nai abu Ekapolon kirwor neni a Nasan akoloŋit ŋin nakwaare tema,

⁴ “Ape tolimok Daudi eketiyan kaŋ atemar ebala Ekapolon, ‘Meere iyoŋ idukokini Akai ŋina ayakaun ayoŋ.

⁵ Ameun akoloŋit ŋina ayaunia ayoŋ Ŋisirael alo Ijipit, nyeyakauna ayoŋ Kai tari nakoloŋit na. Arae ca loeema ayai ayoŋ, akisyakin anakibois ka apei a ŋina ipotu iyes toloma tari ŋinace.

⁶ Anakiboisyo a daadaŋ a ŋuna abu ayoŋ orukosi ka Ŋisirael daadaŋ, abu mono ayoŋ eŋit edio a ŋikatubok kec a ŋulu abu ayoŋ ecik akiyok ŋituŋa kaŋ Ŋisirael atemar anukiro nyikidukokinitotor iyes ayoŋ Akai a ŋakito a Cedar a?’

⁷ Aŋun nai, tolimok Daudi eketiyan kaŋ atemar ebala Ekapolon ŋolo a ŋajoresyo ebe, ‘Abu ayoŋ okolemu iyoŋ anacokor, anakiyok ŋamesekin aŋuna ka aruwor ekepukan a ŋituŋa kaŋ a Ŋisirael.

⁸ Arukitoe iwon ŋinapei aneni daadaŋ ibu iyoŋ tolot, ido amunya ayoŋ ŋimoe kon daadaŋ ŋulu eriwokina kiŋaren kon. Eturuwori ayoŋ ekiro kon ŋolo eyenen nooi, kikwaanikin ka ŋirorwa a ŋarwonita anakwap.

⁹ Aseuni ayoŋ akibois a ŋituŋa kaŋ a Ŋisirael, ido esiboik ikes nen, ikotere ikes eryamunete akibois ŋina erae ŋina kec, ŋina nyicanere ikes nabo. Nyemaikina ŋulu itiyaete ŋuna aronok kisicana ikes nabo, lopite ŋolo aponiata kisicana ikes ekiŋaren,

¹⁰ etiyata ikes ŋun ameun anapakio a ŋuna araakar ŋikatubok epukato ŋituŋa kaŋ Ŋisirael. Areuni daŋ ayoŋ ŋimoe kon daadaŋ. “‘Nabo daŋ, akalimokini ayoŋ iyoŋ atemar akainakini ayoŋ iyoŋ ŋiletok.

¹¹ Ani edaun ŋirwa kon anakwap a na, apaki ŋina ikinukere iyoŋ neni enukitae atapapaa kon, etopoloori ayoŋ eletonit, kon kilunyokin lokicoloŋ kon, eletonit ŋolo erae iyoŋ elope iuruunit, ido etogogoŋi ayoŋ apukan keŋ.

¹² Eletonit ŋol iŋes edukokini Akai aŋuna a ekiro kaŋ, ido etogogoŋi ayoŋ ekipukae keŋ torubak ŋikaru ka ŋikaru.

¹³ Aruwor ayoŋ papa keŋ, ido eruwor iŋes lokoku kaŋ. Nyajoŋoe ayoŋ amina iŋes lopite ŋolo abunio ojoŋoo amina ekepukan ŋolo ibu iyoŋ kilunyokin lokicoloŋ keŋ kipuka.

¹⁴ Ainakini ayoŋ iŋes apolokin ŋituŋa kaŋ, ido oinak iŋes apukan kaŋ kipuka ŋikaru ka ŋikaru.’ ”

¹⁵ Tolimok Nasan Daudi ŋakiro ŋun daadaŋ ŋuna esileerekinit Ekapolon iŋes.

Akilip a Daudi

¹⁶ Toloma nai erwosit Daudi loeema, kiboikin nen kiŋit Ekapolon ilipi tema, “Ŋae ayoŋ okoe Ekapolon Akuj, ata ŋae ŋituŋa a ekal kaŋ itiyaa iyoŋ ŋakiro ŋuna ajokak ŋun daadaŋ neni kaŋ?

¹⁷ Meere ŋun bon isileereu iyoŋ okoe Ekapolon Akuj, ilimu iyoŋ tari ŋuna itiyakini lotuŋa a ekal a eketiyan kon alorwa a ŋulu epote. Ikitusubunit iyoŋ ayoŋ ituŋanan ŋini apol nooi, okoe Ekapolon Akuj!

¹⁸ Anukiro tokona ŋace ŋuna apedori ayoŋ alimokin iyoŋ aŋuna ikitopoloorya iyoŋ ayoŋ eketiyan kon? Ikiyeni iyoŋ ayoŋ eketiyan kon.

¹⁹ Okoe Ekapolon. Aŋuna ke eketiyan kon ka aŋuna ka acamit a etau kon, itiya iyoŋ ŋakiro ŋuna apolok nooi ŋun daadaŋ, ikiteyenik iyoŋ ayoŋ ŋakiro ŋuna apolok nooi ŋun daadaŋ.

²⁰ Emam ŋini epol ikwa iyoŋ, okoe Ekapolon, emam Akuj ace mati iyoŋ bon ikwapei eirarere isua ŋakiro daadaŋ a ŋaki kosi.

²¹ Ata ŋae ŋituŋa ikwaan ka ŋituŋa kon Ŋisirael? Eya mono ŋituŋa ŋice ikwaanatar ikes anakwapin a akwap ŋulu abu Akuj kec tolot alakun toruworos ŋituŋa keŋ, ido toruunio ekiro keŋ aloticisyo keŋ a ŋulu apolok ka a ŋulu ka aumokin a? Eya mono ŋituŋa ŋulu abu Akuj kitiya ŋuna ka aumokin neni kec anakiritanar ŋituŋa a ŋakwapin alokiŋaren ŋituŋa kon ŋulu ibu iyoŋ tolaku alo Ijipit a?

²² Ituruwo iyoŋ Ŋisirael kire jik ŋituŋa kon a alope ŋikaru ka ŋikaru, idau iyoŋ aruwor Akuj kec okoe Ekapolon.

²³ “Tokona Ekapolon, alotooma ŋakiro daadaŋ ŋuna idau iyoŋ akisileereun aŋuna a eketiyan kon ka aŋuna a ŋituŋa a ekal keŋ, kisiyook toruwor ŋuna a ŋikaru ka ŋikaru; kitiya lopite ŋolo idaunia iyoŋ akiikin,

²⁴ ikotere nai itopolooryo ekiro kon ŋikaru ka ŋikaru anakiro a ŋuna ebasi, ‘Erae Ekapolon ŋolo a ŋajoresyo, Akuj ŋina ipukat Isirael, ŋina erae Akuj a Isirael ka erubakinete ŋiletok a Daudi a eketiyan kon erae ŋikepukak ŋikaru ka ŋikaru.’

²⁵ Akuj kaŋ, ikisileerek iyoŋ ayoŋ eketiyan kon atemar ŋiletok kaŋ ituruwori iyoŋ ŋirwosi. Aŋun, adau ayoŋ eketiyan kon aryamun akisimukekinet ŋinakilipet neni kon anakilip a na.

²⁶ Okoe Ekapolon, irae iyoŋ Akuj, idau iyoŋ akiikin ayoŋ eketiyan kon ŋakiro ŋun ŋuna ajokak.

²⁷ Elipi tolakar iyoŋ kiterereŋ ekal a eketiyan kon, ikotere erubakinete erae ŋulu kon, anerae iyoŋ okoe Ekapolon, idau akiterereŋ ikes ka erereŋioto ikes ŋikaru ka ŋikaru.”