1 Ŋakiro a ŋirwa 15 - EbaibulYau Daudi Asaduku ŋina ka Acamunet Yerusalem alo Kirias-Yearim ( 2 Sam. 6:12-16 ) 1 Ani kedau Daudi akiduk ŋakais keŋ lotaun a Daudi, abu kitemonok akibois aŋuna ka Asaduku ka Akuj, ido abu kigurok eema aŋuna ka Asaduku a ŋin. 2 Tema nai iŋes, “Mam ituŋanan ice, ŋini edakuni Asaduku mati ŋilepi bon, anerae abu Ekapolon toseu ikes adakit Asaduku ke Ekapolon ka akitiya etic keŋ ŋikaru ka ŋikaru.” 3 Abu nai Daudi tocunak Ŋisirael daadaŋ Yerusalem aŋuna ka ayaun Asaduku ke Ekapolon alo Kirias-Yearim, nakibois ŋina abu Daudi kitemok aŋuna ka Asaduku a ŋin. 4 Tonyarau iŋes ŋiletok ka Aron kaapei ka ŋilepi aloletok a ŋituŋa a lu: 5 Aloletok a Koas, aponi tonyaraunae lu: Uriel ikwapei ekarikon ka ŋiyeneta keŋ amiat ka ŋatomoniarei. 6 Aloletok a Merari, aponi tonyaraunae Asaya ikwapei ekarikon ka ŋiyeneta keŋ ŋamiae ŋaarei ka ŋatomoniarei. 7 Aloletok a Gerisom, aponi tonyaraunae Yoel ikwapei ekarikon ka ŋiyeneta keŋ amiat ka ŋatomoniuni. 8 Aloletok ke Elisapan, aponi tonyaraunae Semaya ikwapei ekarikon ka ŋiyeneta keŋ ŋamiae ŋaarei. 9 Aloletok ke Eburon, aponi tonyaraunae Eliel ikwapei ekarikon ka ŋiyeneta keŋ ŋatomonikanikauni. 10 Aloletok a Usiel, aponi tonyaraunae Aminadab ikwapei ekarikon ka ŋiyeneta keŋ amiat ka ŋitomon ka ŋiarei. 11 Ekaku, abu Daudi tonyarau Sadok ka Abiasar ŋulu arae ŋisacaradotin ka tonyarau ŋilepi lu: Uriel, Asaya, Yoel, Semaya, Eliel ka Aminadab. 12 Tema neni kec, “Iyes iraakasi ŋikarikok a ŋituŋa ke ekal a Lepi, emaikina iyes ka ŋilepi ŋuluce kitaleunos, ido toloto yaut Asaduku ke Ekapolon a ŋolo erae Akuj a Isirael, nakibois ŋina adau ayoŋ akitemokin aŋuna keŋ. 13 Arae aŋuna pa kiponiata iyes ŋilepi yaut iŋes ekiŋaren ne, iŋes abunio Akuj toŋo nooi aŋuna yok, anerae pa aponi iwon kidarae Asaduku ŋin lopite ŋolo amaikina kidarere.” 14 Aŋun, apotu ŋisacaradotin ka ŋilepi kitaleunos aŋuna ka ayaun Asaduku ke Ekapolon a ŋolo erae Akuj a Isirael. 15 Apotu nai ŋilepi todakut Asaduku ka Akuj eryoŋito aloseketa, iwuakinitae kidiama ŋakito, lopite ŋolo sek ecikitor Moses ikes anakirot ke Ekapolon. 16 Tolimok daŋ Daudi ŋikarikok a ŋilepi toseut ŋikaitotoi kec aruwor ŋikaeok, toeoto ŋieosyo ŋulu ka alelyanu isitiyaete ŋiboro ŋulu eramyo, ikwapei ŋagitae, ŋaduŋgui ka ŋitworoi. 17 Aŋun, apotu ŋilepi toseut Eman lokoku a Yoel aneni a ŋikaitotoi keŋ, apotu toseut Asap lokoku a Berekia; toseut alokaitotoi kec alo Merari-Esan lokoku a Kusaia 18 aŋuna ka akiŋarakin ikes akiram ŋiboro ŋulu eore. Apotu ŋilepi toseut alokidiŋ kec ŋilepi lu: Sakariya, Yasiel, Semiramos, Yeiel, Uni, Eliab, Benaia, Maaseia, Matisia ka Elipeleu ta Mikineia; toseut Obededom ka Yeiel ŋulu arae ŋikedarak ŋipukei. 19 Arae etic ke Eman, Asap ta Esan aeore eramete ŋitworoi ŋulu etiyaunitae ke eburonis; 20 arae etic a Sakariya, Asiel, Semiramos, Yeiel, Uni, Eliab, Maaseia ka Benaia aeore eramete ŋaduŋgui, lopite ŋolo aeore ikyaaritae eete. 21 Arae etic a Matisia, Elipeleu, Mikineia, Obededom, Yeiel ka Asasia aeore eramete ŋagitae lopite ŋolo aeore etikiunitoe eete. 22 Kenania ekarikon a ŋilepi iŋes apolokinit aeore; arae ŋol etic keŋ, anerae ayeni iŋes aeore nooi. 23 Arae Berekia ka Elikana ŋiketeok epuke ŋolo elomarere neni ayai Asaduku ŋina ka Acamunet. 24 Arae etic a ŋisacaradotin a lu: Sebania, Yosapat, Nesanel, Amasai, Sakariya, Benaia ka Elieser akikut ŋarupepe alokiŋaren Asaduku ka Akuj. Etic ka Obededom ka Yeia ece iŋes akidar epuke ŋolo elomarere neni ayai Asaduku ŋina ka Acamunet. 25 Aŋun, apotu Daudi ka ŋikasikou a Ŋisirael ta ŋikarikok a ŋikajiok a ŋalipulipui, toloto akiom Asaduku ŋina ka Acamunet ke Ekapolon, oma alokai ka Obededom eeosi ka alelyanu. 26 Aŋuna abunio Akuj kiŋarakinia ŋilepi ŋulu adakito Asaduku ŋina ka Acamunet ke Ekapolon, apotu ikes toara erae amuronot ŋimoŋin ŋikanikaarei ka ŋimesekin ŋikanikaarei. 27 Apaki ŋin, anapit Daudi ekaaso ŋolo ajokan ŋolo amilimilan, lopite ŋolo anapitotor ŋilepi daŋ daadaŋ ŋulu adakito Asaduku ŋina ka Acamunet, kaapei ka ŋikaeok ta Kenania ŋolo arae ekarikon a ŋikaeok. Anapit daŋ Daudi arapet ŋina amilimilan. 28 Aŋun apotu Ŋisirael daadaŋ yaut Asaduku ŋina ka Acamunet ke Ekapolon, ecelasi, tokusete ŋabureryaŋa a ŋimesekin, ŋarupepe, toramete ŋitworoi ka tobolyas ŋagitae ka ŋaduŋgui. 29 Ani elomunere Asaduku ŋina ka Acamunet lotaun a Daudi, toripiya Mikal nakoku a Saul alodirisa, kiŋolik erwosit Daudi epori ka idoŋae, ido abu iŋes tojamuwa Daudi alotau keŋ. |
Ngakarimojong Interconfessional Bible © Bible Society of Uganda, 2008.
Bible Society of Uganda